| ||||||
政府十月中宣布王維基旗下的香港電視不獲發牌,震驚全城。但魔童未有因此被打沉,並於短短兩個月釜底抽薪,宣布購下中移動旗下香港流動電視業務,明年7.1開台。搵到平台發圍,王維基再度重鎚出擊招兵買馬,據悉他志在必得的頭號人選,是失落視帝但贏人心的吳鎮宇,為打動對方,更開出近廿萬一集利誘。吳鎮宇亦開宗明義,將會倒戈幫港視拖:「支持!喺新媒體同觀眾見面幾過癮呀。」換句話說,吳鎮宇將硬撼明年回巢拍無綫劇的黃秋生。兩大影帝為電視台戰開拖!鎮宇拍戚其義 絕地反擊!王維基為港視找到新出路,隨即磨拳擦掌,申明會重聘早前失牌後被裁走的三百二十名員工,未來兩年再增聘八百至一千人加入團隊。據悉,已離開無綫的金牌監製戚其義,一直跟王維基有密切聯繫,港視宣布轉做流動電視後,有指戚其義與舊拍檔編劇周旭明將為港視炮製新劇,還有外闖多年的監製鄧特希亦會幫拖。招兵買馬,翻生魔童鎖定跟無綫沒有合約束縛的好戲之人,有傳包括出爐視帝黃子華及臨門失蹄、公開寸無綫的Cool魔張智霖,但魔童最想到手的,其實是在無綫頒獎禮食白果,卻是觀眾心目中視帝的吳鎮宇。當日吳鎮宇以八萬一集接拍《衝上雲霄2》,劇集口碑收視俱贏,本是視帝大熱,但吳鎮宇最終被「用完即棄」,齋坐半晚,一個獎都無得分。被無綫當草的人民視帝,魔童一直視為寶。據悉,翻生港視以吳鎮宇內地拍劇近廿萬一集的身價,重金邀幫拖,並計劃安排他與戚其義合作,為失落視帝的吳鎮宇出番啖氣,剃無綫眼眉。 唔打算搵子華 「港視今年初已經傾過吳鎮宇,但當時發牌未明朗,所以冇結果。吳鎮宇對港視都好有興趣,只要價錢啱,佢都想試吓同魔童合作。最佩服係無綫,仲厚面皮叫吳鎮宇出年幫手拍劇,真係睬佢都傻!至於黃子華,因佢之前寸港視搵佢但出唔起錢,所以未必會搵佢,反而張智霖就會傾。」知情者爆。玩謝吳鎮宇,無綫出動監製王心慰打人情牌,說服另一影帝黃秋生回巢拍功夫劇。吳鎮宇與港視拍板合作,兩台以影帝對壘。本週日(十二月二十二日),準備返內地開工的吳鎮宇被問港視向他招手,將安排他與戚其義合作一事表示興趣,並撐王維基撐出面。「幾好喎!阿戚係我想合作嘅監製,仲有雯女(鄧萃雯)都好耐無合作,如果時間配合,喺新媒體同觀眾見面都幾過癮。電視機始終搬唔到出街,留守屋企係大大小小(年齡層),中間嗰班係出街蒲,呢個係新嘅選擇,幾好呀!塞翁失馬,支持你(王維基)o架!希望佢攞番當日鋪電纜(香港寬頻)嘅決心出嚟,繼續做好呢份理想。」吳鎮宇說。 調走樂易玲 落實有平台,翻生港視大舉挖角。直斥《金枝慾孽2》飛紙仔引致跟無綫鬧反的鄧萃雯,及數月前已投港視旗下的陳錦鴻,將隨時埋位。此外,對將不續約無綫的小生花旦,包括林峯、陳豪、楊怡及胡杏兒等,也是港視虎視眈眈的人選。港視打到嚟!有傳無綫會將製作資源部總監樂易玲調到上海分支TVBC,改由助理總經理區偉林負責留人,親自約見準備與楊怡和陳豪組公司外闖的經理人部門要員陳嘉莉,並打算安排升她任經理,隔山打牛,藉此留住兩大小生花旦迎戰。 慈善團體大逃亡 除了藝人,一直與無綫合作得忍氣吞聲的慈善團體亦跳槽。有指無綫在籌款節目如《慈善星輝仁濟夜》的製作費相當大咬,明年還要加幅兩成,再要跟慈善團體攤分一半贊助費,令慈善團體籌款幾乎變「白做」。港視宣布新出路後,唔想再在無綫揸頸就命的慈善組織,即時主動聯絡,商討明年合作計劃。無綫散水潮,逐步擴大! 伸縮策略 11年,王維基正式向無綫發動挖角攻勢,為了穩定軍心,無綫立即拋出「一籃子優惠」留人,但當港視不獲發牌後,優惠即成空頭支票。如今魔童移形換影玩翻生,無綫本支票簿,又要出動。如臨大敵加人工:王維基掟錢撬人,不少台前幕後無鞋挽屐走,無綫即時向肯留低的藝人加薪,連一向不被重視的甘草亦有份,大破慳囊,是無綫最積極的應急方法。改態度:無綫一向只重視合約一線藝人,其餘即使效力多年的甘草或三、四線,全部漠視,挖角潮開始後,連做慣布景板的綠葉,也可以在宣傳活動發聲,有機會見報。解除威脅做死人:王維基失牌得民心,無綫製作被鬧爆成眾矢之的,主席梁乃鵬即時宣布「尊重演員方案」挽回頹勢,承諾給演員有充分休息,又下旨要有八成完整劇本才開劇,言猶在耳,但現時仍有演員on duty 22小時,拍劇現場一樣紙仔滿天飛。減騷錢:知道港視不獲發牌後,無綫故態復萌,諗盡辦法玩財技,藝人半粒鐘當一個騷的甜頭全部回吐,規定一個騷要足一粒鐘,變相因加得減,冇加過薪。 魔童日記 魔童由政府公布不獲發牌至另覓新天地,其間的言行甚受矚目,月初還得到「雅虎全年搜尋人氣榜」十大新聞中的第二位。 凱旋回歸笑晒十月十五日,香港電視網絡被判「死刑」後,王維基一直鍥而不捨搵生路,本月二十日,他宣布獲中移動出讓旗下香港流動電視業務,戰士不死,全程笑晒。 希望幻滅谷爆同一場地,但兩個月前接到不獲發牌通知的王維基,火燒心怒目狂轟。 見仇敵好戲常擦無綫鞋的阿叻繼「跪回家」後又一瘀事,十一月在印度會巧遇王維基與港視員工聚會,阿叻竟賣口乖對王維基說贊成港府發牌給港視,雙方還大方合照。 |
| ||||||
香港管絃樂團有個大師會,共有二十一個成員,內裡再分珍珠、綠寶石、鑽石及白金四個層次。會員嘅唯一責任睇嚟就係出錢等港樂有錢請啲世界級大師嚟獻技,當中白金級會員出錢最多,如此類推。 二十一個會員當中,絕大部分係法興銀行、新鴻基地產等跨國及本地大企業。個人名譽入會者有Ana & Peter Siembab呢兩位綠寶石級會員。恕我哋眼界有限,未曾識荊,失覺曬。 另一個非企業會員,則不得不令人寫個服字;佢並非別人,正是股壇長毛David Webb也。佢唔係一般會員,而係頂級亦即係出錢最多之白金會員,同法興、新地、九倉同級數。根據港樂網頁,白金會籍的年費係十二萬五千元。 David Webb同小宗講話自己鍾意古典音樂,想支持嚇本地團體,仲話識得玩單簧管,但唔係太叻,十六、七歲時,更曾加入爵士樂隊。據知David Webb成檔嘢,除咗佢自己,淨係請咗一個人幫佢做filing。服未? 職場秘笈彼此也在捱 港大建築系畢業,由一個小小的項目經理,扶搖直上,升任至富豪國際(78)、百利保(617)及世紀城市(355)的董事。他每期分享不同的職場經驗及秘笈;要上位,無往不利。 在私人公司打工難捱,但其實打政府工一樣惡啃。由於社會進步及環保要求日日增加,現時買地起樓,政府要發展商做曬環境、污水、噪音、交通等等評估,真的做到頭昏腦脹!批則條例雖白紙黑字寫好,但政府部門對條例各有不同演繹,批嘅過程反反覆覆。屋宇署批咩,規劃署又唔批,規劃署批咩,地政處又未必批,好運嘅話年多搞掂,唔好運的則兩三年才搞掂。我去過不同政府部門,一心上去,嘈嚇、呻嚇、催嚇。走進負責人員房門,他們的枱頭、地下通通是一疊疊處理中的文件,堆到半腰高,大家唯有對望苦笑,想他們加快處理速度,恐怕也有心無力。政府現時在短時間推出多塊地皮,目的是增加樓宇未來的供應,但整個流程,由則樓到相關政府部門都嚴重缺乏人手,根本處理不到如此多工作量,發展商及政府都非常努力工作,但又同時非常努力地埋怨對方做得不夠,真的是彼此也在捱! 鴻福堂年收96宗投訴 呢排新股混戰,大部分細細隻兼冇人識,間接益咗兩隻「本地薑」,恆發洋參(911)及鴻福堂(1446),叫座力都被睇高一線。前者錄得五十倍超額認購,後者接力,於本週一至四招股。花旗參你未必幫襯過,但話曬鴻福堂有成九十七間分店,佢嘅涼茶同燒賣就不少香港人都飲過食過。不過,分店多,投訴亦多。招股書提到,鴻福堂每年平均收到九十六宗投訴,平均四日一單。其中七十八宗係客戶投訴產品質素,例子都幾驚嚇,包括產品發霉或發現毛髮等異物。 另外十八宗是消委會轉介個案,投訴內容包括職員服務態度欠佳、樽蓋設計及會員卡被盜用等。投訴多不特止,由一一至一三年,鴻福堂仲收到食環署共十三封警告信。話曬都係食落肚嘅嘢,咁多投訴及警告信確實幾嚇人,仲隨時影響品牌形象。嚟緊三年,鴻福堂仲想喺香港開多五十四間分店,想做多啲生意係好事,但小宗身為客仔,當然係望啲投訴數目,唔好跟住急升啦。 |