操盤手札記：盈喜股高追蝕章
1 :
GS(14)@2017-07-29 03:21:59終於見到27000！恒指朝早衝上27007，但屠熊開餐後掉頭，收26941，升88點。闊別兩年嘅27000關，係2015年6月下跌裂口阻力，初試破關遇阻回調，屬於正常套利操作，並唔代表大市轉弱。期指結算在即，好友已連贏6個月，今個月贏多鋪冇走雞，挾死淡友之餘，後市有力再上。港股連日創兩年新高，不過越係升市，越要有戒心，要留意上市公司業績係咪配合。重磅股友邦（1299）、滙控（005），分別會喺本周五、下周一放榜。業績當前，大批公司發盈喜，過去一個月，有112間，當中26間預告中期多賺超過一倍，不過，唔係隻隻盈喜股都升，中煤（1898）就畀「摩笛」吹跌。追盈喜股前，記緊留意市場睇法。揀股向來要睇盈利、派息等，揀有業績或盈喜支持嘅股份始終係王道。盈喜股通常消息一出即炒高，炒一陣又回調，所以冇貨唔緊要，可趁回吐吸納。上述26隻倍賺盈喜股，包括吉利（175）、舜宇（2382）等強勢股，不妨候低吸納，例如高位調整一成。港股連續21周錄得資金淨流入，北水一直掃貨。睇近期滬深港通資金流向，大戶正在收緊A＋H股差價，部份內銀、內險A股出現淨賣出，相關H股則出現淨買入。北水已成為港股主流動力，冇被納入滬深港通範圍嘅股份，變晒蜑家雞。喺倍賺盈喜股中，兼俱A＋H股及滬深港通概念嘅有5隻，包括中石油（857）、海螺水泥（914）、中煤、濰柴（2338）、新華製藥（719），當中3隻嘅A股更喺「入摩」名單上，就係中石油、海螺、濰柴，我嘅心水係預告中期多賺90%至110%嘅海螺。內地水泥價格由舊年3月起低位反彈，皆因基建投資及房地產投資回升，為水泥帶嚟穩定需求。多隻水泥股已先後發盈喜，包括華潤水泥（1313）、西部水泥（2233）、中材（1893）、台泥（1136）、亞洲水泥（743）等。海螺作為行業龍頭，自然睇高一線。該股現價28.25元，走勢上，呈現區域突破利好訊號。
割柑人本欄逢周四刊出
來源:
http://hk.apple.nextmedia.com/financeestate/art/20170727/20102419