【黑面代表】嘴藐藐/眼睥睥/似色魔 三大黑面王：我都唔想！
1 :
GS(14)@2016-10-10 16:15:15發吽哣時個樣寸寸貢我都唔想。
香港人出名黑面神上身，木口木面黑口黑面燶過鍋撈，眼神一睥，彷彿「全世界欠咗佢。」成日俾人問候：「你是不是不開心？」、「你是否有心事？」、「你是否不耐煩啊？」吓？我發吽哣咋喎！天生扁嘴、單眼皮、唔夠瞓、多咗幾條皺紋我都唔想，平時心境澄明一片空白，絕無藐嘴藐舌之意。你都係？I-know-that-feel-bro.jpg……
我們冤枉心情有誰知？聽聽佢哋點講？
蔡穎恩（Evelyn）：「我都係入咗行先俾人話黑面。」佢從來唔覺自己個樣黑，頂多因為一雙扁嘴，低頭打機、收工發呆諗吓點返屋企時，就有唔熟嘅人就走來問：「你唔開心呀？」佢先如夢初醒地：「吓？」真係冤枉。新加坡來的模特兒廖子妤（Fish）更慘，看她com卡同工作造型照，沒多少張是笑的。「由我有意識我是我時，已經被人說我黑面。」拿出童年照，兩個妹妹都是圓碌碌杏眼，偏偏她的一雙單眼皮遮住半對眼，怒目向鏡頭。「細個時啲大人總覺得我在反抗，唔乖。」人大了雙眼變圓了一點，但放鬆時仍是「加菲貓眼」格。偏偏獨立寸樣內藏敏感靈魂，好介意別人怎看她。成日驚「對眼皮」得罪人，「對住剛認識的人，我會盡量多笑，表現親和力。但耐咗要繼續keep住成日笑，就覺得好攰。」說時反白眼，膊頭都塌埋，「算啦！你哋覺得我好難相處我就難相處啦！我滿足你期望好了！」自我放棄mode。二人嘴裏說別人說甚麼管不了，但要Evelyn重演二人剛識時，Evelyn扁嘴打機，讓Fish誤會自己惹怒Evelyn一幕卻耍手擰頭，怕惹來不必要傳言，呢個樣，真係令人小心翼翼。
女人黑面惹是非，男人如邱福龍，皺眉、霸氣，會好些嗎？
「啲人以為我好難相處，個樣惡吖嘛！」趕緊稿的他，埋首滿枱畫稿中都做訪問。忽然抬頭：「柴灣球場色魔有個拼圖，他們（fans）貼facebook，話似我喎！」睇過，最似咪個木口木面樣同對法令紋囉！（好似係）有次他通宵工作後開車，狀態不佳影響到後面的貨車，大隻佬貨車司機而就氣沖沖走來，大力拍了下他的Benz車頭。當年all back頭造型、未瞓醒的邱福龍皺住眉，動作遲緩地抬頭看他，「那人忽然退後一步，哈哈，好像被我的外形嚇了一跳般。」大隻佬收火，聲音溫柔地抱怨幾句，邱福龍：「粗口都冇呀！好好笑！可能佢以為我好有錢，唔知係乜人咁。不過其實真係我錯，我抬頭係想同佢講對唔住咋。」黑面樣真係我都唔想，惟有時刻提醒自己保持笑容，講嘢溫柔，Evelyn已經懶理，Fish嘴裏說不身體卻很誠實，時常留意身邊人眉頭眼額，訓練出觀人於微的心，邱福龍得啖笑，「我從來都唔覺得自己係黑面神。我又講得笑，又咁好笑容！」然後咪眼戚嘴親切地笑容，有啲生硬，唔識佢嘅確有啲起雞皮。記者：陳慧敏攝影：陳健邦
Evelyn嘴扁扁，唔出聲低頭玩手機時，身邊彷彿多了一道謝絕打擾的磁力磁牆。佢話，幻覺嚟嘅啫！
表情成個「阿憎」咁的Fish，其實儍吓儍吓，佢話：「你哋係咪有句話：『唔識你就俾你嚇死，識你就俾你笑死？』啲人成日咁話我。」
Fish（中）從小一雙單眼皮「加菲貓」眼，但兩個妹妹就眼碌碌，令大人誤會佢玩對抗。
Fish的工作照，大部份都唔笑。
邱福龍自稱好鍾意講笑好好笑容，一啲都唔惡。
他出名畫漫畫時，自己擺甫士，漫畫裏運晒勁的兇狠chok樣，模特兒是他自己。
未開始訪問時，他這個表情跟助理說話，我以為佢心情唔好，助理們則一臉天真：「吓，冇呀！佢一啲都唔惡喎！」熟悉的人，就不會為幾條表情紋所惑。
「柴灣球場色魔有個拼圖，他們（fans）貼facebook，話似我喎！」大家高興得啖笑，邱福龍話冇所謂啦。
邱福龍童年照，天生呢個樣，連個女都天生皺眉，佢無奈：「咁都冇計。」
來源:
http://hk.apple.nextmedia.com/su ... t/20161010/19796014
【爆相爆片】戴情侶黑超 藐藐嘴男友即投降苟姑娘孖陸漢洋揀禮物見家長
1 :
GS(14)@2017-02-05 10:48:26【拍拖買餅】■苟芸慧日前與男友陸漢洋戴着黑超現身太古城百貨公司買曲奇餅，為見家長做好準備。讀者提供圖片
苟芸慧去年8月被傳跟錫礦大王陸佑後人陸漢洋撻着，惟她一直拒認戀情。不過日前本報讀者發現戴情侶黑超的苟姑娘與陸漢洋到太古城的百貨公司買曲奇，男方揚言買來送給苟姑娘家人，但苟姑娘不肯揀，更藐嘴撒嬌令男友即時投降。苟姑娘父母早前由加拿大返港，估計陸漢洋買曲奇向女友父母拜年兼見家長，二人看來好事近。
現年33歲的苟芸慧，近日不但成功減磅重奪「索苟」之名，離開無綫向外闖的她，早前更憑一輯惹火床照而人氣再升，加上跟馬來西亞錫礦大王陸佑後人兼賽車手陸漢洋（前名陸恭和）蜜運，苟姑娘絕對是人逢喜事精神爽。儘管苟姑娘去年8月被爆新戀情後，多次被本報撞破二人拍拖，但兩人一直未肯承認戀情。日前，陸漢洋又被發現孖住苟姑娘到百貨公司買賀年禮物拜會女友父母，二人關係似乎又邁進一大步。
【戀情曝光】■去年9月苟姑娘與陸漢洋被本報發現到西九睇騷，其間陸漢洋還熱情錫錫女友。
【有米車手】■陸漢洋是富三代及賽車手，因為賽車而跟苟姑娘撻着。資料圖片
掃日本曲奇
讀者梁小姐透過本報「爆相爆片」報料，指日前中午12時許在太古城Apita百貨公司見到苟姑娘與陸漢洋現身，苟姑娘打扮樸素，跟穿上迷彩衫的陸漢洋齊齊戴着黑超逛百貨公司，讀者梁小姐說：「我睇緊啲日本糖果，突然見到個女仔好靚，望真啲原來係苟姑娘，隔籬嗰位應該係佢男朋友。聽見個男仔話買嘢送畀屋企人，係咁話：『買啦、買啦！』但苟姑娘就唔肯揀，藐咗個男仔一眼，之後個男仔就話：『算喇，我揀！』」梁小姐透露二人最後買了兩盒日本年輪曲奇，每盒售價330元，由陸漢洋付款。由於苟姑娘父母近日由加拿大返港，估計陸漢洋今次準備買賀年禮物到苟姑娘家拜年，並趁機拜會未來岳父岳母。記者昨日致電苟姑娘求證，問陸漢洋是否買曲奇向她父母拜年時，她說：「嗰日我哋一班朋友團拜，因為William（陸漢洋）同一班朋友搞緊紅十字會捐骨髓個campaign，佢早少少搵我商量仲搵乜朋友幫手，希望大家新年做一件好事。佢咪順便陪我去買嘢，因為我鬼妹仔唔知買乜去朋友度。」
■苟姑娘隻身來港發展，偶爾在社交網貼母女舊照。微博圖片
■苟姑娘09年當選國際中華小姐冠軍而入行。資料圖片
公開護女友
苟姑娘去年被傳做小三介入陸漢洋與無綫前主播張頌恩戀情，其後陸漢洋維護苟姑娘，指早年已跟張頌恩分手，自己從未試過一腳踏兩船。苟姑娘與陸漢洋去年9月和10月亦兩度被本報發現甜蜜拍拖，二人繼到西九睇騷時錫錫外，去年10月陸漢洋43歲生日，苟姑娘更以勝利者姿態為男友慶生。採訪：嵐山
來源:
http://hk.apple.nextmedia.com/entertainment/art/20170204/19917158