盧太：希望大家祝福佢盧大偉患癌激瘦 留醫照講爛Gag
1 :
GS(14)@2016-03-02 15:01:58■以往屬大碼身形的盧David，近兩年突然急瘦，上年12月出席活動時兩邊面頰亦見凹陷。互聯網圖片
今年71歲的無綫資深藝人盧大偉（盧David），昨突然傳罹患腸癌和病危消息。其實自前年他辭演劇集《倩女喜相逢》後，便鮮有出席公開活動。記者在其facebook的大合照中，發現盧David身形激瘦，精神狀態欠佳。其好友鄧英敏昨表示對方現正在醫院療養，更有「唔認得人」情況出現，不過仍愛搞爛gag，盧太更謂希望大家可以祝福佢。
盧大偉是無綫昔日節目《歡樂今宵》的中流砥柱，更是搞笑始祖，除了喜歡搞爛gag，更愛扮鬼扮馬，最經典莫過於他和沈殿霞合跳《天鵝湖》一幕。早年盧David開辦教室，教小朋友口才和配音，兩年前亦曾替無綫客串劇集《女人俱樂部》，重新活躍幕前。同期他原本應承無綫拍另一新劇《倩女喜相逢》，但最後卻以病為由辭演，往後盧David鮮有出席公開場合，直至昨日卻突然傳出他罹患腸癌和病危消息。
■盧David的太太多年來在丈夫身邊為他打點一切，對於有傳老公患病，她希望大家可以祝福他。互聯網圖片
■就算近年患病，盧David亦致力他的教室。
性格積極正面
本報記者昨致電盧太，她說：「佢係年紀大，即吓油箒，而家有啲攰，感冒都有啲攰喇，今日都有好多傳媒朋友打嚟問，多謝大家關心。」有傳盧David患腸癌？她說：「我都聽講有報道出咗嚟，David而家情況唔想多講，佢需要靜心休養，調理番個身體，我唔係醫生，有啲事我都唔識得點講，佢係一個好正面、好積極嘅人，希望大家都可以祝福佢。」據悉盧David去年2、3月發現患腸癌，經曾志偉介紹名醫醫治，並已進行切除癌細胞手術後，腎臟亦出現問題，是以他除接受癌症治療外，要接受血液透析療程。據一位上月到醫院探望盧David的好友透露，盧David精神不俗，與友人傾談時心情暢快，還不時講他最擅長的爛gag。
■兩年前盧David（右）曾為無綫拍節目，但其後卻以病為由辭演新劇。
■盧大偉曾是無綫最受歡迎的主持之一。
「少少唔認得人」
盧David好友鄧英敏昨透露早前見過對方，發覺他瘦了足足兩個碼，縱使穿很多衫仍覺凍，鄧英敏在電話中表示：「最後一次見佢係去年年尾，當時我哋出席活動，佢係嘉賓之一，原本要上台講嘢，不過佢嗰晚狀態唔係幾好，所以我就走落台同佢傾幾句，見佢傾偈嗰陣，條氣好唔順，如果100分滿分，我諗佢嗰晚得60至65分。其實我估計佢個病係呢兩、三年嘅事，中間唔排除有做過手術，不過可能佢冚住唔想畀人知。有次食飯撞到佢同老婆，都有同佢傾幾句，原本想同佢影合照，不過佢太太就話唔好，話等佢精神啲先再影，咁我都明嘅！」鄧英敏透露原定《歡樂今宵》一班舊同事在農曆年約埋敍舊，盧David最初應承會和太太出席，但最後都冇現身：「嗰次係珠女（吳麗珠）發起嘅，我哋朋友之間都知佢唔舒服。有個舊同事同我講，佢而家有少少唔認得人，近排一直留喺醫院療養。」記者亦試過致電吳麗珠，她表示早前曾見過盧David，但其他就不方便回應。至於曾和盧David合作過的薛家燕昨表示：「我幾個月前有聽聞過呢個消息，身體唔係咁好，但係我一直都好忙，我個女都有提過，叫我有時間去睇吓佢。」與盧David同一基督教教會的寶珮如則說：「我同佢同一教會，我只係知佢身體唔係好舒服，好耐冇見佢返教會，其他就唔清楚。」採訪：王梓嫚、魯吉、何慧斯
來源:
http://hk.apple.nextmedia.com/entertainment/art/20160302/19512114