📖 ZKIZ Archives

薑是老的辣。曾於○二年創出一仙收購，被譽為「股壇壞孩子」的馮耀輝，三年前將上市公司旗艦禹銘賣走後，歸隱去也；去年他藉節能環保概念再戰股壇，並購入創業板公司快意節能。棚未搭好，中途旋即被體操王子李寧睇中，注入資產變身他的私人體育王國旗艦。

馮耀輝入股以來，快意股價急升十倍，馮氏賬面賺近七億。賺錢事小，信心「返晒嚟」事大。他說：「呢一鋪，只能以一個字形容：『爽』呀！」股票如是，古董傢俬亦如是。身為全國持有最多黃花梨、紫檀等古董明式傢俬的收藏者，這鋪最後的大茶飯，將更爽！

上星期創業板出現久違了的熱鬧；「體操王子」李寧宣布，將手頭上逾三成的上市公司李寧集團股份，悉數注入創業板公司快意節能。同時涉足內地遼寧及瀋陽等地產項目，銳意打造一個「結合住宅及休閒的體育生活環境」，這些重大收購，涉及資金九十億元。

「財神」送上門

快意節能大變身，原大股東馮耀輝的股份立時水漲船高。前年五月，馮耀輝才與老拍檔、已故馮景禧之子馮永祥，以每股七仙，即總代價七千七百萬元入股五成股 份。現時快意節能經李寧注入資產，股價已飛升至八毫，升了十倍！馮氏股權雖會被攤薄至不足百分之三，但賬面已賺近七億元！

又難怪馮耀輝能如此風騷：「呢一鋪，我只能以一隻字形容：『爽』呀！呢啲係紙上富貴，但我唔會視如浮雲。呢啲係烏雲，有水出嘅，可以濕吓口囉！」去年他替 快意節能引入已註冊專利的「熱能收集空調熱水器」，並找到電器商如海爾等合作，但今年初李寧突然主動透過中間人向馮耀輝敲門「要殼」；面對這個提早「甩 身」的好機會，馮耀輝與李寧首次見面已握手落實合作。

不少人對李寧這次將快意節能作為李寧集團的控股公司，都大惑不解，認為他日後會借機減持快意節能，這樣便可不失其在李寧的控股權又可套現。馮耀輝對此大賣關子，「你應該問李嘉誠，佢揸長實，又由長實揸和黃、長建、港燈，一層層咁揸，係咪最有效能，係咪最企業化先？」

賺到錢就買

馮耀輝揚言快意節能揸到十元（比現價再升九倍）才放，若然如他所願，屆時他便賺九十億，是一鋪「杰撻撻」的大茶飯！不過他○○年亦曾揚言手持的禹銘會升上 十元，當年至今禹銘未穿過一蚊，真箇信不信由你。今年六十四歲的他，個子不高，但眼神銳利，腦筋轉數高。答的永遠似是而非，估你唔到。但更估不到的，是這 名股壇老手，原來是全國收藏最多明式傢俬的人，在全世界亦排名第二。他笑說：「我唔敢認第一呀，認第二啦！」第一是大收藏家、持有全球最大獨立基金管理公 司Fidelity的家族。馮的私人展館正在中環都爹利街一棟寫字樓內。

推門進入馮耀輝以兩名女兒依凌及依琪命名的「兩依藏」藏館，只見放滿數十件古董紫檀或黃花梨明式家具；左面是紫檀黑漆描金多寶格，右邊是黃花梨透雕門方角 櫃……在兩個月前清朝乾隆玉璽也拍得一億二千萬港元、比二十多年前升值四百四十倍下，這些被大陸富豪奉為「居家必備」的明式傢俬，價格升幅難以估計。「新 做嘅黃花梨傢俬靚嘅都要過百萬元，古董多一個零，一件珍貴嘅更起碼過億！而家大陸咁多有錢人，一有錢就追求生活品味。值唔值係人定的，你話佢癲咩？聽日仲 貴呀！」

馮耀輝與明式傢俬，早於三十年前結緣。當初他買紅木家具布置家居，不想用了賣掉時，竟然值錢。反而西式梳化則掉落垃圾站也未必有人收，於是開始買比紅木更珍貴的紫檀及黃花梨傢俬來，「我一賺到錢就買，愈儲愈多，無咩現金揸手o架，老婆都話我發癲！」馮耀輝說。

內地騙局千奇百怪

他說收藏古董，按次序着重「美、真、稀」，「美」很主觀，「真」難考究。「要睇好多歷史書及文獻對證。有時件古董有缺失係正常的，如內地地下由古至今都係 成日濕??的，不太注重，故有啲古董櫈腳會係爛。有啲古董櫃少咗一、兩個抽屜，咁多年輾轉流落，跌咗有咩咁出奇？完整嘅先唔合理！」

內地收藏古董熾熱，自自然然就發展出一門騙案來。馮耀輝說，試過有騙徒與偏遠農村的村民「合作」，並在古董界散播謠言：「佢哋話發現嗰條村有村姑收埋古 董，啲人去到，就真係見到個村姑喺家門前耕田，問佢攞貨睇，佢就喊苦喊忽，話家傳之寶堅決唔賣！到最後梗係傾到個價錢，買返來又梗係發現假貨啦！」

有的造假，則將部分極殘缺的古董溝入新木，以圖魚目混珠，「有啲甚至將假貨放落屎坑整爛整臭佢！要辨別好講經驗，例如當時嘅年代方枱好普遍，無咁值錢，於是啲人將方枱鋸為長枱，但留心睇枱底嘅榫位及駁口位，就會發現改動過嘅痕跡。」馮耀輝說。

物講緣分廿年重遇

四年前，他按藏品出版了《兩依藏》一書，將黃花梨及紫檀家具分門別類成冊，結果不少人「按圖索驥」找他，「通常中國傢俬都是成雙成對的，有買手見我只有單 隻，就千方百計幫我搵番另一隻來。好處當然是可儲回一套，壞處則是他們都會吊高來賣。但我還是會買，試想想幾百年前是一對的東西，散失後再在這裡湊成一 套，當中已是一個歷史故事。」

他指了指一對紫檀梳背扶手椅說：「二十年前買時，本來是一對的，但取貨時物主說其中一把被偷去，於是我用兩萬元買了一把。二十年後，我在美國拍賣會遇到被盜去的一把，但這次買回來的價值，已是二十萬美元！」

收藏講緣分，也講情懷。馮耀輝說透過古董可重塑明清時代的民間生活。「當時啲達官貴人，係喺屋企養埋一班木匠的，唔似而家啲中產個個走去跑馬地，買一式一 樣嘅傢俬。當年家具件件都獨一無二，有件五角形嘅棋桌，好罕有，我幻想過，應該係屋主有一家五口，這張椅是讓全家一起玩當年流行的棋博，又或放在涼亭內， 讓一家人賞月乘涼的。」

收藏猶如玩股票

難得感性的馮耀輝，過去在股壇處處流露的，卻是要搵大錢的慾望及理性。他在美國工商管理碩士畢業後，先後加入加拿大帝國商業銀行及法國東方匯理銀行，八九年被新鴻基證券馮景禧的兒子馮永祥挖角，加入新鴻基，至九○年協助新鴻基工業上市，改名禹銘。

擁有魔鬼編號六六六的禹銘，最引人入勝要數○二年，接二連三以每股一仙收購中巴等疊水上市公司，但都以失敗告終。最賺錢一役，要數九九年幫壹傳媒借殼百樂門上市，還與馮永祥私人落袋兩億幾。四年前將禹銘大部分股份賣予聯合集團李明治後，去年馮氏才重出江湖。

他玩古董雖為興趣，但也是相當理性，他不諱言：「古董係生意來的，『玩意』同生意都是同一樣嘢！」現時明式傢俬已愈賣愈貴，他慶幸自己未賣走過任何一件，「收藏家葉承耀醫生本來都有好多，數年前他賣掉四十件，套來的那些錢現在買不回當中三、四件，他至今仍然很後悔。

「再者，拎住十億現金的人，入到大陸，內地富豪只會話：『哦。』但佢哋知你拎住嘅係十億明式傢俬，就即時感興趣，雙眼發晒光；好似多咗張度身訂做嘅咭片， 要傾生意或交朋結友，方便好多！」他以前曾購入山頂豪宅及其他住宅單位收藏家具，連帶一樣升了值；除了明式家具，他還早已收有古董胭脂水粉及現時內地富豪 新興收藏的沉香等，就搏一鋪能否大升值。這個搵錢道理，相信在馮耀輝心中，就如股票一樣。

富豪新玩意——沉香

沉香是在香樹樹幹受到傷病後，樹木為保護自身而分泌的膏脂狀結塊，並以香味、油脂比重、形態、大小來做沉香好壞的準則，一塊如手掌般大的天然沉香，可值過百萬元。內地富豪界流行效法古代皇帝「焚香」，品嘗釋放出來的香味，變相如「燒銀紙」。

步驟1

備香爐、炭精、鉗等用具。由於沉香在較低的熱溫中才釋放香味，故要撥鬆香爐內的爐灰，讓爐內均勻傳熱。其後將燒紅了的炭精埋在爐灰中，讓熱量透過爐灰向上釋放。

步驟2

用手測試爐溫。太熱，放上去的沉香會焦燶；太涼，又會釋放不到香味。

步驟3

在這塊值過百萬的貴重沉香上，用刀刮出木絲放在爐灰上。

步驟4

哄着香爐品味，靚的沉香會釋出混有雲呢拿、牛奶及蜜糖等的濃郁香味，令人一聞難忘。由於「頭香」最正，在聚會中，每人限只聞數秒便要交予下一個。

而家日日都有專家出來估樓市走勢，小宗搵來真正投資老手馮耀輝（Peter Fung）問吓，估唔到佢好決斷咁話：「冧！冧硬呀！」他預測樓價必大冧，而且起碼五成以上，主要因為美國加息。他並以「單車」比喻樓市，「而家個市叫呆滯，好似一架單車唔踩、停咗喺度，但單車係一定要向前或向後，否則停得耐都會冧低。」他認為現時的投資策略，是儲足資金，等大跌市時掃平貨。

數吓馮耀輝啲威水史，佢拍檔馮永祥（Tony Fung），喺九七年金融風暴前，高價賣走新鴻基證券，兩人合組禹銘，再喺○八年金融海嘯前賣走禹銘，只留下旺角中心、銀城廣場等地產項目。○九年佢同小宗講：「升！樓市升硬呀！」呢幾年樓價真係「巴巴」聲咁升，「馮兩老」隨之將大部分物業善價而沽，現時預留現金準備大跌市。馮耀輝對樓市辣招亦有意見，佢認為香港係自由市場，尤其金融，係「管不得」，「『設』辣招容易，但『撤』辣招就好難。到樓市冧先撤，只會冧多幾錢重。我認為金管局，亦唔應該對樓市有咁多措施同意見。」馮耀輝對政經時局牢騷多多，但要佢積極參與就耍手擰頭，寧願「隱身」投資，他打趣說：「哈，我最想俾政府嘅意見，係納妾合法化，我會拉埋老婆一齊支持！」

Give me a break直擊Social networking

晨早六點，當條街仲係小貓三兩隻嘅時候，斷估唔到油麻地城景國際酒店宴會廳入面，已經成個墟咁。個個化晒靚妝、著好西裝，拎住杯茶四圍social。在場者目的只有一個：識最多嘅人。呢個香港BNI（Business Network International）活動嘅負責人張國恩（Alex）話，與會者來自五湖四海：醫生、律師、會計、以至氣功師傅、臘腸店老闆、殯儀佬等等都有。每次聚會，會員都會有三十秒賣廣告兼「求助」。小宗呢日一早起身要聽五十幾人輪流發言，咪話唔眼瞓；會員為加深大家印象，奇招盡出，律師、醫生「舉牌」已係小兒科、做孕婦護理嘅帶埋假B上陣、攝影師出動巨相宣傳，有啲會員仲夾埋其他人一齊嗌口號。有旅行社老細拿起咪，即一輪嘴說：「去泰國，住四星酒店都係$1599，想要愉快假期，快啲搵我！」小宗開宗明義，話要搵「一盤生意」，手頭收咗幾十張卡片，當中有傢俬店老闆、晝廊負責人等等，有無用未知。出席呢個早餐會，盛惠一百八十元；想長期出席，入會費連首年會員費盛惠八千大元，相當揦脷。坊間仲有EGN（Executive Global Network）及香港天使投資脈絡等組織，前者模式同BNI相似，後者則透過座談會識人及搵投資者，個人會員一年會費千六元，另有其他要求。要識人建立網絡，最緊要目標為本！

橋唔怕舊最緊要受

上禮拜太子鉅龍酒家嘅老闆吳伯恩（恩記），放生咗隻玳瑁，引來全城哄動，仲上埋報紙頭版。上報嗰幾日，鉅龍日日有人圍觀，生意因為咁仲多到爆添！恩記夫婦向小宗回憶起玳瑁之來歷，當日一個手指緄晒黑邊、狀似地盤佬嘅人帶來玳瑁，要求劏咗來食，恩記話佢一向唔劏「龜」，故要求買落來放生。跟手，仲打埋去報館報料添！放生，一向是恩記「搶鏡」的招數；有「龍躉大王」之稱嘅佢，早年不斷放生巨型龍躉做善事，見過唔少報，宣傳效用之大，可謂一舉兩得。呢條橋，循環再用，用到佢由劏龍躉變咗全港最大海鮮批發商之一、用到佢喺太子開酒樓，喺上環開分店、最近佢哋仲購入荔枝角兩個鋪面，再開多間分店！此為「橋唔怕舊，最緊要受」嘅最佳明證！

本週金句王

有日小宗上大律師陸偉雄之辦公室，赫見這個由陸大狀門徒送予師傅的卷軸。睇睇，原來陸大狀平時講嘢，「字字珠璣」，年輕人想牙尖嘴利，學嘢啦！

金牙大狀講嘢新盤買家唔俾面

金管局攞命陳同埋財爺鬍鬚曾雙雙發警號，話花旗開始退市，資金遲早外流，打擊資產市場，樓市不難因此「下行」咁講。誰不知班買家唔俾面，上個週末兩個新盤異常熱賣。何也？一個可能性，班買家係非洲爵士烏蛇蛇，唔似得兩大官人咁高瞻遠矚，佢哋唔識得乜嘢叫退市，更加唔知資金外流會有乜後果；佢哋淨係見到樓價抵買，本於一貫執輸行頭慘過敗家嘅香港精神，紛紛入市。另一個可能性，係佢哋同所有香港人一樣咁消息靈通，知道乜嘢叫退市，明白資金外流嘅後果，但佢哋更加睇到樓市貨疏，再唔落疊則蘇州過後冇船搭矣。實情係乜，冇人知。但二手樓基本上零成交，即係未有人肯劈價。若果個樓市真係似得兩大官人言之鑿鑿會「下行」，你估啲人會唔會咁老定啦？