打電話搵上門 周嘉儀短訊「問候」陳佩琳 許方輝驚到帶老婆搬
1 :
GS(14)@2015-05-14 12:24:052015-05-14 NM
13年，大台新聞部許方輝偷嗒主播周嘉儀斷正，有婦之夫立即單方面斬纜。心有不甘，自以為樣樣勝陳佩琳（許方輝老婆）一籌的周嘉儀，見風頭已過，早前再發動攻勢，電話、WhatsApp外，甚至打inline同屋企電話搵上門，又出招對方同自己食farewell飯……幾經辛苦先番老婆，許方輝唔敢再亂，一於「唔應機」！好勝周嘉儀不肯罷休，索性短訊問候人妻陳佩琳；為免身邊人再受傷害，慌張許方輝帶埋老婆，急急搬竇。不忿被撇
和同部門同事周嘉儀密會斷正後，許方輝被大台勒令停工避風頭，至於老婆陳佩琳亦一度離家出走；為保住事業同家庭，出軌許方輝單方面斬纜，自此對周嘉儀不聞不問，復工後，亦刻意將工作時間安排到同對方零機會碰面，免落人話柄。
被許方輝狠撇，周嘉儀一直耿耿於懷，認為對方欠自己一個交代。
「一向只有Venus（周之洋名）飛人，冇人飛佢，個男人對佢不聞不問，又冇同佢交代清楚，佢當然唔順氣，成日話除timing，無比唔上陳佩琳，我幾個（朋友）都勸Venus唔好咁好勝，飯碗要緊！」周嘉儀的閨密說。
電話搵上門
忍年半，周嘉儀終於等到搵到路離開大台，據了解，她未向公司遞信，已第一時間WhatsApp通知許方輝，以為前度已放低過去，重新出發，許方輝於是爽快回覆並送上祝福，此舉令周嘉儀以為雙方關係有轉機，隨即展開WhatsApp攻勢。犯錯後得老婆陳佩琳既往不究，「守行為」中的許方輝唯恐再有閃失，只作有限度禮貌回覆，但見男方有一句冇一句的，周嘉儀於是加大力度，不停WhatsApp，又大膽到打公司inline，甚至連許方輝的屋企電話都唔放過。「其實Venus好少提同許生，有次同佢一齊shopping，佢好得戚咁話有人WhatsApp唔覆，inline唔聽，咪打去屋企搵人囉！仲話人搵唔到唔緊要，最緊要過程好玩！有邊個『人』令Venus咁放唔低？一定係許方輝啦！佢打去人屋企，咁即係同人老婆直接對話啦，又唔係無人追，搞咁多！」閨密說。
兩年孽緣
一三年，周嘉儀同許方輝收工後到荃灣篤魚蛋前，兩人先到龍翔道山邊車廂談心。
Watt數高
被網民捧為宅男女神的周嘉儀，電力驚人，除了已婚的許方輝，她自爆曾拍過五次拖，亦揚言只會吼月薪七萬以上的異性。
金融才子
10年，被踢爆溝掂一名身高六呎、外表斯文的金融才俊後，周嘉儀忽然富貴，由葵涌公屋搬到荃灣豪宅，出入有男友名下靚車接送，生活富泰。
已婚四眼男
去年5月，再搭上一名四眼已婚男，二人約會於尖沙咀撐腳，其間周嘉儀施展渾身解數，放電托腮出盡功。
有米Edward
上星期，周嘉儀被撞破與一名叫Edward的有米男歎日本菜，據了解，Edward是高級西班牙餐廳老闆，名下有多門生意，家住2,000多萬西貢獨立屋，對住發電機周嘉儀，有米Edward管接管送傍到實，表現細心。
三扒兩撥搬
相信只要等到周嘉儀離開大台，事情便會過去的許方輝，決定採取守勢，一於繼續冇反應唔回覆。硬招唔見效，周嘉儀轉用軟功，縱然自己在公司人緣普通，但部門之內，仍有一班觀音兵追隨，有人提議和她食farewell飯，周嘉儀竟然主動開口，話叫埋許方輝。「班觀音兵聽到都O晒嘴，許生不嬲都唔同同事social，兩個之前又有，邊個敢開口喎！」一名無新聞部同事說。放風搵人嗌埋許方輝食farewell飯外，據知周嘉儀亦親力親為，WhatsApp扭對方請食farewell飯，但許方輝依然無動於衷。前度唔受，好勝周嘉儀決定玩大佢！WhatsApp陳佩琳，送上問候。「臨走幾個月，Venus不停玩，許生都呻過，話忍埋呢幾個月就無事，點知呢頭講完，佢就WhatsApp問候埋陳佩琳！許生驚到唔理咁多，半個月內搵到新屋，帶埋老婆搬走。」知情者說。住慣馬鞍山區的許方輝，最終租住同區只有兩年樓齡的迎海五六五呎單位。早前，陳佩琳獨自離開舊居，到頌安日本城買天線，只見她密密影相，傳WhatsApp，估計是同許方輝確認貨品是否正確，之後再執了一堆家品，便返回迎海新居。同日晚上七時，許方輝收工捧住兩個大咕𠱸返回上址。週日（十日）下午一時，許方輝一身街坊裝，單拖離開新居，出外接老婆回家，可見周嘉儀的「動作」，並未影響夫婦感情。
牙齒印
無新聞小花為爭上位經常傳不和，其中周嘉儀自恃有人射住，不但搞不倫戀，更周圍辣火頭，歷年來，留下不少牙齒印。
林小珍
周嘉儀離職後，曾與她長期在《香港早晨》中拍檔的林小珍，即在fb爆出周嘉儀「毒舌」，揶揄她老公出去偷食，黑心咒小珍一入門就剋死老爺，詛咒老人家「死快點」。
盤翠瑩
13年，二人因一個奇異果公開吵大鑊，比自己遲一年加入新聞部的盤翠瑩在fb留言單打，其後二人在公司撞到正，當場嗌交，周嘉儀更向各同事發內部email，暗寸有人行為鬼崇，有事就直 接講……
黃紫盈
傳與另一小花黃紫盈爭上位，結果被對方向傳媒放料，踢爆周嘉儀做小三，搭上有婦之夫許方輝。
過手癮唔買
至於上月一日已正式上任興業證券市場拓展部聯席董事的周嘉儀。有餐廳老闆Edward密約追求外，亦有觀音兵做阿四。日前，中午飯時間，周嘉儀離開中環的辦公室，到附近與一名四眼男碰面，人未到，已經千watt電眼老遠揮手打招呼，接過對方為她代購的一大袋宜家貨品，即閃。下午四時半，化行妝set晒頭的周嘉儀一身party dress離開公司，同兩女子坐的士到尖沙咀圓方shopping，在Chanel逗留半小時，不同包包試上身，過完手癮後，夠鐘行去W酒店出席活動。泊新碼頭，還要咬住許方輝夫婦，周嘉儀實在好勝！
大婆險勝
娛樂圈誘惑多，但藝人為保形象，大多數最後一刻都會重返正印身邊，但一不離二，二不離三，小三誘惑始終難抗拒，離婚收場人辦包括羅嘉良、陶大宇、溫兆倫等，可以唔散的，大多數係老婆忍得有功！
江華
96年，和鄧萃雯合作亞視劇《我和春天有個約會》撻，到女方屋企過夜斷正。事後江華急與鄧萃雯劃清界線，更同老婆麥潔文聯手公開數臭對方，經過這次事件後，江華兩公婆一齊至今。
馬德鐘
人夫馬德鐘在大台走紅後，便成為花旦殺手，先後同郭羨妮、佘詩曼、胡定欣等傳出緋聞。06年，他搞上圈外女友Katherine，老婆張筱蘭一怒之下帶同兒子返法國，為了挽回事業及形象，馬德鐘最後重回老婆身邊。
彭順
背住老婆李心潔偷嗒𡃁模Liddy（李悅彤），被揭發後賤男丟低Liddy，趕飛馬來西亞箍煲，之後變成跟得老公，經常陪住老婆。