📖 ZKIZ Archives

中門大開：大李小李 添馬男

1 : GS(14)@2013-04-13 16:45:17

http://hk.apple.nextmedia.com/financeestate/art/20130412/18225510

                據《星島》報道李超人親自過問HIT工潮事件，希望事件盡快解決，但「超人」那邊對報道予以否認，情況同上次記者問李超人對工潮睇法，老李正想回答，立即俾小李Victor阻止，在佢耳邊哦咗幾句，李超人就收口冇出聲，一模一樣。李超人似乎對工潮有難言之隱，而今次HIT任工潮拖延已兩星期，完全唔似李嘉誠一貫處事作風。
工潮拖延，由碼頭工人罷工，spill over成為社運，反李反商，又有群眾支持，捐款400幾萬作罷工基金，社運人士及工會策略上有大食大，一定算到李超人頭上，相對額外支出一年幾千萬加薪數目，對比李超人在公眾形象上之損失，以及政治形勢之凶險，條數冇理由唔識計。
大家可能唔記得咗舊年5月長和系業績會上，李超人親自宣佈分身家計劃，長和系幾千億業務交畀大仔李澤鉅管理，佢本人會全力協助第二仔李澤楷收購集團以外資產，7月正式落實分家安排，可以講李超人已經正式交棒，大仔亦正式接班。碼頭工潮事件應該係對佢接班後首個重大考驗，但HIT嚴磊輝處理表現差強人意，呢位「鹽焗雞」先生有份推動工運向社運方向發展。
工運與社運本質上有分別，工運矛頭指向分判商，屬勞資角力，社運矛頭就「升呢」變成指向李嘉誠、李家天下、地產霸權。老李當然希望小李可以展示大將風範及高超靈活政治手腕，擺平工潮，兼且宣告天下接班人係「掂」嘅。

出手擺平等於接班「甩轆」

                起初HIT對事件定性為分判商與工人之間勞資糾紛，將自己責任一概推得乾淨，明顯同公眾期望係有大落差，而「鹽焗雞」就更加促成一場公關災難。工潮拖延下去變了兩難局面，先至令李超人欲言又止，若插手干預，促成工潮結束，則顯示交棒接班「甩轆」，有大事發生，最終都要由大李出手搞掂；若忍住唔出聲，唔畀意見，又擔心再拖延下去，形勢惡化，社運擴大。小小一單工潮最終鬧大，其實國際形象受損事小，被人取笑冇用事大。
若果揸fit人是專業企管人，反而易辦，CEO乃外人，高薪厚祿，有需要時可用來擋子彈做醜人，但華人家族企業有公有私，糾纏一齊，會幾難搞。

                  添馬男                                                        
PermaLink: https://articles.zkiz.com/?id=282520
Next Page
ZKIZ Archives @ 2019