【動畫】花8萬買頭版廣告示愛！兵仔「U先生」真身就係佢
1 :
GS(14)@2017-02-11 18:56:51情人節就到，正當唔少兵仔度緊點樣可以同女神示愛之時，今日竟然有人喺《都市日報》頭版落廣告示愛，仲話「大家都說我是兵，我說我是屬於你唯一的司機。」喂！呢位阿生，阿「U」生，你竟然唔單止認自己係兵，仲要係一隻「運輸兵」！據廣告業探子回報，《都市日報》一個頭版8萬銀！喂！你好市儈，講錢？一段驚天地、泣鬼神嘅愛情，從來都係無價。正當全世界笑緊呢位「U」生係傻仔之時…神探C上身！冇理由！真係冇理由！成封表白信，由「天涯海角」、到用Eason嘅歌詞「不說一句的愛有多好」，再加埋好似吳三桂引嗰啲清兵咁，講咩心口有個勇字……總之所有elements加埋就係好典型…真係好典型，典型到一個位叫老土，而呢種老土似乎太刻意。更令人可疑嘅係，喺咁老土嘅情信入面，又好刻意地講到「司機」，講「兵」，好唔夾，你可以話係我多疑（咁女人多疑係天生架啦），你亦可以話係直覺！喺好奇心驅使下，我真係打咗去Uber公關問，「喂喂，阿U係咪你哋呀？」Uber公關一聽，然後笑咗出來，「哎呀！我唔答得呀！哈哈哈哈！你哋自己估啦！」聽到呢度，在下無眼鏡都忍唔住扮托一托眼鏡，「我係咪好聰明呢！」公關又笑「哈哈哈哈！總之你自己估啦。」「咁E係咩呀？Eat呀？Uber愛呀Eat呀？」公關姐姐又話，「總之你自己估啦，哈哈哈哈…你又幾聰明呢。」如是者，在下又由其他渠道問到，Uber為咗呢個Campaign，買咗三日廣告，即係今日，下周一、2月14日情人節。至於阿U先生真身，官方會喺最後一日先揭曉！呢個時候，要起歌了：情人節不要說穿……強調！利申！非廣告！本人一毫子都冇收到Uber
by千頌C@堆填區
http://fb.com/winbigwok
來源:
http://hk.apple.nextmedia.com/financeestate/art/20170211/19924722