林作被飛 反咬麥明詩「我哋係朋友」
1 :
GS(14)@2016-09-09 05:36:47■被麥明詩狠撇的林作昨日蒲頭，強辯指從沒承認與麥明詩拍拖，但說時緊張到標汗（左圖）。
十優港姐麥明詩喊撇花心男友林作，兩人三年情斬纜，箍煲失敗的大律師林作失戀後昨日首蒲頭，現身金鐘出席咖啡小食店開幕，對於被女友降呢做「朋友」，林作回應分手時大玩語言技巧，強調從來沒承認兩人是男女朋友關係，反將了麥明詩一軍，但越答越標汗，滿頭汗水出賣了他內心的緊張。
■麥明詩大前日被影到漏夜上林作屋企執包袱，前日開工時強笑扮堅強。
■林作出席活動後搭電車返公司，全程愁容滿面。DV圖片
賴阿媽亂噏
問到跟麥明詩是否正式分手？林作將波推給對方：「我呢方面冇回應，由佢答，佢講嘅嘢我哋保持一致。」麥明詩回應指兩人現在是朋友關係，林作兜圈子說：「佢講嘅嘢我會採納，我哋一直都係朋友。」記者指兩人之前是男女朋友，林作律師上身玩語言技巧：「坦白講，我同佢從來冇喺任何場合話係男女朋友關係，都冇講過呢樣嘢，大家認為係吖嘛。」記者反駁他當時沒否認是情侶，林作強辯說：「其實我同佢都有否認過，不過主流傳媒最後都係扣帽子落嚟，呢啲我都明白娛樂新聞，我哋係畀人娛樂，我都覺得解釋唔清。」之前林媽媽都開口想認麥明詩做新抱，林作連媽咪都擺上枱：「我媽咪出名亂噏，信佢一成都……好。」追問跟麥明詩是否從來沒有拍拖？林作說：「我哋一直講法都係朋友，我完全同意呢個講法。」對於麥明詩回應二人關係時爆喊，林作停一停才說：「係咩？冇睇到。」叫他形容現時兩人關係，他說：「我哋傾過我唔會評論，跟佢講法。」問現時是否單身？他說：「呢個只係將問題包裝再問，所以冇回應。」現在可隨便去蘭桂坊玩？他說：「我有我嘅生活方式，由頭到尾都冇改變，人生自由好重要，我一直好自由。」問兩人仍否有聯絡？林作表示是朋友故有聯絡，問將來會否昇華做男女朋友？他說：「我個人諗法一定正確，所以交畀佢答。」是否劃清界線？他說：「我哋都係朋友，呢個問題答唔到。」
漏夜執嘢走
林作出席活動後單拖搭電車返中環的寫字樓，沿途眉頭緊皺，沒路人留意他，反而林作偷望追訪記者。而麥明詩大前日則被影到漏夜上林作屋企執包袱，一刀兩斷。採訪：馬建華、朱志聰攝影：陳順禎、羅德光
來源:
http://hk.apple.nextmedia.com/entertainment/art/20160909/19764778