人人問星爺 要乜特異功能
1 :
GS(14)@2016-01-20 17:48:51周星馳這三個字,正如古晶在《整蠱專家》話齋「足以改進社會風氣,風靡萬千少女,提高年輕人嘅內涵,刺激電影市道」。今次「人人問星爺」是大家對星爺電影的集體回憶,以他的經典對白夾雜於問題之間,經過連番考驗,星爺最愛的是「一日冚包散」,貪個名意境夠高。
Q1
斌斌:你真人鍾唔鍾意飲Dry Martini?(出自《國產凌凌漆》)答:呢個問題真係問得好,其實我係幾鍾意飲Dry Martini,我年輕嗰時特別OK嘅。
Q2
徐先生:你覺得邊種食物最恐怖?一日冚包散、含笑半步釘(出自《唐伯虎點秋香》)定淫賤不能移(出自《整蠱專家》)?答:我鍾意一日冚包散,佢係咪最恐怖我就唔知,但我鍾意嗰個意境囉。
Q3
張同學:特異功能中,你寧願識捽牌、天眼通定你睇我唔到你睇我唔到?(出自《賭聖》、《賭俠》)答:其實我就鍾意「你睇我唔到你睇我唔到」嘅。
Q4
陳小朋友:做人冇夢想同條鹹魚冇分別,咁你仲有咩夢想未做?(出自《少林足球》)答:夢想我仲有好多,都好多未做到,所以我咪成條鹹魚咁囉。
Q5
陳先生:識唔識一個叫Mike Chan嘅朋友?(出自《逃學威龍2》)答:其實我係唔識,我係完全冇一個朋友叫Mike Chan。
Q6
Cal:星爺我想考吓你,以下對白嚟自邊套戲?飛係小李飛刀個飛,刀係小李飛刀嘅刀。答:係《國產凌凌漆》。
Q7
畢傑:十室九貧湊得八兩七錢六分五毫四厘,尚且三心兩意一等下流。答:淺唔淺啲呀?係咪《回魂夜》呀?《唐伯虎點秋香》啦梗係。
Q8
Mike:我對你嘅景仰,猶如滔滔江水,連綿不絕。答:答:唔好啦,咁淺,《鹿鼎記》。
Q9
Wallace:聽聞《美人魚》古仔係講填海,係咪base on香港背景?答:故事係有啲填海情節,不過唔係講香港,係內地某個地方。
Q10
春子:點解諗到拍美人魚,唔拍尼斯湖水怪呢?答:我早啲識得你就好喇,我一於就拍尼斯湖水怪,唔拍美人魚啦應該。
Q11
阿仙:點解要揀美人魚呢個題材?聽講係一部主講愛情嘅電影嚟喎?答:冇錯,你講啱咗,美人魚梗係關於愛情啦,係一套異類物種交叉戀愛嘅故事。
來源:
http://hk.apple.nextmedia.com/entertainment/art/20160120/19458563