| ||||||
呢度講緊嘅馬仔，並唔係羅傑承班伙記，而係真係佢飼養嗰幾隻馬：「軍事行動」、「軍事機密」及「軍事攻略」（啲名係幾咁架勢！）。 早前羅傑承同大劉被澳門初級法院，裁定行賄及洗黑錢罪成，判監五年三個月。上訴期間，香港賽馬會已即時有反應。馬會基於「事件有損香港賽馬會形象」，已終止佢哋兩個嘅馬會會籍。無會籍有幾慘？嗱，無得去馬場會員席觀賞賽事、無得坐包廂房、無得去馬會食早餐、無得去游水、無得去打波……聽落真係慘。咁大劉想入馬會玩，唯有「掹」住養咗隻「替天行道」嘅馬主女友呂麗君衫尾咯！ 而羅傑承又比大劉更慘慘豬！唔係會員，就無得做馬主，結果佢要將幾隻愛駒轉去太太梁芷珊名下。以後照顧馬仔嘅責任，要交由「養母」處理，羅傑承探班無以前咁易喇。小宗提議，或者佢可以試嚇喬裝平民，同其他賭仔一齊俾十蚊坐公眾席，替自己啲馬打氣。其實氣氛都唔錯o架，係咪？ 中環寸嘴識食要叫會長翅 闊佬想食好嘢，有好多選擇，呢個世界唔係得福臨門。今個星期口淡淡，決定去寧波旅港同鄉會。嚟呢度，識食，一定食「會長翅」。名叫會長翅，梗係會長先食得起，不過我唔係會長都夠quali食。六人份量，盛惠二千幾，抵！會長梗係唔呃得，翅足有十二兩，加埋老雞及金華火腿熬製嘅高湯，啲金華火腿多到成座山，食剩嘅打包返屋企翻煲再翻煲，食得唔好嘥！呢度亦有住家菜，清炒河蝦仁、雪菜百葉炒肉絲、水鴨同花彫醉乳鴿都正，食完份乳鴿，剩餘嘅花彫汁要淋上其他菜、去油呀﹗點解我鍾意嚟呢度？出品穩定，手工幼細。寧波同上海好近，但寧波佬出名實際，日頭做生意、夜晚數銀紙；上海佬只愛充闊佬。睇埋入會價，永久會員費一皮，入會後餐餐有九折，食多幾餐就到數。上海總會要四皮！貴咁多，個裝修食得嘅咩？呢度仲有道風味菜，好多富豪點，就係臭豆腐。為咗體面，唔可以企喺街邊食，口痕起來，唯有上呢度食。佢陣臭味，有助口臭嘅富豪以毒攻毒。（本週日去咗鄺美雲有份搞嘅太陽國際拍賣，睇中嘅玉牌俾郭老太細佬鄺準投咗。Cally，我都有舉手，幾時俾番幾百蚊（臨記舉手費）我先？） 楊國佳 工廈大王楊耀松大仔，家族的收租物業，遍佈港九，屬正牌收租公。自認寸得起，謂「有我咁得閒，無我咁有錢；有我咁有錢，又無我咁得閒」，經常流連富豪飯堂品嚐美食，仲喜歡到新開食肆「踢竇」試新菜。 華爾街狼人 早前本刊送出十張華爾街狼人講座門票，並請有興趣的讀者附上一條問題，反應踴躍。 講座當晚，小宗抽取其中五條，並找來狼人Jordan Belfort親自回答：Elaine Wong：你銷售技巧是天生的，還是透過後天訓練呢？Jordan：天生的，但從我教授別人時發現，這些技巧可變成系統，一步一步去學習。Nigel Poon：你有最喜歡的座右銘嗎？Jordan：致富只有一條路——快。KH Lam：你是否每天都有美女相伴？Jordan：哈哈，是的，我是幸運的。但我現在只有一個女人，我們已訂婚了。GiGi Poon：在商業世界賺錢，真的有一個雙贏的方法嗎？Jordan：找有價值，而價值又未被發現的股票，長期持有，也要靠自己做研究。CK Leung：你追求名利、成功背後，有什麼原動力？Jordan：我愛工作，並對未來五年有計劃，希望可以在全世界做慈善工作，所以錢是很重要。小宗聽完Jordan講嘢及講座，印象最深嘅，唔係佢教人發達要有system，而係佢不斷叫人起身嗌「Yes!」及「I want to be rich!」。仲有幾乎每講一句都有、令人醒神嘅粗口。各位學嘢啦！ 陳裕光歌喉拍得住Leon 大家樂（341）主席陳裕光，最近忽發奇想，搞咗個歌唱比賽「歌手一號」，一班CEO老友撐場獻唱。好似謝瑞麟（417）副行政總裁陳立業，唱《上帝早已預備》、中華電力（2）企業發展總裁莊偉茵同股評人青姐，就夠曬懷舊，前者唱劉雅麗嘅《你你你為了愛情》，後者唱陳秀雯嘅《驟雨中的陽光》。聽落都有番咁上下專業水準o架！搞手陳裕光本來耍手擰頭話唔唱，但班老友咁高興，對腳「不由自主」行咗上台，唱咗黎明嘅《那有一天不想你》。陳裕光歌喉同天王黎明有得揮﹗即係點？你懂的。不過，冧歌梗係唱俾台下嘅陳太聽o架啦，陳太收到曬就得啦！ 金牙大狀講嘢會計師公會不識時務 會計師公會紀律處分肥胡．胡定旭，除佢牌兩年、罰款25萬元同時要佢分擔200萬元紀律及調查程序費用。犯咗乜事要罰得咁重？公會裁定佢專業行為不當也。其誠信如何，可以想見。專業行為不當係兩年前嘅裁決，此可又無礙政改三人組對佢老哥另眼相看，特登喺結束諮詢前一日，破格單獨同佢一個人見面。到底三人組係貪肥胡見多識廣、誠信過人，抑或特登俾顏色會計師公會睇：你哋話佢專業失當吖嘛，我哋撐佢，吹吖？同樣當會計師公會冇到者，仲有中華人民共和國嘅全國人民政治協商會議。你哋話佢專業失當、搣佢柴吖嘛，我哋繼續搵佢做常委，吹咩！咁不識時務，唔通會計師公會想唔……？ | ||||||