📖 ZKIZ Archives

肥龍非唐軍師 左丁山

2011-11-11  AD

星期二中午到 ICC天龍軒吃午飯，此餐廳位於 102樓，要先在酒店入口大堂坐到 103樓，再坐電梯落 102，樓層高，樓底又高，甚有氣派，睇港九風景就冇得彈咯，氣派十足，淨係食氣派，已知係高價食肆。可惜呢，菜式就麻麻咯，一味家鄉梅菜雞，咬落有 「渣」嘅，左丁山為之皺眉頭，私家房內主人家之良人直情可以嚟呢度開壇講學，教番幾招。星期四就到 101樓之「龍璽」，會長 C請客，唔，相差一層樓，大家都有個龍字，此「龍」不同彼「龍」， 101樓私家房內嘅水平高好多噃。
好在食飯不太在乎餸菜，最緊要朋友相聚齊傾 偈，傾偈話題離不開區議會選舉結果與疑似特首候選人，想不到大家幾乎同聲話冇投票俾公民黨，房內冇人會為咗啲所謂「蛇齋餅糉」而投票嘅，嗰啲嘢送埋嚟都唔 會食，公民黨輸咗賴地硬，房內人笑得半死。疑似特首又如何，大部份意見都認為唐先生宜急起直追，唔好在民望上俾 CY越拋越遠，但有乜好做呀？我地唔係軍師，留番俾圈內人去諗。
因兩點半就要開會，左丁山急急腳鬆人，在 ICC最易碰到熟人，喺圓方商場內之「金木水火土」唔知係乜區就遇到一位好熟唐生，又識肥龍嘅工業 A，醒起是日出版之周刊有一段稿寫到人人以為係唐生疑似軍師肥龍因通波仔入院治理身體，不會做唐營總軍師。左丁山問工業 A：「肥龍係唐生軍師呀？在緊要關頭病咗，咪好大件事？」工業 A耍手擰頭：「坊間傳言不可信，我同兩位先生都熟，可以斬釘截鐵話俾你聽，肥龍與唐生絕無工作關係，肥龍從來不是唐生軍師，之前唔係，現在唔係，將來都唔 會係。」講得咁肯定？似乎與我地聽到嘅傳聞不符喎，但工業 A又確係識得許生唐生好耐嘅，唔信佢信邊個？呢場特首選舉大戰，戰況撲朔迷離，未到最後關頭，不知誰勝誰負，根據過往兩人言論， CY有大政府傾向，願意干預市場，故此本欄過往話過佢有社會主義影子，香港工會派（工聯會、民建聯、職工盟、街工、公民黨、民主黨、民協）議員大概會支持 佢；唐生則係傳統大市場小政府、非不得已不會干預派，會得到工商界金融界及經濟學家贊同，一字擺開，似係社會主義與資本主義兩派擁護者之決戰！

PermaLink: https://articles.zkiz.com/?id=29156
Next Page
ZKIZ Archives @ 2019