| ||||||
| 香港樓價到底見 頂未？根據班富豪嘅舉動，似乎就未囉！好似上個月賣股「骨」水35億銀嘅理文（2314）大股東李運強家族，佢哋公司打骰嗰位（首席執行官）李文俊，原來 即刻掟咗億二銀彈出嚟，向嘉里（683）買咗間何文田灝畋峰47樓全層相連單位，成4328方呎，每呎盛惠2.77萬銀！ 過去冇乜聽過李文俊炒樓，最多係06年用1.7億買咗山頂白加道31號屋仔自用。住開獨立屋仔，無啦啦又會「降呢」住番大廈嘅？唔知係咪李公子見近排何文田地皮破紀錄成交，豪宅市場又炒到㷫烚烚，所以心郁郁想學人炒樓走番轉呢？ 話時話，李公子雖則出身大富之家，老竇李運強今年仲位列《福布斯》香港富豪榜第15位，身家有成176億港紙，但李公子都唔係二世祖嚟o架。90年代先創立嘅理文，李公子一直好努力幫阿爸手搞好盤生意，估唔到係成日遇到大風大浪，搞到爭啲被擊沉。 好似97年咁，華華都天真咁以為回歸之後會有好日子啦，點估到會有單亞洲金融風暴爆出嚟o架；好辛苦捱到06至08年，以為終於等到機會大事擴張啦，又撞正金融海嘯喎，搞到負債率一度去到85%。 李公子唔係一生都順風順水，搞生意交咗唔少學費，o依家炒樓，唔知又使唔使再交一下學費呢？ 李華華 [email protected] | ||||||
|
||||||
|
美高梅中國（2282）公開招股，噚日管理層先行見記者，可惜全場正式回答到嘅問題得3條，諗住事後撲埋去賭后何超瓊度八吓佢今次套現幾多、爭產問題搞掂晒未，亦都無機會，皆因有關方面派出「得力」董事攔人兼攔問題。 話 說噚日記者會，由集團非執行董事Bill Scott主持，雖則話係「非執行」董事，但佢噚日就「執行」咗唔少任務。首先，喺記者會負責做主持，引領發問之餘，堵截咗所有同集團上市冇關嘅問題，賭 后連「拒絕回應」四隻字都慳返。當何超瓊離場時，成班記者追上去諗住講多兩句，但Bill董即時變身保鑣，一個大字形手勢、配以一個凌厲眼神趕絕記者。呢 位非執董果然做到嘢！ |
||||||