【唔使覆WhatsApp】夠鐘即斷電斷網 世界良心僱主
1 :
GS(14)@2016-06-06 02:55:07當香港仲拗緊最高工時同男士侍產假等議題，法國已經計劃修訂勞工法例，修訂案其中一條擺明車馬叫「斷線權」（Right to Disconnect）。
自從有咗email同WhatsApp，奪命追魂call就變得無遠弗屆，唔理你有幾愛你份工，收工後接到追魂柯打，明明同朋友happy hour緊，大概都只能眼淚在心裏流。不過法國已經計劃修訂勞工法例，修訂案其中一條仲擺明車馬叫「斷線權」（Right to Disconnect），建議50人以上公司自行制定條文，限制工時外嘅電子公事來往，俾各位下班後名正言順同公事disconnect咁話。呢個「斷線權」雖然只係「建議」，但打工仔總算有個保障。雖然法國民眾對呢個修訂案一般都抱負面態度，早前仲有示威遊行，不過非因「斷線權」，而係因為有其他條例削弱咗年青勞工嘅工作穩定性。雖然法例未通過，但世界各地早有唔少公司出盡力唔畀大家開OT，想真‧收工？其實唔難。一、德國金屬工業公會（IG Metall）、Volkswagen德國金屬工業公會旗下企業同汽車品牌Volkswagen，早兩年訂立起由下晝6點15分至清晨7點鐘為休息時段，其間各企業伺服器會設置阻礙email收發嘅程式，公司電郵會7點後先send到員工手上，大條道理唔使人收工後繼續follow email loop。二、荷蘭設計公司Heldergroen設計公司果然係設計公司，連office都有特別design，每到下晝6點鐘，辦公枱連電腦就會自動升起至天花板，以行動支持員工6點後準時放低工作。騰出嘅空間仲會畀員工活動一下，工餘有瑜珈班同party，正！三、日本厚生勞動省日本人出名工時長，日本厚生勞動省（即管理日本醫療、勞動政策、社會保險、公積金等行政的政府機構）2015年3月開始規定部門內職員，10點一到就要返屋企唔准加班，希望帶動一般企業都可以提早收工。夜晚10點呢個「抗OT」標準放諸香港應該會令人O咀，不過喺日本來講都算係咁。四、韓國三星火災海上保險唔只日本，南韓都一樣係OT重災區。不過三星火災海上保險公司由2013年8月開始，每個星期三下晝6點半，就會切斷網絡電源，6點鐘更會發出「即將切斷網路」警告，你坐喺公司都冇電腦用，迫員工放工。不過，人離開公司又唔代表手尾唔使帶返屋企做，想真‧收工嘅話，都係專心做好呢份工罷啦。記者：黃樂雯
法國民眾五月頭發起示威遊行，反對以法國勞工部部長Myriam El Khomri為名嘅"El Khomri Law"修訂法。
荷蘭Heldergroen設計公司工作枱的自動上升設計夠創意，有網民講笑話，同一件事喺亞洲地區大概會係員工連工作枱吊上半空，做完先放落地。
來源:
http://hk.apple.nextmedia.com/su ... t/20160603/19639475