2010-6-24 AD
| ||||||
| 世界盃都未踢到 16強，但賭波界別嘅「雷米金盃」得主已經提早誕生，佢係邊個？咪股神畢菲特囉！佢老人家仲要係憑住令好多人輸錢嘅法國隊贏大錢，真係賭波都要講命水！ 咁 股神係點贏嘅呢？話說乜都賭一餐嘅股神，佢檔巴郡響3月嗰陣賣咗一張保單，內容係如果法國隊捧盃，佢哋就要賠錢畀個客，而佢曾經同CNBC透露，大概要賠 3000萬美金o架！ 不過，佢就唔肯披露呢個客仔係乜水，o依家法國隊「衣錦還鄉」，股神亦將啲錢袋袋平安啦！唔知股神會唔會喺下封畀股東 嘅信，爆吓呢個輸客係邊個呢？ 至於邊條「o靚」咁醒幫佢老人家賺大錢，之咪係保險部負責人Ajit Jian囉！根據股神向佢班信眾介紹，呢位AJ就係之前幫佢開盤，賭大學籃球比賽可能停辦、百事可樂贊助嘅比賽可能要派彩10億美金等等嗰位仁兄，有啲非 常大又唔尋常嘅事需要投保嗰陣，只需要撥個輪畀AJ就得……原來係「犀利哥」，失覺失覺！ 話時話，華華認為股神其實唔只贏咁少o架！如果佢 同我哋成龍大哥賭「巴塞」捧唔捧到世盃，直頭揭幕禮未開始都有錢收啦！ 李華華 [email protected] | ||||||