呢句咁獨到精闢既說話當然唔係出自老狐貍呢D老粗口中啦，而係小弟上日打開明報財經版其中一位作者引述一位國內股民口中的說話而撮成的，老狐貍睇後不禁叫左聲：「好！」，心中寫了鬥大的一個「服」字。
隨著近期個市轉好，呢期好多老狐貍之前推介過的股票如雅天妮(789.HK)，EDS Wellness (8176.HK)，華富國際(952.HK)等都叫破位而上 (952.HK停牌中，希望中)，但呢D都係經小弟用基本分析加少少財技加少少經驗和本能而成，仲要等成幾個月至半年至略有收成。
相反在小弟網誌中常常會就國內的消息或政策作出分析，在宏觀層面上叫大家留意下呢D板塊，記憶所及，我好早已經講一帶一路，互聯網+，亦有好多讀者因此而買左D鐵路股，或者係金蝶，金山軟件等(呢隻係我年度推介)，好短時間獲利比老狐貍更多。
由於現在係大牛市，亦係一個大型資金市，我們面對的是一大群手持大量資金，兇殘成性的鬣狗，只要稍稍在幾公里外聞到血腥味 (收到風)，就會不問情理地瘋狂追住狂咬，以其群眾圍捕，加上有力(資金)，不理獵物是否好味？有理無理把野鹿水牛箭豬食蟻獸追到有氣無地抖 (不理基本因素)，結果原本用長時間，用策略捕獵的獅子獵豹手足無措，唔識點去搵食。
那作為食腐動物的老狐貍應該如何自處呢？
過去狐貍一向跟隨獅子獵豹，觀察佢地既狩獵行為，希望跟到佢地少少，食下D肉碎骨頭，可以養妻活兒。但由於鬣狗的出現，草原的生態系統出現根本性改變，長時間及策略性捕獵雖然熟手，但由於獵物被追得遠遠，令狐貍常空著肚子守候，實在不好過。
作為一隻狡滑的老狐貍，梗係要學D古代人一樣「逐水草而居」，而狐貍就逐獵物去搵食，無論獅子、獵豹、鬣狗群經過，只要見佢地唔係想殺自己，就一於「狐假獅威」、「狐假豹威」、「狐假狗威」咁去跟埋出動，但當然要見機行事，獅子同獵豹一直唔會對食狐貍有興趣，跟到仍然可以大快朵頤，但如果對住班鬣狗，就一路食一路打醒十二分精神，咬一啖就睇一睇，否則………..大檸樂了。
好多謝明報俾左呢個標題我發揮，「亂世佳股」好似郁得快左，希望可以咬得安心D啦。
如大家有興趣，歡迎大家加老狐貍的FANPAGE交流下啦
https://www.facebook.com/oldfoxfanclub
老狐貍
