多得王維基質問高官，「你們知道《100毛》嗎？」 這本林日曦有份創辦的雜誌最近儼如「年輕人標本」，被老餅們拿着放大鏡檢視。 「好娘呀！唔好呀！從來都話，你想一個潮牌死，就搵班阿伯著住佢嘛，而家個個老嘢喺度講《100毛》，即係out咗啦。」差點沒抱頭痛哭，「希望佢哋快啲唔睇。」 五年前因商台工作納悶想「搵啲嘢搞」，跟同事陳強、阿Bu每人夾二千蚊就印了第一期《黑紙》，一張紙的黑色批判，語不驚人死不休。 後來的《100毛》較單純，「只想氹吓香港人開心。」有人主張 「Stop making stupid people famous」，媒體應冷處理偲嫣BB、薑蓉等跳樑小丑，林日曦卻「Keep making stupid people funny」，「面對呢個香港，唔笑多啲，真係好難捱。」 兩年前《明報》老闆張曉卿入股，以一百萬換來一成股份，「佢當跌咗個毫子啫。想了解吓年輕人諗乜啩。」 他把招廣告和會計工作都交給《明報》系的萬華媒體，專注創作，連銷量都說不太清楚，「呢個時代搞雜誌，無死就係成功。」 「黑紙有限公司」不但無死，還愈來愈人強馬壯。由三人行的創作單位，長成一間二十人的公司，出版《黑紙》和《100毛》，也接廣告企劃、拍MV和宣傳片等。關於萬華入股，他談起來卻興味索然。「你哋寫到件事好紅咁，一開口就問我張曉卿。」他沒好氣，「其實唔關佢事，我哋都未見過佢。係萬華CEO Patrick Lam（林栢昌），佢就咁email嚟話見到《黑紙》，有興趣合作。」其實黑紙已拒絕過其他投資者，但萬華是同行，旗下刊物形象也相對中立，他們覺得可以一試，「兩年前《黑紙》叫做有啲聲勢，佢可能覺得認同、覺得有可為，咪入少少股搏吓。你問點解一百萬佢會肯？我哋唔特別好賺，但都唔算失敗。我估對佢嚟講，好處是佢哋現有刊物冇嘅目標讀者，我哋識做囉。」 坐在那裡邊嬉笑邊工作的，都是廿來三十歲的年輕人；八○年出生的林日曦，全公司最老。「《100毛》的內容都交晒俾廿幾歲的同事寫，我只比較緊張個封面。」《黑紙》批判社會政治，辛辣諷刺；《100毛》做娛樂消閒，是甜品，「最初係咁定性。但後來後生同事覺得講政治都好好笑喎，仲好笑過王祖藍，我們就由它這樣發展。」貫徹始終的，則是那種反老餅、反權威、反賺錢至上的邏輯，「其實你份人係點，做啲嘢就係點o架喇。」 出竅 他自言讀書時已反建制，「上學主要活動就係瞓覺，唔知點解咁眼瞓。」住大窩口邨，小學成績不錯，升到葵涌名校林護中學。「點知第一年就留級。」之後愈發反叛，「叫我交功課我唔交，叫我考試我瞓覺，話考試唔准瞓覺我就嘭門走。學校管我唔到，阿爸阿媽又管我唔到。但其實渾渾噩噩，唔知自己想做乜。」升不到大學便去IVE讀設計，「以為讀設計之類就型啲囉。」第二年卻輟學，「真係好記得嗰日。我如常地等巴士返學時，突然間覺得自己好渣，做設計又唔夠同學勁，咁我讀完又如何呢？」從此沒再上學，也沒找工作。那年他廿二歲，一年看三百幾套電影，又愛上填詞。「細個唔知啲歌詞講乜，但那時突然覺得，咁勁嘅？林夕、Wyman的詞，真係好勁。」自己不期然試着填，「填廣東歌詞好難。每次填詞就非常專注，乜都唔諗，淨係focus在首詞度，是非常講求毅力的工作。但當你完成到就有好大滿足感。」填好他會放上網交流，從中認識一些音樂人，幫他們填demo，「令我這個對文字完全無興趣的人，會主動去睇書、研究，都幾影響我之後的路。輟學真係好事嚟。」 拍門 他至今只打過一份工，在商台待了九年。○三年尾、輟學一年後，朋友介紹他去商台網站工作。○四年，商台籌備網上論壇，林日曦忙了好幾個月，推出後聽眾熱烈留言；網絡世界當然有讚有彈、也有謾罵，十幾日就被管理層下令關閉。「上司同我講要停，我成晚都瞓唔着，唔知點解咁在意。可能擺咗好多心機落去，加上覺得依個係電台未來應該行的方向。網就係咁o架嘛。但當時大家仲有傳統包袱，認為主持人唔應該俾你咁樣攻擊。」翌日他晨早八點返公司，那時他的座位剛好在俞琤房門口。「我知道佢都早返，一見佢返嚟我就同佢講，我係咩部門嘅邊個，我覺得個forum唔停得。」俞琤掃他一眼，叫他入房，然後自己篤手機；林日曦愣在旁不知所措，看着俞琤打了幾個電話，「Multi media有個同事叫阿Roy，佢話個網站唔停得喎，你上來傾傾。」沒多久，全部商台高層來到，「佢哋都覺得我好怪o架喇，死僆仔，做咩事啫？其實繞過自己上司去講，係唔恰當。但我知道啲上司唔會同俞琤講。」惟有硬着頭皮講出理據。高層們各自表述意見，俞琤總結，「咁啦，不如會員制，令留言的人負責任啲，準備好先再開番啦。阿Roy你滿唔滿意？」那刻他當然見好就收，「走得甩囉竟然！」後來他又選了一批自覺填得最好的詞作，印出來放在俞琤案上。「好天真咁諗，我想入行做填詞人，如果我真係得嘅，佢或者會幫我。」結果俞琤又不動聲色，叫他多印十份，轉發給其他高層，包括林夕。他沒有立刻成為職業填詞人，但俞琤把他由文職轉去創作部門，「也將我成個career path轉了。」881、903都做過，主要是幕後，○七年起在商台社企「天比高」帶年輕人做創作。 長幼 林日曦一張撲克臉，任何人見到都會認為他不可一世。「覺得啱，咪講囉。當然講時要有禮貌。但唔好同我講咩你食鹽多過我食米，唔好同我講經驗，要講道理。啱就係啱，無話你有經驗就啱啲。」討厭恃老賣老，但真有料到的前輩，他很尊重。訪問中他不只一次提到俞琤的身教，「佢唔只ban你橋，佢會真係同你度，然後佢第二日返嚟又度咗啲新嘢，再ban番自己尋日嗰啲，嗰種唔放棄、一定要度到最好的精神，對我影響好大。」○七年起林日曦開始發表填詞作品，至今近百首；林夕在他初入行時也常提點他，「我最欣賞是他的毅力。出街那份歌詞多數都係自己唔鍾意的，因為多數都係俾人彈鐘後的第二、三、四稿嚟。但第一稿你已傾盡所有精華落去，要改，總帶住晦氣怨氣去改，通常寫得唔好。但林夕可以寫到第八稿，都繼續追求再寫得好啲。」在天比高他是年輕人的前輩，小心翼翼不想成為老屎忽。「天比高在天水圍，係間製作公司，又係社區中心。接外間嘅job，俾有志創作的年輕人邊做邊學，而作品真係會出街。」五年間他做到創作總監，「但作為mentor，自己覺得唔稱職。因為創作就係你用自己的方法去做，我share唔到任何經驗俾佢哋，經驗即係包袱，係廢嘅，我不如做好自己先啦，我都需要邊做邊學。」二○一二年他辭職，全力做《黑紙》。 賺蝕 《黑紙》是○九年他和陳強、阿Bu在商台工作時構思的，打工仔交的作品總不能百分百盡如己意，決定工餘再經營一個表達的媒介。二○一○年一月一日，他們每人夾二千元，印了第一期《黑紙》，自己開車送到kubrick、GOD等七個售賣點，主要是文化場地，定位較小眾。最初沒明星封面，內容是一句句精煉的「黑句」，依每月主題發揮，「懶幽默、懶感性、懶批判咁囉。」本來印了二千張，很快就要加印，「最後好似賣咗萬幾二萬張。」一頁紙的雜誌，令人耳目一新。「一來想做啲無人做過的事。二來這個世代的年輕人睇長文能力有限，仲搞print media仲叫人睇字的話，一定要短、好輕巧地睇得完。」頭兩年每月一期每張一蚊，收支平衡。一二年轉為每週一期、免費派二十萬張，想靠廣告收入，「完全失敗，唔夠廣告。過咗幾期即刻同讀者沙冧，印少啲，賣番一蚊。」同年林日曦辭職，接更多廣告企劃工作，有時也靠這些收入幫補《黑紙》出版。他一再強調自己不懂經濟，好怕數字。「曾經有財經雜誌訪問我，首先我話佢搵錯人啦，我到三十幾歲都無買股票無買樓，真係唔識。問我《黑紙》賺定蝕，我話，OK啦，賺少少。但佢糾正咗我，原來要計埋人工，嗰陣我都無支過人工。如果咁計，應該係蝕的，但可以維到生，唔使死囉。」去年再辦《100毛》，一樣是計落「唔使死」就去。「我哋預咗四至八期的資金，即係個幾兩個月，可能幾十至百幾萬啩，我唔記得囉。前輩或者朋友都話我哋黐線，太少喇，起碼要有半年或者一年啦。但我哋覺得，至多咪蝕到第二個月執咗佢。」他們請了幾個員工，「佢哋都唔知咁危險o架，俾人呃到而家，咪好彩囉，無事。」現在《100毛》印八至十萬本，通常賣出八成，賺定蝕？他照樣不懂答，「總之大家有糧出啦。我係盡量避開唔睇，一睇數呢，就好易返去啲大人嘅思維模式。我哋想唔好講錢住先，講咗點樣做好、做啱件事先，呢個係同資本主義相違背。」 古墓 他的生活也好古墓派，辦潮流雜誌卻害怕上網，覺得資訊疲勞；不交際應酬，平時不在公司就在家。家也要靜，這些年住過西貢、粉嶺、元朗村屋，現在住屯門龍珠島，要花十幾分鐘行一道堤壩才出到黃金海岸；家中謝絕探訪，因為有潔癖。近兩、三年每日要交報紙專欄，他每朝清早五點起身寫。討厭人遲到，自己也不會遲。他認為要自由，先要自律。公司盡量少規矩，「一有制度即係唔人性化，我哋想盡量逐個逐個人睇。呢位同事自律嘅，咪多啲自由，唔使理佢返唔返公司、遲唔遲到；有啲人分內事都無做到，咁就要過問多啲。」請病假也不用交醫生紙，「佢唔覺得公司係地獄，咪唔使詐病囉？我哋都未做到，但會嘗試改變。」他與另外兩位老闆都年過三十，「好老喇，要多啲俾後生同事搞。年輕人可能睇得少過你，但佢睇得啱過你。可能佢睇得窄過你，但佢睇得集中同埋透徹過你。我覺得唔需要train佢哋嘅，佢哋train返我轉頭啦。」 | ||||
近日四大會計師行（Big4）之一的畢馬威（KPMG），因懷疑有部門會就員工遲到每次罰款一百元而鬧得滿城風雨之際；同是會計師出身，於澳洲生活過八年的阮詠珊（Stella）雖未面對過如此刻薄的條件，但也深明香港的打工仔難撈。 「香港嘅工作氣氛係要準時上班，但遲收工、超時工作卻好應分，就算已經完成晒手頭上嘅嘢，都唔好意思準時走。」 她在去年養了一隻魔天使狗仔後，更感到生命中有很多事情是重要過工作。 「唔希望佢一日十幾個鐘自己一個唔知做咩，所以開始諗可唔可以有份工係俾到自己自由度去對住佢。」她因此毅然辭去正職，創立了Healthy Little Paws 腳板仔鮮食主義，把因一手一腳照顧狗仔研製而成的鮮食磚分享出去。產品的受歡迎程度終令家中廚房不勝負荷，促使她於今年建立了工場，真正完成了帶着「愛兒」上下班的小小夢想。想同「愛兒」糖黐豆 「記得有次，我返工時睇屋企個cam，見到MorBB佢反白眼又郁都唔郁，嚇到我立即雲端開電腦整啲聲出嚟，睇吓佢有無反應。」廿八歲的Stella繪影繪聲地說起，此雖然是虛驚一場，但令她立下心腸，誓要花更多時間照顧及陪伴MorBB。訪問期間，只見Stella不時忙碌地處理食材，不時又難敵「愛兒」苦苦哀求而一手抱起牠，連中午食飯也帶牠到設露天座位的食肆一起用餐，畫面比情侶更痴纏。「之前一直唔敢太用力宣傳公司，因屋企個廚房已經逼爆咗，到後來真係頂唔順，終於上咗工廠，可以大量生產，依家一個月可以生產到六千至八千磚。」說是主人，不少港人愛錫毛孩的程度其實直逼「家長」，應接不暇的訂單令Stella勇敢擺脫自家小型製作的形式，量產鮮食磚。 而自製鮮食的念頭，正是出自「愛兒」心切。「啱啱帶佢返嚟，發現佢有淚痕、口臭同埋消化不良等問題，好擔心。」Stella於是在飲食着手，發現狗仔情況在不吃乾糧，改吃她親手下廚的食物後有所改善，她更找上當營養師的妹妹阮詠雯（Mandy）給予進一步意見，擔當其產品顧問。「鮮食同乾糧嘅分別，就好似人類係食罐頭定係新鮮煮出嚟嘅食物，罐頭可能會加防腐劑、添加劑或味精，令狗仔更鍾意食或更快食完。」Mandy一語中的地說。但狗仔所需的營養組合，卻跟人類有所不同，「最唔同嘅係人類主要嘅能量來源會喺碳水化合物如飯身上，但蛋白質，或者肉類等反而先係狗仔主要嘅力量來源。」目前店內有五款鮮食磚，每款均有一款主要肉類如豬、牛及魚，再配搭十多款食物如蔬菜及豆類，較「估佢唔到」的有小麥胚芽油、蛋殼粉、豬肝及生蠔，以確保能提供足夠的微量元素。 首創磚形鮮食棄生肉保安全 一般鮮食的做法，也是把相關食材切碎，再混合成一體，形態較偏向糊狀。「狗仔其實好醒，食多幾次後識將啲菜挑番出嚟，而且糊狀多多少少都有汁，次次都食到佢哋成面都係。」為了把所有食材重塑為一個固體，Stella用了兩個月時間研發出香港首創的磚形鮮食，解決了毛孩們的偏食問題。「食物所含嘅水分都唔同，所以要分階段加入打碎，而我哋用低溫慢煮嘅方法，逼出多餘水分，令食材結合為糕狀固體。」一直把狗仔健康放於首位的Stella，卻因為食品安全問題而作出了抉擇。她笑指以往在澳洲，常見有主人親自到農場購買新鮮斬下的肉髀，當晚就會製成生的鮮肉給寵物吃；無奈香港缺乏此等條件。「研究顯示，生肉對狗仔嘅腸胃係較有益，但因為香港生肉嘅入口過程較繁複，加上天氣熱，出問題機會比熟肉高。」而鮮食磚全都經過煮熟，只需解凍便可進食。 定價接近優質罐頭價格有利有弊 鮮食磚現時月售雖然可達五至六千磚，營業額接近十萬，但Stella坦言利潤仍是較為微薄。「一開始係希望定價為廿四蚊，最後決定十八蚊為推廣價嘅原因係唔想買開乾糧嘅客人由每個月二、三百蚊，一下子變成千幾蚊咁大差距。」市面上的優質罐頭，某些定價已提高至十多元一件，Stella希望這群主人願以差不多價錢轉購鮮食磚。定價低，也暫時窒礙了她跟寵物店的合作。「依家個價係賺好少，如果我哋同鋪頭或經銷商合作，喺分成方面會出現問題。」未想加價，惟有繼續擴展網店，未來更會研製狗仔湯粒，增加貨品款式。由打工仔榮升為老闆，Stella沒忘卻當初在香港職場所感受到的困惑，訪問當天准許因忙於準備寵物展而辛勞了數天的員工可晚點上班。「喺澳洲時可能係我幸運，佢哋着重結果較多，唔會在意你用幾長時間或係咪一定要超時工作，只要你完成就得，佢哋無咩所謂。」她抱着如「貼身膏藥」的MorBB，從容地說。 開業資料（16年9月） 租金上期：$14,000 按金：$42,000 裝修連機器：$120,000 網店設計：$40,000 總投資：$216,000 營業資料（17年5月） 營業額：$99,000 入貨（材料）：$40,000 租金：$14,000 薪金：$18,500#廣告：$2,500 快遞開支：$4,000 包裝：$2,000 雜費：$2,500 盈利：$15,500 #一個全職、一個兼職 寵物營養師可以點入行？ 今年廿五歲的Mandy成為了註冊營養師只有一年時間，但她指自從養狗後就開始關注寵物營養學，留意到香港缺乏相關的資訊，相反外國已有很多寵物營養師。因此建議有意之士可加入有關平台，參考已有權威認證的資料，並以此入門。•寵物營養學暫未有一個國際的統一標準。•可加入國際組織交流意見，例如是美國獸醫營養協會（AAVN）。•需具備營養學背景或獸醫等專業資格才能申請。•以年費形式成為會員，可定時收到該會發放最新的報告或重要案例。•會獲得協會內的專業人士聯絡名單，可就題目或範疇索取意見。 撰文：黃綺敏 攝影：林志謙、關永浩 | ||