|
||||||
|
復地 （2337）舊年3月整咗個5億元人仔私募基金發展成都南京項目，唔夠一年，南京項目就已經受到「關注」嘞。內地媒體近日發現，復地「朗香別墅」項目嚴重 破壞省級文物，就連央視國際網站都有報道，仲有相為證，睇到好哋哋一個「明朝功臣墓葬區」，o依家只係剩番兩塊碑，怕且當局都有排解釋嘞。 話說墓區係700年前明朝開國將軍沐英嘅墓地，沐氏歷代王公子孫都葬喺呢個山頭，所以座山都叫「將軍山」。而復地嘅朗香別墅就正正圍繞呢堆墓群施工。沐氏後人指當局唔理佢哋嘅投訴，挖掘一直未停過，早少少嘅相都仲見到墓地沙塵滾滾，近排就只係得番兩塊就嚟企唔穩嘅石碑。 據講，朗香別墅標價每套840萬蚊人仔，公司網站話舊年5月推出12棟別墅，即日就賣出一半。 事實上，南京文物局已經急急出嚟澄清，話會按規定保護文物，沐英墓只係暫時移出，將會回歸原位……但係睇番相入面嘅破壞程度（圖），又真係好難令人相信係有計劃、有安排嘅修葺行動喎！ |
||||||