旗下歌手為拍拖輪住講大話何哲圖超尷尬
1 :
GS(14)@2017-04-15 23:27:55何哲圖擔任唱片公司高層好多年，一手捧紅過嘅藝人都唔少。佢除咗係歌手伯樂，好可能仲係月老，因為俾佢睇中嘅歌星，都喺瞞住何哲圖下請一排假，就即刻搵到好姻緣。鍾嘉欣大台當年同四大唱片因為版權問題鬧翻，劇集主題曲搵番大台演員自己唱，嘉欣由08年加入星娛樂開始，到公司改組成星夢娛樂，都得到何哲圖寵愛。不過嘉欣15年底結婚、再於16年生女，何哲圖都只係知對方請假，而為乜請假就唔知情。沉醉於家庭生活嘅嘉欣，日前就獲老公舉行驚喜生日會，非常幸福。吳若希講完鍾嘉欣，就一定要提埋吳若希。兩人同時獲星夢娛樂力捧，吳若希仲試過被《蘋果》發現同何哲圖喺尖沙嘴開餐。當鍾嘉欣選擇結婚，吳若希理應坐正一姐，不過吳若希喺去年中放風話要休息一段時間。直到吳若希有喜3個月，先打電話通知何哲圖，再一次被旗下女藝人蒙在鼓裡。鄭俊弘最經典嘅，一定係上星期宣佈拍拖嘅鄭俊弘同何雁詩。鄭俊弘先喺上星期三，在何哲圖陪同下，喺電視節目訪問到話冇一腳搭兩船，何哲圖仲代答「佢哋只係朋友嘅關係」。點知過咗一日，鄭俊弘同何雁詩喺機場滿面幸福咁拖手認拍拖，為咗低調保護愛苗，出此下策連老闆都呃埋。
來源:
http://hk.apple.nextmedia.com/entertainment/art/20170415/19990657