剝光豬通屋走吳耀漢整蠱節目鼻祖
1 :
GS(14)@2017-06-10 12:23:00吳耀漢演喜劇一流，好快成為香港一代笑匠。佢喺83年同洪金寶、馮淬帆、秦祥林、岑建勳合作《奇謀妙計五福星》，其一幕話佢學識咗「隱形」，除晒衫通屋跑，仲衝咗入浴室裝鍾楚紅沖涼。呢一幕坦蕩蕩嘅場面，吳耀漢喺訪問中曾解釋話：「我係一個演員，個場戲有需要就要演出！」嘩，幾有氣勢！當時洪金寶仲好肯定咁要由吳耀漢演出，原因係「因為你（吳耀漢）個樣夠戇居。」吳耀漢憶述呢場戲，佢話「小吳耀漢」完全無遮無掩無黐膠紙，結果剝光出度嚟一刻，連攝影師都忍唔住笑，結果不停NG，一場戲要拍足一日。呢個喜劇角色，以唔同方式延續落去，仲令吳耀漢成為咗香港整蠱節目嘅鼻祖！所講嘅，喺亞視節目《吳耀漢攪攪震》，以低成本製作道具，親身走上街整蠱途人，好似有扮牆上油畫、匿入假嘅郵箱幫人收信、捐入地底彈出嚟嚇人咁。佢哋仲有一招好叻，就係幾個工作人員拎住幾張大地圖遮擋視線，趁混亂偷龍轉鳳，呢招萬試萬靈，例如假model公仔變番真人、細狗換大狗，次次被整蠱嘅人都笑埋一份。
來源:
http://hk.apple.nextmedia.com/entertainment/art/20170605/20045098