凡處高位者，即使是賈似道還是魏忠賢，總有因由。 從來無人規定爬得快升得高的人，一定是工作能力極高，或者建功立業。
比如筆者看《明亡清興六十年》，最會打仗的熊廷弼同袁崇煥， 前者首傳九邊（斬了頭還要到邊界傳閱）， 後者凌遲棄市（一刀一刀切死，屍體在街上任人搶），雖然後來所有害過佢地的人連同皇帝在內全部都沒有好下場，對我們亦有一點啟示。
袁崇煥打第一仗「寧遠大捷」就打死了清朝的老祖宗努爾哈赤，皇帝就搵太監監軍； 第二勝仗「寧錦大捷」，論功行賞第一功居然係魏忠賢，然後排一大堆太監，袁崇煥排第86，升一級賞三十兩，然後辭埋職； 第三次日夜兼程由寧遠（今遼寧興城）跑到北京救皇帝，結果比皇帝鋸埋。
就以筆者職場所見，有些人是「打工叻」，有些人是「做野叻」，升職最快的人，每多是前者，甚至同時兼備兩種優點的亦不夠佢地快！兩者俱無者你亦不用為佢地擔心，最慘的人是「做野叻打工唔叻」，有功無得領，有過又要認，平日又無得偷懶。
呢個世界你可以話係唔公平，不過你不如話你唔認識遊戲規則，成功的老細有成功的遊戲規則，失敗的老細有失敗的遊戲規則。你跟著一個失敗的老細，你唔同佢一齊失敗，佢係會唔高興的。