📖 ZKIZ Archives

在這個港股大時代，想發達只需一個冧巴，而這個冧巴，就是「生發發」（港交所388）。上週三復活假後開市，港交所已裂口高開，在其後四個交易日內，如入無人之境，大升一百蚊！本週一最高見三百元歷史新高，週二才見回軟。幾日間一隻市值數千億的重磅股大升五成。本刊在三月初、港交所仍在二百蚊樓下徘徊時，訪問了紀惠集團行政總裁湯文亮，當時他已斬釘截鐵說：「掟$80億滙豐，入港交所！」今日他成為其中一位升市大贏家。而一路玩開A、H股ETF的前理工大學會計及金融學院副教授林本利，今次亦贏開巷，他說：「喂！我舊年開始已經叫你買啦！」這班股市贏家，就急升市況，向本刊讀者提供最新部署。置身十年一遇的大牛市，最揼心的，不是提早止賺離場的人，而是手上一直無貨的人。對股民來說，唔理好醜，最緊要「有貨在手」。

上星期三復活假後，港交所如坐火箭般，由唔信升到你信！之前股價一直突破不到二百元關口，假期後第一個交易日，就升了二十大元至二百二十元。其後兩個交易日，一路在二百三十至二百五十元之間徘徊。當不少人認為夠皮止賺之際，本週一港交所再一口氣抽升五十蚊！最高見三百元，嚇到股票機前的散戶而嘩鬼叫。本週二港交所終回吐，但亦只是跌了十多元，有望再上衝。港交所，成為股民心目中的神話，其中紀惠集團行政總裁湯文亮，就在大升市前，扑中了這個神話。今年三月初，他正在為「細價樓爆煲」言論四出演說，有見湯文亮對選股亦有研究，故本刊當時問他投資策略，他斬釘截鐵只提出一個冧巴：「388」，「我八十億賣晒滙豐（5），轉咗入港交所。」

一注獨贏388

三月初港交所還在一百七十蚊左近橫行，還有掉頭向下趨勢，但湯文亮仍然非常睇好，當時他分析到：「以往我好鍾意滙豐，但而家唔鍾意。我覺得歐智華（滙豐行政總裁）係金刀手，無論係做會計，什麼也好，都係負責炒人，炒完就要離開。每一間公司都一樣，蝕緊本，搵金刀手回來，炒炒炒炒。咁一定要再找一個元帥，帶大家打仗。佢唔走，我唔買滙豐。我八十億賣光滙豐，轉咗港交所。」「為何是港交所呢？我同陸東成日唔夾嘴型，但港交所就啱嘴型。佢同我講三年內睇五百蚊，我話啱，我都覺得係。原因係而家你買股票，你買它的資產都係其次，你係買它的債務。你買咗一隻有一百億資產嘅股票，原來它有很多隱瞞債務，咁就死，但港交所就冇。它這次還因滬港通賺咗六千多萬。二，它派息有九成，這樣才能吸引基金去買你的股票，如果冇利息會很悶。還有一個先決條件，就係滬港通，香港交易所那邊，（成交額）達到一千億。保持有一千億。港交所的引擎就開動。」

二百蚊樓下再入

然而，今時今日的股市，已超出所有人預料，港股已不是每日一千億成交，而是近三千億！有見港交所幾天內急升五成，湯文亮有新部署。「我一百三十幾元買入（去年五月），好多人仲笑我點解要買港交所，話唔值錢。」他暫時掃入了七十萬股港交所，賬面賺約一億，本週一他笑說是時候「食胡」：「而家個市太唔健康啦，我會分階段沽貨，大約沽三分之一，有胡唔食，罪大惡極啊！」他指出港交所若跌穿二百元水平，才考慮再入貨：「好多一百四十元入嘅會走貨，港交所會跌番落二百蚊。後市會抖抖，財不入急門。雖然財爺（曾俊華）出聲話冇爆煲，但而家高追港交所，同接火棒冇分別呀。」湯文亮多次向記者說，不要公開他的投資數字，因為女兒會鬧。他在澳門出生，父親早逝，母親在澳門經營木材生意，另有鋪位收租。其二家姐廖湯慧靄嫁入廖創興家族，獲丈夫廖烈正打本數百萬元成立投資公司，後改名紀惠。湯文亮在加拿大讀完書後即加入紀惠，和姐姐打拼天下，最掂一鋪是○三年借銀行槓桿式掃貨，主力買「銀主鋪」，現時集團估值四、五百億元。他與太太及子女同住陽明山莊五千呎頂層單位，平時九點返工，飯後不久收工，閒時與家人及經紀飲茶吹水。平日嗜好是打壁球，和金管局總裁陳德霖更是波友，他笑說：「我同佢喺南華會健身識，仲一齊打過上壁球聯賽甲組添！」○七年國泰航空舉辦壁球名人慈善賽，陳德霖出力比賽，湯文亮出錢捐贈。可能要掌握股市經濟，識啱朋友先係最緊要！

港交所大贏家

除了湯文亮，本刊翻查港交所二○一四年股東名冊，發現不少城中富豪都有揸重貨。最大手者，如永安百貨後人、永安（289）非執行董事郭志標等人的相關公司，起碼持二百八十萬股港交所，賬面市值達八億多。而鞋王百麗（1880）創辦人鄧耀的堂兄弟鄧強林，亦持近百五萬股，賬面值四億元。港交所行政總裁李小加持貨值一點六億元。亦如去年本刊訪問過的「街坊股神」雷敏謙，亦因為港交所，組合市值多了一個「位」。雷敏謙正職配藥員，副業買股票，已持有二百多隻股份。在上週短短三日間，他的投資組合突然「多咗一個位」，由市值九百萬元，升值至過千萬元。「我都估唔到升得咁快！好似上年年尾先買嘅新奧能源（2688），四十蚊買而家都升到五十三蚊啦！」他的五大愛股恒生（11）、中銀香港（2388）、港交所、友邦保險（1299）同渣打（2888）中，港交所一枝獨秀跑出，現持有二千多股，賬面賺六十萬，「有啲我唔夠十蚊買入，上年一百四十幾蚊嗰時又入多二千股。我唔會放o架啦，收咗咁多年息，有啲根本已經無成本，放嚟做咩？買其他可能會搭錯船喎！」

睇唔通市買ETF

要數另一個股市贏家，可說是前理工大學會計及金融學院副教授林本利。由於睇不通個股，睇好中港股市會輪流炒的他，近年索性只買A、H股指數ETF，已贏個開巷。去年九月他已向本刊推介南方A50（2822），三個月間升三成，到去年十二月，他轉而向本刊推介恒生H股ETF（2828）。當時他說：「H股股價落後A股好多，有機會追落後。我做法好簡單，就係套戥（arbitrage），A股升就買H股，H股升就買A 股，兩者間有大概百分之五的差價，我就take action買股。」為何情有獨鍾買ETF？林本利說：「升市明顯是中央國策帶動，但我唔知邊個行業會升，所以追蹤大市ETF係最直接跟到個市。你而家再問我睇好咩行業？我一樣都係話ETF。喂！我舊年開始已經叫你買啦！」近日南方A50已突破十六元關口，一年升了一倍，H股ETF亦一年升了四成，現時林本利建議股民不要盲目入市，但如果散戶認為無貨「風險」大過有貨的話，仍可買恒生H股ETF：「如果你係都要買，唔好買正股，買恒生ETF。因為A股升咗咁多，資金係要落返來香港再炒，咁2828咪會再升，總之邊度有差價就買低水嗰度。A股回番咪買A股ETF，H股同港股跌番，就咪買H股ETF。」他認為大牛市會持續一年，但要注意香港升市已由去年十月開始：「所以玩多幾個月度就完啦！除非深港通今年內開通到，否則都唔會升咁耐！」

「炒股跟黨走，賺到無朋友。」

自從復活節假期以來，港股已直線颷升，並升破二萬五千點，近日曾一度攀至二萬八千點關口，至本週二才回落；成交金額每日平均二千五百億，比平日多近一倍。不過，雖然走入街市、公園，師奶阿伯都在談論股市冧巴，但由於升勢過急，真正有追入賺錢的人不多，反而大把人在研究將多年蟹貨趁機沽售。事實上，今次大升市由內地資金帶動，眼見A股升得急，遂大軍南下，追入落後的H股。記者來到深圳的股票行，便見識到強國人炒股的癲狂。上週五，記者前往深圳福田區國信證券行觀察，內裡已擠滿開投資戶口的師奶。開完戶她們順便走到坐在電腦前的「前輩」面前偷師。其中被推舉為股神，炒股六七年的強國人劉先生，近日有玩人壽窩輪等，已賺了十多萬。這天他激動地專家上身，不停拍枱指點身邊師奶，記者問他入市策略，他竟指：「隨便買都可以，只要成交量大就可以買。」愈講愈興奮的他，即場再推介多隻港股，包括中國人壽（2628）：「不用管價位，愈升得急就愈要買！」身邊師奶亦大表認同：「佢點解要呃你？你跟佢買就無錯啦！」內地人炒港股的結果，是令港股A股化，而且香港無漲停板制度，預期後市非常波動。過去幾個月，強國人已成立多個網站及WeChat群眾，有組織地炒起港股。如內地「雪球網」，就如社交網站般，讓股民分享自己投資組合，近日網民「好風」分享「積極陽光」投資組合，就聲稱持有港交所（388）、光大控股（165）、平保（2318）等港股，獲利十三倍﹗而WeChat群組「格隆匯」，更分有地產、金融、建材等數十個板塊，讓會員分批研究港股。記者參閱內容，其中彈出最多的一句是：「先買入，再研究！」

阿爺開車

今次中港兩地股市瘋炒，背後全靠阿爺發功，而這只是作為調整經濟的一種手段。有內地證券行老總指，內地經濟放緩，樓市也一潭死水，無計可施下，中央唯有以股市作宏觀調控手段。一二年前，內地GDP均有百分之九點五以上，但自一二年起保八失敗，經濟增長跌至百分之七點七。今年全國人大會議上，總理李克強將經濟增長目標定為百分之七，創十一年新低。另外，企業債亦是內地面對的一大難題。去年有首間內地公司債務違約，據券商統計，去年底內地企業債佔GDP百分之一百三十，遠高於美國的百分之八十，中央唯有靠股市去「箍煲」，「推高股市，上市公司估值上升，就可以直接去印新股票、配股。企業以股代債，不用還息自然輕鬆很多；散戶賬面資產大升，亦更願意去消費。」該證券行老總指。港大經濟金融學院助理教授陳衡指，回看股市走勢，由去年五月起，已有上升的端倪，「那時中央由強調結構，轉為穩經濟，提出很多『微刺激』政策，帶動股市。到去年六、七月市場還不很確定，九月李克強講就業數據達標，之前猶豫會不會有更多刺激政策，果然之後央行兩次減息，再刺激股市上升。」

聚焦國企改革

故現時揀股，一定要睇國策，內地便有一個說法：「炒股跟黨走，賺到無朋友！」日後「一帶一路」固然是重點，目的是將產能過剩的鋼材、煤炭輸出海外。另外，李克強曾強調要加快實施國有企業混合所有制改革，「國企改革」亦是未來重點之一。去年中信泰富「蛇吞象」，吞併母公司過百億資產只是開端，今年有南、北車合併，市場亦傳中石油（857）會與中石化（386）合併，及中國中鐵（390）和中國鐵建（1186）合併。因此，豐盛金融資產管理董事黃國英明言，今次港股喪炒會「狼過○七年」，「而家交投都大過○七年啦！你參考A股由去年十一月初到十二月中，勁升百分之二十五呢一段。以同樣升幅計，港股可以升到二萬九千幾、三萬點o架啦，而家我哋只係呢段升浪嘅中間，仲有一、兩個星期party time。」他提醒散戶要留意幾多上市公司嚟「cap」水，「每個牛市結束都有一隻標誌性嘅新股出現，九七年有北京控股（392）、二千年有TOM.COM（2383），○七年有阿里巴巴。而家都未出現，唔好嚇自己。」至於個股，他推介近月未見大升的中信股份（267）。他指重組後的中信已轉為以金融為主業，但市場仍視之為礦業股，所以被低估價值。至於去年五元左右入中國銀河（6881）、現價已十三元的東驥基金管理董事總經理龐寶林，則對券商股、友邦保險（1299）及惠理基金（806）十分樂觀：「深港通仲未開通，盈利已經升得好勁，而家券商股盈利升幅已經用倍數嚟計！」他坦言在H股A股化的大環境下，難說哪隻是泡沫：「而家資金由內地話事，所有蚊型股，就算基本因素差，佢哋都會掃，主要只係睇內地人覺得增長潛力大唔大。市盈率嗰啲佢哋都唔理囉！」

湯文亮近日爆紅，先是二月發表了細價樓爆煲論，引起全城熱話，三月時睇淡滙豐，睇好「生發發」港交所，立時被封為「新股神」。

賺一大筆應該大事慶祝，不過湯文亮出席完一早約好嘅浸大講座之後，除咗繼續寫文章就無聲無氣。佢同《壹》仔講，佢俾「股神」稱號嚇親，叫做「估神」好啦。事關封咗做「股神」之後一日，佢就收到五十幾個電話，佢年紀大覺得太刺激，心臟頂唔順，要專程去養和睇心臟科醫生。計計吓，仲有兩個星期就到三個月爆煲論限期，想訪問番湯文亮點睇嚟緊樓市。佢話醫生建議佢應該多休息、少應酬，三個月內不能接受訪問。之後仲特登影張醫生紙俾《壹》仔，證明真係睇咗心臟科醫生。睇嚟佢去玩潛水適合過坐過山車。

21影業不日上畫

細價股21控股（1003）早前宣布易主，引入多名「星級股東」。單刁由蔡東豪舊老細、精電主席高振順及阿里影業前主席董平牽頭，二人乃金魚缸常客，最奇怪是，連「公職王」、貿發局主席蘇澤光都大拿拿攞咗近二千萬入股，另外仲有拍過《人在囧途之泰囧》的影星徐崢、《瘋狂的石頭》導演寧浩等，噱頭十足。小宗第一時間打俾高振順索料，佢話佢既是股東，亦是單刁的財務顧問，唔方便講嘢。不過，心情靚靚嘅佢，不忘提醒小宗，蘇澤光做過幾年電影發展局主席，好熟媒體，而徐崢等人都是內地票房過十億的電影人。畫公仔唔使畫出腸，而家做緊地產代理及投資業務的21控股，睇來好快變21影業。

中環寸嘴

工廈大王楊耀松長子，是各大有名食肆之VIP，喜歡研究已故及城中有錢佬對食之喜好，強調「貴」唔等如識食，自詡分享食經乃是提升讀者之水平。

揸滙豐當攬新女

嘩，禮拜六走去上環衣紙鋪買金銀衣紙，幾鬼多名車喺門口排晒隊，一路買衣紙一路噏股票，我睇啲人心虛，個市升得咁急；我係睇住一、兩隻心水股，平保喺$141、$144做兩轉decumulator，分多幾轉做等個銀行佬日日有得向上頭交數嘛，唉，滙豐吹話遷離英國股價反彈吓，我啲棺材本都仲有滙豐，呢隻股即係等如年老色衰嘅老婆，有downside，無upside，咪整吓呢度，搞吓嗰度，披件靚衫，咁做老公嘅攬住咪當係條新女囉！但走勢始終向下。之前我見滙豐同中石化兩隻嘢鬥殘咁，就押注落去中石化，起碼都有古講吓嘛，家陣都有啲斬獲。呢排有啲金融界老友，約我去happy hour，你慌唔係想索我啲料呀。Happy hour唔去啦，日日睇住個市，你估唔攰呀？搵到錢，點你去食又抵又威嘅嘢，嗱，平日喺中環食個晏，唔好講錢住，訂唔訂到位都唔知，喺遮打大廈間Armani Aqua，週六、日brunch抵食o架，唔使同人逼，啲任食嘅日式刺身、壽司幾靚o架，仲有意式主菜，臨尾上客甜品，最盞鬼係香檳、白酒、紅酒任飲，而家冇乜高級餐廳咁做，大人五百幾蚊位，唔飲酒四百幾，細路仔半價添。嗱，週六少人，週日好多細路仔。齋飲酒都抵番啦。

死人股

七三年已上市嘅安全貨倉（237），肯定係老股，公司資產豐厚。最正係位於荃灣嘅安全貨倉，十幾年前本來話向城規會改為住宅，但董事局忽然褪軚；咁筍嘅建議都唔做，梗有阻力啦。剛過身嘅主席、年屆九十五的呂辛本來同個仔呂自龍（年屆六十三）拍住上坐喺董事局，後來細仔呂榮義加入集團任經理，論年紀，阿哥呂自龍大細佬廿幾年，生得出佢喎，細佬入局，阿哥亦因病退任董事；今年四十歲嘅呂榮義會計師出身，數口精，照計唔會睇唔到公司資產同股價大折讓；董事局無晒雜音，做嘢應該暢順啲，有小股東揸住安全貨倉多年，講到明同主席鬥長命；家陣卒之等到了，相信股價有所發圍。

金牙大狀講嘢

和稀泥闖禍一葉知秋。先前我哋憑中大嘅英文水平，判定呢間大學江河日下。果然，佢哋深圳研究院爆出「穿櫃桶底」、為人要脅嘅醜聞。沈祖堯為此辯護，話冇就此報公安，皆因唔熟悉上邊情況云云。然而出事唔報警，沈校長早有前科。冇耐前，中大發生咗單刑事毀壞案。事緣八大學院連同學生會同意加宿費，但有個別學生唔順超，非但反對大學上下嘅集體決定，更衝擊校長室、打爛保安監察系統。結果？沈校長罔顧大學最高當局加宿費嘅決定，反而以和為貴，冇報警追究責任。摸清校長之底細，難怪深圳有人「穿櫃桶底」亦冇有怕矣。校長處事唔講原則，萬一出事亦和稀泥、努力冚實，咁啲人有乜辦法唔膽生毛呢。做好人容易，但姑息養奸，到有一日紙包不住火，揚晒出嚟啦，但一切為時已晚。睇怕深圳都只係個開頭而已。