ZKIZ Archives


最佳政改宣傳大使 沙膽彤

2015-05-04  NM  
 

 

陳智思落區宣傳政改被茶客阿姐噴到一面屁,陳智思個老婆係自己揀嘅,梗係口啞啞唔識答,計小宗話最好問吓過來人,新地大少爺郭炳湘,八十年代初其父郭得勝睇中上海搪瓷廠家顧林慶個幼女顧芝蓉(Lydia Koo),欣賞她的才幹,年紀輕輕已為獅子銀行旗下獲多利地產基金經理,有助郭氏家族在商場發圍,在老豆安排下,郭炳湘八二年娶Lydia為妻,結果婚姻只維持半年就觸礁。老豆幫你搵老婆,肯定唔掂。

另一富豪鄭裕彤未出世時已經由老豆同未來外父「指腹為婚」,其外父周至元是周大福創辦人,彤嬸當時可謂富家女,而彤叔年輕時亦獲外父賞識,喺澳門周大福打工,獲外父扶持,後來沙膽彤在香港地產界大殺四方,威過外父;而彤叔兩公婆幾十年感情都仍然維繫到,真正白頭到老,咁睇由老豆安排嘅婚姻又未必唔掂喎;計小宗話,如果彤叔唔係瞓緊覺,佢應該係政府嘅最佳政改宣傳大使。

坐穩條船呀!

近排唔少財經演員吹捧一隻叫新華匯富金融(188)嘅證券股,吹其剛配股後有機會賣殼予大陸金融機構,做證券行最緊要有fans,新華匯富有唔少漁民嘅好友捧場,其大股東蔡冠深喺越南做海鮮及地產生意,所謂虎父無犬子,佢伯爺蔡繼有做海產商販時就成立新華財務,借錢俾漁民買船,出海捕魚,漁民嘅「魚獲」就用以償還債務,其實都係high risk high return,所謂行船跑馬三分險,分分鐘遇上風浪一鋪清袋。科網股之時,蔡氏家族喺創業板搞咗間「Silk Road」,口痕友謔稱為「屍路」,炒個不亦樂乎後就見到啦,家陣改為搞博彩業,改名中彩網通,睇check record,呢隻新華匯富大上大落機會好高,班漁民fans坐穩條船!

金融逍遙客午夜凶鈴記得封口

游走於中港台併購、私募投資的金融多棲動物,現為多間上市公司主要股東及董事最近一單兇殺案,警察憑口供就老屈一名智障漢誤殺,做法人神共憤!做金融嘅,除了怕輸錢,一樣怕「午夜凶鈴」。曾被商業調查的人大概都有同感,打從收到風成為被調查對象的一天起,腦中必時刻盤算如何應對,那無形的精神壓力和折磨非外人可理解。曾有商界朋友清晨天未光被敲門請走協助調查,多年後的今日,晨早每當聽到門鈴聲,心還是會震一震!被帶走,最忌是神志不清時自辯。常與城中法律界人士吹水交流,聽其中一位大狀分享,原來在其接手的各樣案件中,大約八成時間(大狀按鐘收費),亦即八成費用,都花在推翻當事人被捕時不保持緘默而作的口供。面對陌生又恐懼環境,不做慣壞事的斯文人,往往傾向緊張地為自己辯解,主觀希望警察雪糕佬相信自己無辜。但經驗老到之士話齋,三更半夜帶閣下去一個陌生地方,應該不是善男信女。是不是害你姑且不論,應該肯定不是來幫你吧!退一萬步想,上到法庭再向法官講也不遲嘛,畢竟法治健全的話,法官才是掌握你命運的人,但若碰到中紀委,我勸大家還是早講早着,至少早點睡個好覺!

中環寸嘴大官上大官廳

工廈大王楊耀松長子,是各大有名食肆之VIP,喜歡研究已故及城中有錢佬對食之喜好,強調「貴」唔等如識食,自詡分享食經乃是提升讀者之水平。睇咗你哋上兩期Book B介紹羅傑承個女開嘅新食肆大官廳,即管去試吓,話晒我呢個順德佬係名正言順嘅「大官」呀!吖,個部長原來以前係四季龍景軒做過,叫Alan Tam;叫晒啲招牌菜,鬈毛豬叉燒、大官炒飯、黑魚子片皮鴨,都幾OK,最正係碗湯圓,用番薯蓉做餡,層皮透明嘅。話晒個地點係中環,以出品同價錢都唔算貴,遲啲有埋點心食,不過我問實Alan Tam,肯定唔會係隔籬,同樣係佢老細開嘅「來佬餐廳」攞啲點心過嚟至好喎!呢排個市都睇唔通,凡係唔上唔落嘅股票,我就同投行開Zero-cost option,話明Zero-cost,即係零成本,盡量唔使攞錢出嚟,好似我隻愛股中石化(386),個玩法咪買個put option,升到七個幾掟貨,呢隻為之上腳,但同時做番個call option,跌到六個幾我又兜番啲貨,此為下面隻腳,上腳對下腳比例做1:2,嗱,咁就真係有一腿啦!

擦鞋分層次

中環擦對鞋要收五百五十蚊,呢啲中環價值聽落真係嚇死人,五嚿半粗粗哋都買到對新鞋。小宗特意到置地廣場𥄫吓,見到午飯後時段,間鋪頭好鬼旺,洋人仲要排住隊等擦鞋。呢度有報紙睇,有冷氣歎,較戲院里疏乎好多;原來普通擦鞋七十至一百,師傅話五百五十蚊嗰款叫Mirror Shine,要花五至十日時間一層一層加鞋油,待乾再擦,讓鞋頭堅硬起來為之合格,唔少中環人喜歡著舊鞋(唔好誤會,皮軟,貪其舒適而已),再整次Mirror Shine,成對鞋立立令,所以擦鞋都分唔同層次。

猜猜我是誰

上個禮拜日黃昏六點幾,有個商而優則政嘅少爺一支公鼠咗入IFC間ZARA,猛咁摸人哋啲衫。莫非親自出馬,幫自己鋪頭抄橋?使唔使咁搏命呀?歡迎競猜呢位少爺係乜誰。請於香港時間星期三(13/5/2015)下午一時後來電郵提交答案。獎品係西班牙名釀Jaume Serra Cava(sparkling wine)一樽。只設一個名額,先到先得,不設上訴。

金牙大狀講嘢實時公布高官寫字樓溫度

環境局長黃錦星晒環保,話定有家規,要熱到28度至可以喺瞓覺之時開冷氣;佢仲話每個月都電郵電費單俾屋企人,以為警惕咁講。黃局長前任、冬姑‧廖秀冬定落,冷氣只可以開到25.5度嘅規矩,唔知黃局長以至所有高官嘅屋企同寫字樓可有遵守?本住資訊透明嘅原則,唔該各位高官實時公布屋企同寫字樓嘅溫度,等全個香港都知道佢哋有冇遵守官家定落嘅規矩。仲有,既然黃局長可以將電費單電郵俾屋企人,點解唔跟手上埋網,以昭告天下。既然黃局長可以咁坦蕩蕩,做乜特首同埋其他高官唔以黃局長為榜樣,將屋企嘅電費單、水費單、煤氣單通通公開?學前環保局長邱騰華話齋,環保係大家嘅事,萬勿以善小而不為。公開資料等大家有個知字吖,OK?

PermaLink: https://articles.zkiz.com/?id=145085

李曉佳﹕「沙膽彤」膽大心細

1 : GS(14)@2016-10-13 07:45:19

【明報專訊】人稱「彤叔」或「沙膽彤」的周大福集團及新世界發展(0017)創辦人鄭裕彤上月辭世,他過往曾經在股壇、併購市場及海外叱咤風雲。早於伊朗巴列維末代王朝倒台前,彤叔已聯同「賭王」何鴻燊一同合作在該國首都德黑蘭搞馬場,當年已經予人勇進的感覺,最後這項馬場投資因為巴列維王朝倒台而全面報銷,也難怪商界中人均稱他「沙膽」。但是在商場長袖善舞的「彤叔」,只是表面予人「沙膽」而已,實際上他建立的企業王國穩固如昔,若他空有「沙膽」,根本不能夠屹立至今。

筆者記得彤叔在2001年1月以周大福集團名義,聯同劉鑾雄昆仲斥資35.2億元收購現屬利福國際(1212)旗下的銅鑼灣崇光百貨,他當時接受記者圍訪時便提到,周大福在完成收購崇光後,手頭尚有60億至70億元可供動用。當年他名下只有新世界發展一系公司屬於上市公司,周大福珠寶(1929)仍未上市,周大福企業亦屬私人公司。

收購崇光 幾倍資金做後盾

彤叔的說法,既反映他的私人財富之多,但是細心從另一角度去看,其實正反映他勇於收購的同時,最少有數倍於他用作收購的龐大資金支持,即如收購崇光一役,他手上最少有三倍資金在背後支持。因此有前輩常提點筆者,不要只看彤叔表面的「沙膽」,他「沙膽」的背後有很多資金支持,亦反映他其實相當「穩陣」。

彤叔沙膽的背後,亦不乏風趣及幽默的一面。筆者記得有一次他和兒子鄭家純一同出席某一間報館在灣仔君悅酒店舉行的頒獎禮時,彤叔先行離場,在場有兩、三位小記追訪彤叔,嘗試問問他對地產市道有何最新看法時,他老人家笑笑口說:「你問番我個仔啦!自己已唔多理嘢啦!」他只是多答一兩句就走人。殊不知在兩三分鐘後,鄭家純步出會場時,同行其中一位小記搶著對「純官」說,你爸爸叫我們問你問題,「純官」當時停頓了一會,想了一想反問記者確定是老爸的意思後,即乖乖地詳細回答幾位小記關於樓市的提問。

交棒兒子全身而退

事後,雖然在場幾個小記對彤叔這招借子先遁的高招莞爾而笑,但是大家亦覺得,老父當年其實已經交棒兒子,索性由「純官」接力解答關於公司及樓市的提問,更為合適。身為全球最大珠寶商,彤叔更身體力行,實踐「力不到不為財」的道理。

筆者還記得,彤叔在2011年1月出席澳門旅遊娛樂的股東會後,當日下午筆者行經新馬路時,便發現他老人家獨個兒聯同幾位保安人員,一同到新馬路的多間周大福珠寶門店巡視,再慢慢踱步回葡京酒店方向離去。

身體力行 股東會後不忘巡舖

這刻的情景,仍然深深印在筆者的腦海中。畢竟彤叔早於1938年曾經替岳父周至元位於澳門的周大福珠寶金行打工,更自此開展日後多姿多采從商旅程。在眾多保安包圍下,筆者雖然無法隨身訪問他,不知道他在2011年初重遊舊地時有何感想。筆者當時跟他打招呼,他只揮手而過,但是他對澳門這個他曾經日以繼夜工作過的地方以及珠寶金行營運的重視,沒有在任何一刻放低過。

[李曉佳 財經澡堂]


來源: http://www.mpfinance.com/fin/dai ... 3385&issue=20161013
PermaLink: https://articles.zkiz.com/?id=311748

Next Page

ZKIZ Archives @ 2019