拍過五次拖 失戀喊足一星期周嘉儀主播的秘密感情生活
1 :
GS(14)@2015-04-30 09:03:04■周嘉儀深情剖白感情世界，大談過去鮮為人知的戀事。攝影：陳順禎
前無綫美女主播周嘉儀，稱得上宅男女神，即使被爆曾跟有婦之夫許方輝有過一段曖昧之情，嘉儀回應是非時如止水般冷靜，但原來百毒不侵的女神背後也有死穴！日前嘉儀接受本報專訪時，大爆她過去五段絕密情史！早前錯愛許方輝更令她吸取教訓，情路跌碰以後，女神惟有繼續靜待其Mr.Right的出現。撰文：羅慧敏
感情篇：身邊男仔朋友多
記：記者 周：周嘉儀記：拍過幾多次拖？周：一隻手數得晒，五次咁上下。記：你嘅初戀發生喺幾時？周：係讀大學嘅時候，嗰陣20歲。記：咁遲先初戀？周：因為我中學讀女校，都冇乜機會識到外面嘅人，到year2，都算好遲，拍咗3、4年，係最耐嘅一個。記：因乜事分手？係咪好傷心？周：可能累積落嚟，耐咗悶咗定係性格不合，都唔知歸根究柢係乜原因，總知係好傷心！喊到儍咗，因為未試過覺得好慘、天冧落嚟，因為乜嘢都好習慣，每一個禮拜有個生活模式，嗰吓覺得好接受唔到，都傷心咗好耐，成個禮拜都匿埋喺床度喊，同埋我唔食嘢，skip咗好多餐晚飯，嚇死我阿媽，嗰陣唔知點解仲狂游水，一日落去游三次水，覺得游水係好放鬆，可以減到壓。
■周嘉儀與無綫新聞主播許方輝大前年被爆關係曖昧，二人立即被公司雪藏。
■上月結束11年的主播生涯，周嘉儀現已轉職證券公司女強人。
記：之後幾段感情都好平淡？除咗同已婚無綫新聞主播許方輝嘅一段情……周：唔……唔……唔好講啦！過咗去都唔想影響到其他人。人生當中發生咁多事，每樣嘢都總有學到嘢、有得着嘅地方。記：算唔算係一個教訓？周：都係嘅，當時我屋企人同埋一啲愛錫我嘅朋友，喺我人生最低潮時畀到好多support我，呢啲朋友真係刻骨銘心，亦都學識點樣喺低潮嘅時候幫自己搵出路，呢樣好緊要，一味頹落去都冇用，只會越嚟越沉，你要諗吓之後條路點行，嗰吓我真係咁多年嚟，真真正正諗吓自己條路點行，因為之前樣樣嘢太stable，一個comfort zone裏面，嗰次係我人生轉捩點，諗多咗將來係點。記：咁要多謝許方輝？周：人哋嘅嘢唔講啦，多謝身邊嘅人，尤其係嗰段時間。記：現時多人追求？周：我身邊男仔朋友都多，但真係追就唔多覺，可能我個人都男仔頭，啲人成日話我講嘢冇尾音，啱傾嘅有，出嚟食吓飯嘅都會有，但朋友囉，追嘅就唔係太多。我又唔係話好急，因為工作各樣都好忙，拍拖都會開心、好sweet嘅，但係冇都唔會特別care，順其自然。記：有冇驚過自己會嫁唔出？周：冇話特別怕嘅，如果真係嫁唔出都冇辦法，自己就冇特別諗幾多歲嫁。我都信緣份嘅，如果佢要嚟，會感覺到，都係隨緣，平常心，唔會強求咁多，可能20幾歲好恨拍拖，但過咗嗰個階段。記：咁你有乜擇偶條件？周：相處到、溝通到係最緊要，出面好多話有筍盤，但係唔夾已經冇意思，樣樣好都冇用。孝順嘅男仔我會加分，我會睇佢點同我家人相處，佢喺你面前一定表現對你最好一面。除咗孝順，都要心地好、有愛心，smart啲嘅男仔我都鍾意，唔係要口甜舌滑好識冧女仔，佢會喺我人生上、生活上、工作上畀到意見我，我都係需要一啲guidance嘅人。化妝：Christy Lam髮型：Philip Lee@ La Biosthetique服裝提供：SEQUOIA
來源:
http://hk.apple.nextmedia.com/entertainment/art/20150430/19130260
出書爆女兒拍過三次拖麥明詩母：見過Dominic
1 :
GS(14)@2016-07-13 05:15:46■麥母日前接受專訪時，認為麥明詩的缺點是太勤力及真。攝影：沈健程
十優港姐麥明詩的母親何小娟學歷不輸女兒，持有教育碩士及資優教育大學文憑，將於書展推出著作《我的女兒麥明詩》，日前麥媽媽在觀塘接受本報專訪，分享培育十優女心得：「好多家長覺得教細路仔好大壓力，如果湊細路唔係咁難，多啲人生兩三個，社會先唔會人口老化，我希望同家長分享，細路仔係將來社會棟樑，呢個係我寫書嘅意願。」
■麥母坦言有次到深圳探班見過Dominic（右）。資料圖片
■麥母自少培育女兒的自信心，又挑選合適玩具刺激腦部發展。
■麥母將於書展推出首本著作，分享培育子女的心得。
性格重要過行業
怎樣培育明詩由白紙變十優？麥母說：「其實係方法問題，細個畀多啲唔同刺激佢，神經線縱橫交錯長得好，效果會好。點解明詩有膽量選港姐，我諗同佢自信心有關，培養細路仔自信心好重要，細路仔要用唔同玩具、方法訓練專注力、記憶力、創造力同內在紀律性。」談到明詩的愛情，麥母坦言女兒有帶男友返家：「係呀，佢唔係拍過好多次拖，咁大個都係三次。」對明詩現任男友林作媾女，女兒跟他冷戰，麥母說：「見到佢唔開心，喊咪攬吓佢，我嘅處理係畀支持：『媽媽嘅愛永遠喺身邊，咁大個女自己決定』」有傳「鴨王」何浩文（Dominic）力追明詩，問她會否接受圈中人做女兒男友？她說：「評估一個人性格重要過行業，每個行業都可以出軌。唔知Dominic有冇追佢，我見唔到（帶返屋企）即係唔係啦，只係有次全家上深圳探班見過，佢哋有對手戲，冇特別傾過偈，佢叫聲auntie，對佢冇特別印象。」
被批離地唔開心
對於女兒被批評離地，麥母坦言：「佢會唔開心，但好快平復心情。離地呢個詞對我嚟講幾深，明詩好想同人分享，佢個人好真摯，可能冇咁適合呢行，佢冇諗過做另一個臉孔，唔覺得要有另一個自己。」覺得女兒有甚麼缺點？原來麥母都頗離地，認為「太勤力」和「真」是缺點：「有時我覺得佢太勤力，而家喺演藝界發展，全副精神諗呢方面，我叫佢畀啲空間自己，太勤力會忽略某啲嘢。」撰文：余燕儀場地：THE WAVE
來源:
http://hk.apple.nextmedia.com/entertainment/art/20160713/19692004
Next Page