ZKIZ Archives


樂視離職員工 服務平台「圍爐」

1 : GS(14)@2017-06-10 10:02:27

【明報專訊】自從傳出樂視資金鏈瀕臨斷裂,時不時都會傳出裁員嘅消息,通常畀人炒,離職員工都會各散東西,但微信最近有一個聲稱自己為「樂視離職員工服務平台」嘅公眾號,話要正式建立樂視離職員工組織,希望畀樂視前員工圍爐取暖,雖然組織個名係咩就仲未諗,但人數已經達2000人。

參加人數達2000

個服務平台噚日上載咗一篇文章,講到開呢個「樂視離職員工組織」,係希望各位離職員工可以互相幫助,既然走咗就唔好望番轉頭,大家要勇敢向前!雖然畀人炒咗,但離職員工不忘關心仍然同樂視出生入死嘅同事,仲叫在職兄弟一定要撐住,感激兄弟每一日喺樂視全力以赴,唔可以辜負自己的青春同熱血。事實上,雖然樂視裁員消息不斷,但又真係好少聽到樂視前員工公開批鬥公司,睇嚟離咗職嘅兄弟仲係好懷念大家一齊揮灑青春嘅日子。

[小琴密語]


來源: http://www.mpfinance.com/fin/dai ... 2008&issue=20170610
PermaLink: https://articles.zkiz.com/?id=334497

【圍爐舔傷口】自嘲搞坎坷影展 表揚鎂光燈下的茄喱啡

1 : GS(14)@2017-07-07 02:43:07

坎坷是因為未忘初衷。



最近名為「Festival de Cannot坎坷影展」的專頁在facebook冒起,五月成立至今上載了十七條宣傳片,找來電影業台前幕後鏡頭前自白,包括演員、影評人、電影導演、編劇等,內容圍繞他們在電影業打滾的辛酸經歷。黃鐦(阿鐦)、黃綺琳(Norris)、梅諾謙(阿謙)和呂榮棟(阿棟)本身在影視行業工作了五至六年,影展名字由來純粹是for fun的二次創作,後來一次賣醉促成了影展。雖有很多人誤以為這是一個純抽水專頁,實情是他們與另外四個年青人自資籌備影展。坎坷影展副主席黃綺琳強調:「好多人以為我哋剩係出抽水post,攞嚟笑,其實唔係,我哋真係搞緊一個影展,而嗰啲宣傳片同抽水圖係宣傳緊個影展。」



宣傳片以黑白色為主調,抽水圖帶自嘲譏諷語調,看起來確實坎坷,坎坷影展主席黃鐦指:「唔好話我哋呢一行,喺呢個社會度,邊個唔係感覺到坎坷?」有人批評他們自怨自艾,宣揚悲觀主義,他們堅持初衷只為自嘲,阿鐦說:「雖然話人總需要勇敢生存,但都應該容許大家有軟弱嘅時候,自嘲呢個模式只係我哋點樣面對軟弱嘅一個態度。」坎坷一詞可圈可點,梅諾謙甚至覺得坎坷代表一份堅持,他解釋:「坎坷未必係一件慘事,因為你心入面有初衷,或者有啲嘢想做,但你做緊第二啲嘢,所以你先會坎坷。」本地短片比賽多不勝數,不過多以夢想和希望為題,他們覺得正面定位更顯虛偽,期望坎坷影展可以呈現更真實的社會環境。



他們傾向自資籌辦影展,是因為不想令影展變得商業化。

阿鐦指繼續堅持的原因是尚未參與過電影製作,而這才是自己的夢想。

Norris27歲時,有人聽到她任職編劇助理後說了一句:「咁你都幾鍾意呢行。」她笑說最坎坷是別人覺得她坎坷而她不自覺。

坎坷影展正接受影片投稿,旨在「為一眾坎坷導演或想成為導演的坎坷靈魂提供一個自揭瘡疤的機會,展示與成功有一段距離的短片作品」,阿鐦說:「希望去表揚啲有努力過拍咗條片出嚟嘅人,第二啲影展睇唔到你嘅光環,但我哋坎坷影展會睇到嘅。」參賽資格與獎項提名都與主流短片比賽有分別,譬如其中一個資格為「參賽影片需未曾入選任何影展,及預期不會入選任何影展」,亦設立「最佳非主要演員」、「最佳燈光設計」等非主流獎項,模式跟足其他短片比賽,不過阿鐦笑言:「坎坷影展頒個最佳男主角畀我,都唔係會攞出嚟講嘅嘢。」反而他們最想做到的是拉近製作人與觀眾之間的距離。為過台前幕後不同崗位的人拍攝宣傳片,Norris憶述其中深刻的一句,是電影《狂舞派》及《哪一天我們會飛》監製及編劇陳心遙說:「人到無求就不坎坷。」Norris苦笑說:「因為我哋都係有要求先會坎坷,對於無要求嘅人嚟講,好快樂,好幸福。」



阿謙形容自己為一個後備席上的足球員,一直拉筋希望有機會下場比賽。

曾經有朋友當面批評阿棟拍的短片好難睇,不過對他打撃不大,他直言:「最好打撃多啲,唔夠坎坷。」

既然有坎坷構思,坎坷遭遇也少不得。身兼編劇和填詞人的Norris說:「我阿爸阿媽成日都話我寫劇本寫咗唔知去邊度,同埋之前間電視台又一直發唔到牌,寫嘅嘢無正式喺電視播出,所以上年嗰套劇喺電視上播出,佢哋一開頭係好興奮嘅,但可能唔啱我阿爸口味啦,佢睇睇吓都放棄咗,仲comment我套劇點解男女主角場場食飯,不斷食飯,喺唔同地方食飯。」父母開着電視為支持收視率,可悲是爸爸棄劇後便從此背着電視坐。阿謙擔任中小學校園電視台導師前曾做過助理編導,他提起最坎坷的一次:「嗰時比較懵盛盛啲嘅,企錯位,導演一怒之下一拳打落我心口度,好痛,即刻瞓咗落地下,嗰刻我係好痛,除咗生理上嘅痛,個心係痛到喊,即刻標眼淚。」對於廣告製作公司負責人阿鐦而言,甚麼客人的壓榨不是最坎坷,反而是有機會自資做自己的製作時,出來效果未如理想,他說:「發覺自己嘅不足,同唔知點去補救,好絕症呢個感覺。」



坎坷影展的獎項提名與主流短片比賽不同,希望表揚更多鎂光燈下的茄喱啡。

專頁上的抽水圖全部出自真人真事,自然容易引起共鳴。

假設拍片這回事消失於世上,你在做甚麼?阿謙想了想,說:「我無第二啲嘢識做,我剩係識拍嘢,除咗拍嘢我乜都唔係,可能係一個跑數嘅sales,可能係一個跑寬頻嘅sales。」
Facebook:Festival de Cannot坎坷影展記者:鄧天蔚攝影:許先煜(部份圖片由受訪者提供)2017果籽繼續認真知味。識買惜用。行以求知。好事多為。重修舊好。緊貼果籽報道,即like:http://fb.me/AS.AppleDaily




來源: http://hk.apple.nextmedia.com/su ... t/20170705/20078855
PermaLink: https://articles.zkiz.com/?id=338359

Next Page

ZKIZ Archives @ 2019