| ||||||
香港樓價到底見 頂未?根據班富豪嘅舉動,似乎就未囉!好似上個月賣股「骨」水35億銀嘅理文(2314)大股東李運強家族,佢哋公司打骰嗰位(首席執行官)李文俊,原來 即刻掟咗億二銀彈出嚟,向嘉里(683)買咗間何文田灝畋峰47樓全層相連單位,成4328方呎,每呎盛惠2.77萬銀! 過去冇乜聽過李文俊炒樓,最多係06年用1.7億買咗山頂白加道31號屋仔自用。住開獨立屋仔,無啦啦又會「降呢」住番大廈嘅?唔知係咪李公子見近排何文田地皮破紀錄成交,豪宅市場又炒到㷫烚烚,所以心郁郁想學人炒樓走番轉呢? 話時話,李公子雖則出身大富之家,老竇李運強今年仲位列《福布斯》香港富豪榜第15位,身家有成176億港紙,但李公子都唔係二世祖嚟o架。90年代先創立嘅理文,李公子一直好努力幫阿爸手搞好盤生意,估唔到係成日遇到大風大浪,搞到爭啲被擊沉。 好似97年咁,華華都天真咁以為回歸之後會有好日子啦,點估到會有單亞洲金融風暴爆出嚟o架;好辛苦捱到06至08年,以為終於等到機會大事擴張啦,又撞正金融海嘯喎,搞到負債率一度去到85%。 李公子唔係一生都順風順水,搞生意交咗唔少學費,o依家炒樓,唔知又使唔使再交一下學費呢? 李華華 [email protected] |