中環在線：大劉仔坐歪轉做非執董 李華華
2008-10-31 AppleDaily
大劉劉鑾雄愛將甘比上周誕下女兒，大劉連日均探望她，十分忙碌。不過，嚟緊大劉喺公事上相信亦會一樣咁忙，因為噚日突然爆出大劉個仔劉鳴煒做埋今日就唔做華置執行董事，轉做非執董。嚟緊大劉可能要自己親力親為打理番啲業務，公私兩忙。
公關解釋：陪產
大 劉仔今年28歲，修讀法律，06年12月中先接替阿叔──細劉劉鑾鴻做執董，之後佢擔大旗負責公司日常業務，見記者同埋分析員，仲越做越好，好有紋路，完 全可以獨當一面，大家都諗住佢將來一定接棒，做華置話事人。點知佢o依家做唔夠兩年，突然話唔做。華置公關都度好理由，話大劉仔老婆明年初生得，佢打算未 來幾個月專心陪老婆安胎、生仔，冇咁多時間打理公司生意，所以轉做非執董就算。唔係話老公唔可以陪老婆生仔，有錢人做嘅嘢，通常都係你估佢唔到o忝，之但 係呢個理由會唔會牽強咗啲呢？唔使24小時陪住啩？工都唔返？做非執董每年得20萬酬金，唔夠使o架喎！
路邊社估：創業
中環 金融圈中人估計，劉鳴煒做事有規有距，唔似會私人投資勁損手，俾阿爸踢出局嗰隻；多數人估佢另有新動向，可能唔想靠阿爸，趁後生自己創業咁話。但係要留意 嘅係，華置得兩位執董，一位係大劉，另一位之前係細劉，細劉唔做變成大劉仔，o依家佢唔做，由邊位頂上呢？大家又可以估一餐嘞！唔知揸住華置9%嘅英國兒 童基金（TCI），得唔得閒關注吓呢？李華華
[email protected]