教育，一向是香港人最具爭議的命題。2012年適逢龍年，加上當年港府仍未全面叫停雙非，這批應當如珠似寶的龍仔龍女，開始要面對殘酷的現實——爭學位。本刊訪問多個龍仔家長及補習社，發現這批只是K2的小朋友，現已開始為小學面試準備，有家長激動指：「學校都唔收六月後出生嘅小朋友（細仔）呀！」補習社為爭奪這批客源，各出奇謀，有教法文、西班牙文的，玩「另類」；有將幼兒班數學課程分為八級，推出證書的，玩「專業」。幼兒補習的內容，已到千奇百趣的地步。 面對龍年加雙非，新界北區爭靚學位的情況最嚴重。在天水圍及元朗區開辦四間補習社的Michael，本身亦有一位龍仔。他兒子在五月出世，九月準備升讀K2。他笑指早前電視節目「贏在射精前」的言論一點都不誇張：「天水圍區大約有二十間幼稚園，我個仔年中出世，都要申請超過八間以上嘅幼稚園先有學位。我聽過年尾出世嘅，要申請十間以上先成功搵到間。」他解釋，年頭出世的小朋友，有較多時間發展，面試時確實有利：「個優勢要喺小學一、二年班先無咁明顯。好嘅幼稚園，就會想收一啲比較容易學習嘅小朋友，易教啲。其實由交表嘅一日，幼稚園知道學生出生日期，佢哋已經心中有數啦！」 要識水獺的英文 有小朋友在年尾出世的家長，就向Michael反映，他們都不願意讓子女遲一年才報讀幼稚園，令起跑線set得更後，而解決方法只有一個：就是先報讀較差的幼稚園，再加強力度催谷仔女：「佢哋會報多啲興趣班、學習班，始終小學睇小朋友讀邊間幼稚園之外，有無各類證書都好重要！」而Michael亦坦言，八年前開始補習班生意，原因之一就是想了解現時教育界的情況，為仔女做足準備：「我而家幫個仔報咗游水、畫畫同英文拼音班，每個月都用咗二千幾蚊。本身補習班主攻數學，呢度就可以幫到佢啦！」他指出，內地家長對仔女的教學問題，與港媽一樣「咁緊張」：「內地家長唔願意報讀大陸幼稚園，可能辛苦啲，見過佢哋包架旅遊巴嚟幼稚園上堂！」 八級幼兒數學課程 為了應對「龍B潮」帶來的商機，Michael以五位數字，引入了德國的數學教材，打算在九月新開的課程使用。最新的幼稚園課程共分八級，由一至十順序，到睇時分，暫定每一等級有十二堂，每級通過後都有認可證書，方便家長「儲cert」。而四堂費用暫定為六百元，價錢與中學課程相若，但仍吸引不少幼兒家長查詢及報讀。他透露，近年幼稚園的面試題目已愈來愈深，有時更考起家長：「除咗認顏色，仲要認動物，好似水獺嘅英文（otter），小朋友可能連見都未見過！但因為外國英文書有，學校都會拎嚟問小朋友。」 分娩一刻準備競爭 「爭學位」問題在新界區嚴重發酵，這類競爭在港島區亦不遑多讓。根據數字，二○一二年龍年出生，並預計二○一八年升讀小一的人數，是六萬七千五百人，而今個學年資助或官立小學的小一學額，是四萬八千四百多個。面對一八至一九學年的高峰，教育局只表示會暫時「加派」學額，未有長遠計劃。在港島區居住的「龍媽」Paroni及Phoebe，皆指面對直資小學學位「爭崩頭」，不少一條龍的幼稚園成為家長的首選。有不少學生手持一、兩間小學的入場券，以「試吓無妨」心態報讀直資名校，令爭學位更激烈。兩位龍媽表示，子女都是在十二月出世，在醫院生產時已發現很多媽媽同時分娩，當時已有思想準備，要面對之後的競爭。其中Phoebe報幼稚園時吃了不少閉門羮：「有幼稚園同我講，你唔使遞form啦，都唔使交報名費，因為我哋完全唔會接納（細仔）。」她更聽過有家長用郵寄方式交申請表，不久就「彈票」拒收，她最後亦報了八間幼稚園才成功讓囝囝入學。囝囝將近入讀K2，她亦開始留意小學面試，她坦言除了自動派位，亦希望獲得直資小學面試的機會：「下學期就開始報名，證書都要喺嗰時準備好。好似今個暑假，都開始報興趣班，游水、踢波，都有四、五個，唔想浪費時間！依家都搵緊啲語文課程，因為面試時可能要全用英文對答！」她預算每月花費三千元，為囝囝報讀興趣班。 過來人貼士 另一家長Paroni，就因為其龍年細女，選擇家姐曾入讀的幼稚園，不用四圍撲報名，但她仍決定讓細女遲一年入學，以避過「細仔」的弱勢。由於大女正就讀聖保祿學校，細女報讀可獲加分，情況看似較為輕鬆，但她看得出近年收生要求收緊：「往年有哥哥姐姐讀，基本上係必收，但到囡囡嗰年已經未必。」對於有不少家長為催谷子女，不斷報讀興趣班，Paroni就以過來人身份指，能否入讀心儀小學，面試表現才是最為重要：「有無信心？會唔會怕羞？係唔係簡單答到英文問題？係最重要。呢part訓練好嘅話，面試班都未必係必須，因為最緊要都係肯答。」她指身邊有不少朋友報讀超過八個興趣班，但認為根本沒有必要：「我自己好重視閱讀，一定俾個女睇好多書。我幫大女都只係報三、四個興趣班。我唔認為報得多，（面試成功）機會就大咗，都係睇個別小朋友。」 當頭棒喝 「法語、西班牙文、中樂、豎琴、禮儀，依家真係乜班都有，家姐嗰幾年拎住呢啲cert，就好似好值錢，好巴閉咁。但依家好多機構知道有用，個個都去搞音樂比賽，已經去到人有我有。其實依家學校最重要都係睇臨場表現，同埋家長放幾多時間俾仔女。」Paroni就指，當時大女做的Portfolio（個人檔案）不算「豐富」，但因證明到親子關係良好，最終獲得取錄：「我同佢喺公園搵昆蟲，影咗啲相俾老師睇，學校係會好appreciate（欣賞）。」Paroni坦言，現時社會物資充裕，入學環境都很難與自己小時候比擬，惟有盡量提醒自己：「依家小朋友三、四歲就要去比較。我自己都成日提自己要抽身，唔好太在意，我見好多朋友都報好多興趣班，我有時都會諗係唔係需要。我都好努力咁講唔好去比較，免得我又辛苦，小朋友又辛苦。如果因為咁就無咗童年，就好唔值得。」 撰文：梁延宇攝影：李育明、翁少陽攝錄：關永浩、李育明、翁少陽[email protected] | ||||