📖 ZKIZ Archives

業績簡評 - 大快活集團 (0052.HK) PARTIPRAL - ROAD TO FINANCIAL FREEDOM

http://partipral-hk.blogspot.com/2011/06/0052hk.html

營業額同比升6.6%, 下半年又比上半年多5%左右, 只係毛利率開始見頂回落, 始終食材價格, 租金及工資皆上升會開始見到有影響, 但毛利率仍比上年下半年及過往平均好.

行政開支及銷售開支上下半年比較差異不大, 導致純利下半年出現重大倒退純粹因為下半年沒有更多的特殊收益, 若撇除此項目, 上下半年的經營溢利皆處相若水平.

自己比較重視既內地業績, 營業額下半年比上半年增加12%左右, 但溢利反而倒退逾1成. 雖然內地表現整體比上年好, 但增長力度明顯比想像中弱. 管理層話下年會將內地分店擴充至21間, 即增加5間, 似乎係見到內地業務開始穩定下來, 所以開始想進攻, 要知道以往5年大快活從未試過於內地一年增加多過兩間分店, 下年如果真係增加5間的話, 算係頗進取了.

管理層亦都有提到最低工資的影響, 似乎看法比想像中樂觀:

"於二零一一年五月生效的最低工資條例 無疑為我們帶來人力成本壓力。然而，本集團相信，引進靈活上班時間將有效提高生產力，並有利逐步緩和人力成本上漲對邊際利潤的影響。儘管快餐業挑戰重重， 但我們的目標仍會是謹慎地擴展及爭取達至可持續的同店增長。雖然營運開支及食物成本上漲會影響本集團的邊際利潤，但在香港及國內的優秀團隊支持下，我們仍 很樂觀有能力將其影響減輕。"


今年為慶祝成立20周年, 特別股息大增, 派息率由往年平均的60%提升至73%, 可以預期的是肯定下年會回落. 估值方面以核心盈利 1.08億計, 現價 $11.06 P/E約13倍, 估值不貴但亦不算便宜. 現時要買, 純粹係押注在內地業務上.

由於時間異常緊迫, 詳細分析稍後追加.

再探討亞倫國際 (1) PARTIPRAL - ROAD TO FINANCIAL FREEDOM

http://partipral-hk.blogspot.com/2011/07/1.html

早前簡單寫過亞倫國際 (0684.HK 亞倫國際), 乘著最近公佈的全年業績表現不太理想, 股價下滑之下或許有機會將來買入, 特此再作跟進.

進行再度探討之前, 我想重申一下自己對亞倫國際的感覺:

1. 老牌工業股, 上市歷史頗長, 主力生產小型家電, 行業門檻低, 競爭甚大
2. 屬家族式經營, 過去多年營運成績顯示管理層經營手法傾向保守, 穩打穩紮, 而股東則安心年年分紅
3. 去年11月動用1.5億購入灣仔物業收租, 以本業純利率而言, 舉動不太合理

再回顧今年度之全年業績:

- 營業額增長22%, 繼前年後再次錄得明顯增長. 亞倫的主力市場雖然在歐洲, 但金融海嘯的影響明顯已完全消化. 下半年營業額雖比上半年倒退, 但同樣情況亦出現於10年上, 可視為正常;

- 毛利率比10年大降4%, 但呢個情況響出中期業績後已在預期之內. 管理層對毛利率下降主要有3大解釋: a) 商品原材料價格上升, b) 人仔升值, c) 勞動成本上升. 頭兩個原因解釋合理, 但不能完全接受. 原因係若然公司議價能力高強的話, 原材料價格上漲/人仔升值呢D大環境都在面對的問題, 理應可以直接轉嫁客戶, 要自己硬食既話, 即係行業競爭甚激烈, 要劈MARGIN攞單. 下半年的毛利率未有繼續轉壞, 可能係見底先兆, 但此點非常值得繼續觀察, 下期業績能啟示多一點亞倫的議價能力. 至於第3個原因, 可以自己查年報. 員工成本2.7億比10年多出7千萬, 亦即相等於3%左右毛利率! 得出既結論係, 反而員工成本上漲先係毛利率下跌的最大元兇, 前兩者純粹係點綴而已.

- 行政開支同銷售費用佔營業額的比例同10年差唔多, 無乜可以挑剔.

- 核心稅前盈利1.9億, 按年倒退約18%, 倒退的最大原因來自毛利率下跌.

由損益表可見, 亞倫國際今年表現上業績雖然不理想, 但有一個個人頗看重的亮點: 營業額增長. 若然再回顧過去5年亞倫的表現, 單睇營業額的話, 今年22億的收入竟然係5年前既2倍!

當然亞倫的營業額有點特別, 可以算係風險亦可以算係機遇 - 五大客戶佔整體收入比重高達94% (去年92%). 風險唔駛我講, 大家都知只要亞倫被其中一個飛起, 肯定會大受大擊; 但機遇係若然此5大客戶繼續壯大, 亞倫所得到的益處亦會非常巨大. 目前來講似係機遇多過風險, 不過仍然有必要提一提.

總括來講, 以小型工業股兼沒有自家品牌的背景下, 亞倫營收5年增長1倍其實係非常強大的表現 (同類型公司我能夠搵到較接近的只有信佳國際). 仲未計早兩年遇上金融海嘯時亞倫國際竟然係可以做到絲毫不損, 管理層的能力應該比想像中更佳.

所謂增長股, 前題必先係營收, 然後再到盈利. 成本能控制得好, 公司當然可以賺更多錢, 但最實際的始終係增加收入. 單從損益表而言, 表面上今年的核心盈利出現不少倒退, 但同時亞倫能把握到歐洲海嘯後的復甦而推高營業額, 算係一劣一優, 暫且打平.

再探討亞倫國際 [2] PARTIPRAL - ROAD TO FINANCIAL FREEDOM

http://partipral-hk.blogspot.com/2011/07/2.html

延續昨日未完成的專題, 今日會從損益表以外再探討亞倫國際的價值.

- 固定資產2.47億, 比上年度增加26%, 營業額亦有相應增長, 屬正常且有效率的投資.

- 存貨8千7百萬, 同比增加42.5%, 增長速度比營業額快...有關存貨, 其實我更想講既係, 我係唔太明白點解亞倫可以用8千幾萬去做廿幾億生意, 即存貨周轉率高達25倍以上! 以工業股而言唔單止係罕見, 直頭好到有點難以置信. 有可能係亞倫既產品極度暢銷 (亦代表亞倫客戶相當強大); 亦有可能係亞倫有部份訂單根本唔係自己做, 即係有機會係一個貿易公司既角色, 左手黎右手去, 賺取差價. 當然呢部份我係靠估而已, 但若然亞倫係後者既話, 25倍的存貨周轉率係可以講得通.

- 應收賬5.17億, 同比增加36%, 增長速度同樣比營業額快. 以延長收數期去谷營業額, 可能係來自新客戶. 若然係來自舊客戶的話, 亞倫5大客戶佔總收入高達94%, 只要他日有其中一個甚至多個客戶出現財政問題, 亞倫所損失的就唔止淨係收入, 仲可能要有筆壞賬要處理. 當然, 目前的情況可能未去到咁壞, 但今年的現金流就肯定會受影響了.

- 應付賬2.5億, 同比增加16%, 增長速度比營業額慢, 收錢慢俾錢快, 再次肯定今年現金流會減弱.

- 現金3.16億, 同比少左1.66億, 有部份用左去增添固定資產, 亦有部份用左去派息. 而今年本業現金流減弱, 亞倫的現金結存沒有增加屬可以理解. 負債方面只得一筆55萬的短債, 除左反映亞倫財政穩健外, 亦說明似乎管理層並不擔心街數會收唔返而影響營運周轉, 算係加多一重信心.

- 今年經營現金流得9千萬左右, 加上核心盈利的確倒退不少, 削減派息實屬非常正常. 有一篇財經新聞指出DAVID WEBB不滿公司今年的董事酬金響盈利倒退之下仍比去年增長2成至3千6百萬. 對此個人其實頗能理解, 但要知道亞倫從來都係一門家族生意, 響派息率沒有倒退的前題下, 俾多少油水班董事個人係能夠接受的.

對亞倫國際今年份業績數字上既分析就到此為止, 基本上風險同亮點大致上都頗明顯及容易理解. 今年年報上管理層所寫下的來年展望同往時比較其實已算係頗樂觀, 再加上大股東於業績公佈後曾於場內增持, 個人會比較傾向相信亞倫前景應不致於太壞.

估值方面, 2011年的每股核心盈利大約在$0.45左右, 每股派息$0.20. 現價$3.17即往績P/E 7倍, 息率6.3%, 不算平但亦不算貴. 今年度業績欠佳或許會導致股價未來半年都會持續受壓, 但有過去5年既出色表現支持, 我自己對亞倫的管理層其實頗具信心.

大跌一千點後再檢討投資組合 PARTIPRAL - ROAD TO FINANCIAL FREEDOM

http://partipral-hk.blogspot.com/2011/08/blog-post.html

今日恆指最多曾大跌1,241點, 以收市計亦要跌936點報20,946, 跌幅4.29%應該係自09年11月杜拜事件以黎最既大單日跌幅. 交易所內升1%都可以上十大升幅榜; 共412隻股票創52週新低, 當日不乏藍籌股國企股, 眼見恐慌情緒充斥整個市場, 今日想講下自己既多少睇法.

自金融海嘯後恆指一年內反彈逾倍, 姑勿論原因為何, 但牛市大勢已成後要扭轉其實非想像中容易. 今個星期港股大跌雖已可確認下破自去年10月延伸出黎之上落區間, 但往下仍然有19000-22500既橫行區作為重大支持區域, 此第一階段橫行區一日不破個人仍視恆指處於調整階段.

先確立一個較長線既睇法, 再決定如何參與股票市場. 若然認定熊市已臨, 咁依家仲揸股黎其實都冇乜意思, 反正過多幾個月一街都係平貨, 依家去下旅行先都得; 有信心確認牛市未死, 先可以再進一步思考如何構建投資組合.

個人投資組合今日下挫2%, 看似跑贏大市, 但其實手持一大堆市值較細既公司, 他日要追跌既話單日急挫十幾廿個%並非無可能. 趁市淡檢視投資組合, 其實唔係睇自己做得好唔好, 係睇自己有冇得做得更好.

個持倉比重最高之聯亞今日微跌1%收市, 但整體黎講全日都係主動沽盤較多, 唯一可以慶幸既係今日市場兩度出面一面倒恐慌之時 (早上開市頭半小時及下晝三點左右) 都無出現大舉拋售, 此現象我視之為利好. 始終要知道聯亞街貨甚乾, 差價闊過維港, 自上月發盈喜後連續兩日大成交急升, 強者收貨後如果要響市場大手沽出必然係不問價賤賣先沽到, 可以忍到手唔沽, 似乎係對業績頗有信心之舉動. 作為收風較遲鈍既老散, 仍然可以先等業績公佈後再決定.

另一隻重倉股大快活收市跌2.6%, 以其防守力而言其實已算跌多左. 其實我一向都認為一個健全既投資組合必定要加入防守股, 自己資本唔夠選擇不多, 但其實我一直都係幾鍾意中電(2), 港燈(6), 長建(1038), TVB(511)呢類股. 面對股市恐慌式急挫, 呢類股往往可以提供換馬資金. 即係如果我睇岩目標, 要開刀既都係搵大快活, 但因為目前未有更好既投資目標, 所以仍然會繼續持有.

至於新買入既亞倫, 原來係摸左個靚頂黎入貨, 正宗係擺都無咁準, 今日再跌3.5%, 收市後公司高層發表樂觀言論, 指"雖然歐美經濟前景不明朗，但公司生產並非高檔消費產品，目前未見訂單表現較過去差". 其實我自己公司正正係做歐洲生意, 又係D中低檔消費產品, 今年訂單的確比舊年多, 所以此講法個人都頗同意. 不過, 亞倫班高層一向都係大淡友黎, 近期幾次有機會出聲既場合都係一反常態唱好, 個人有多少不安既感覺. 買就肯定早左買, 但堅持唔亂加注, 風險仍然有限. 好記得舊年歐債危機果陣亞倫得番2蚊, 與之相較, 今日收報$2.78仍有好大段距離.

龍記今日跌3.6%, 出乎意料地跌得少. 近半年股價表現雖差, 但其實都只係同大市相若, 以中小型股而言原來已經算唔錯, 都係可以等業績; 至於新昌管理今日微跌, 個人覺得除左管理層可能有問題之外, 單以公司業務同派息政策黎講股價好大機會已經見底, 但仍想等待中期業績確認睇法.

震雄今日跌4.2%, 乃倉內表現最差之成員. 相比起震雄, 其實我更加關注行業龍頭海天既股價走勢. 海天有好多大行跟進, 近日跌勢加劇已非一句受大市拖累就能解釋到. 加上震雄剛公佈既全年業績其實比自己想像中相差頗多, 市況未急劇轉壞前仍不介意死守, 反正注碼不大; 但目前市況欠佳, 止蝕套回現金其實未必會係一個差既選擇.

今日開市時未有時間搞清楚應該點樣優化組合, 趁收市冷靜後再作檢討, 情形就會清晰得多. 面對突如其來既急跌, 一顆冷靜既心先係最緊要, 始終兵慌馬亂之時其實頗容易做錯決定. 當局者迷, 若然對住股價跳跳下會茫然失措, 其實可以試下先抽離, 等收市後先再諗. 縱然錯失先機, 但起碼經過深思熟慮, 效果未必會太差.

業績簡評 - 龍記集團 (0255.HK) PARTIPRAL - ROAD TO FINANCIAL FREEDOM

http://partipral-hk.blogspot.com/2011/08/0255hk.html

營業額同比下跌2.7%, 環比下跌4.9%, 主要係受日本地震同歐美經濟放緩所影響, 加上廠房搬遷, 訂單亦流失左唔少.

原材料成本飛升乃早已預計到既問題, 商品價格持續高企最終只會打擊企業盈利, 拖慢經濟增長. 有實力既公司往往可以將成本轉嫁俾客戶, 但龍記既情況係本身訂單已經少左, 為保生意議價能力自然更弱.

僱員數目增加, 但支出反減, 可能係同搬廠有關. 廣州市最低工資$1,100一個月; 河源$710一個月, 兩者比較差天共地. 搬廠對龍記長遠發展有一定幫助, 可視為利好.

固定資產大升3成但折舊數字不升反跌, 而稅率亦下降2個百分點, 加上為數3千幾萬既其他收入, 龍記先得以保持今期純利不致倒退. 若然以29%稅率計算, 核心盈利大概係1.38億左右, 實際同比輕微倒退2.7%.

短債增加4千萬而現金減少近1.8億, 原因係大部份去左浙江新廠房. 淨現金得番4億唔夠, 今期再無特別息派了. 應收賬應付賬規模下降, 佐證營業額下跌既講法, 存貨亦同時下跌, 說明實際現金流應不受太大影響.

前景展望, 管理層表明未來要依賴歐美推出新措施振興經濟及中國停止收緊銀根先有機會轉好. 但實際情況係歐美政府經已黔驢技窮; 而國內通漲明顯亦未受控, 要呀爺響現階段停止收水其實係頗不切實際.

現階段論前景其實仍然未明朗, 不過做生意唔係話見到風浪就可以摺埋收檔, 相信龍記管理層過往多年管治經驗, 要應付目前環境相信仍然係綽綽有餘. 新廠最快要2012年下半年先投產, 未來要催谷盈利唯有多從成本控制著手, 此乃最大考驗.

估值方面, 預期2011年全年核心盈利約2.75億, 每股約賺$0.44, 現價$4.60 P/E 10.5倍. 派息率保持60%, 現價股息率5.7%. 以工業股而言估值唔算平, 而且未來半年股價亦有頗大機會繼續向下修正, 個人會繼續持貨觀望, 但短期內催化劑欠奉, 要真金白銀加注目前仍未係最佳時機.

派得好投資組合月結 (Sep 2011) PARTIPRAL - ROAD TO FINANCIAL FREEDOM

http://partipral-hk.blogspot.com/2011/09/sep-2011.html

派得好投資組合月結 (Oct 2011) PARTIPRAL - ROAD TO FINANCIAL FREEDOM

http://partipral-hk.blogspot.com/2011/10/oct-2011.html

以今日收市價計, 投資組合現時持股狀況: