ZKIZ Archives


趁淡市再度檢視組合 PARTIPRAL 派得好

http://partipral-hk.blogspot.com/2011/06/blog-post.html

今日見震雄又跌多左, 趁市場氣氛甚差, 再次做一個組合小檢討.

雖然我股齡不深, 但都可以想像到2011年會係小投資者比較艱難既一年. 所持理據係一般公司09年盈利跌落谷底, 而10年回覆正常時就會形成超級反彈,  疑似增長但其實只係還原起步點. 公司股價表現亦類同 (貼近基本面), 往往係09年時極度低殘, 而當10年盈利反彈時股價亦會回歸正常估值. 能夠理解既係搏TURN AROUND STOCKS既時刻好大可能已經過去 (可能尚有個別例子), 此後公司能否再進一步, 若撇除外在因素, 就要視乎自身執行能力如何. 變相小投資者若要揀平貨買, 可能比2010年艱難得多.

檢視自己組合, 最重倉 (37%) 之聯亞(458), 正好係盈利反差巨大既好例子. 2010年正正係聯亞TURN AROUND既一年, 股價雖然已比9個月前翻一翻, 但估值上P/E 7倍仍然不貴. 當然賣得不貴既原因係在於市場顯然有多少懷疑聯亞既增長力, 否則以一隻具不俗內需概念既股份無理由10倍P/E唔夠, 但對呢一點市場目前究竟是對是錯, 仍然要等待8月既業績印證, 基於估值便宜既因素, 就算明年增長放緩, 受創程度也必不重, 仲未計股息回報, 所以對聯亞, 我係無咩好擔心的.

至於第2大重倉 (30%) 既大快活, 主流意見係認為響食材價格飛昇, 以及最低工資既年代下, 茶餐廳, 大快活, 大家樂等受創必深. 此等意見我係尊重的, 但我亦有一個比較主觀既概念, 兩大負面因素所影響既係整個行業生態, 而非個別公司. 大勢所至, 有危自有機, 按大快活中期業績推算, 全年較合理(或保守) 既每股核心盈利預測可能位於$0.94左右, 以自己買入價計12.5倍既P/E唔算特別便宜, 但亦唔係特別貴. 食材價格飛昇既因素上半年已經存在 (03/2010-09/2010), 當時毛利率仍然有能力擴闊, 比較合邏輯既推斷係管理層對此因素山人自有妙計, 不宜過份憂慮; 至於最低工資的影響, 今期業績未會完全反映, 但合理既想法係工資乃固定支出, 若然有辦法提升營業額, 實際影響可能比想像中細. 撇除本地業務面對既挑戰, 過去幾份業績其實亦顯示到大陸市場既盈利正在跳升中, 當然目前所佔整體盈利比重仍然較細, 但若然真係能夠將香港業務既特點成功複製, 亦不能排除他日有倍升既機會. 兩者取一個平衡點, 再結合其業務上穩定既特性, 大快活既基本面其實都頗為結實, 作為重心成員, 我都係睇得較樂觀. 當然一切都要視乎6月尾既全年業績表現如何, 若然基本因素有變, 形勢當然會重新審視, 此乃後話.

第3大重倉 (13.5%) 成員震雄, 近日走勢非常差, 將其表現放緒其他大大小小工業股例如偉易達 (303), ASM (522), 德昌 (179), 葉氏 (408), 亞倫 (684), 信星 (1170), 聯塑 (2128), 甚至同業既海天 (1882), 似乎震雄係異常走弱. 當然公司基本面有時未必係影響股價走勢既最重要因素, 但我有能力既亦只有從基本面去分析. 以一家中型SIZE (年營業額廿幾億) 既工業股來講, 預期22號公佈既全年業績每股核心盈利達 $0.47, 現價$3.62去計, 8倍 P/E都唔夠實在係太便宜. 當然, 戴倒後鏡睇野會好危險, 往績P/E不能過份依賴, 但事實上將來既事無人可以預測得好準確, 較低P/E可以為我地換來不俗既防守力, 都係講緊最初個理念 - 睇錯時所受創既幅度. 所謂既公司執行能力, 業績上自然會反映, 雖然最近一入即蟹, 但呢隻艇我其實坐得頗心安理得.

至於兩隻持倉較細既股份, 龍記情況其實同震雄都頗相似, 中型工業股近來並不受市場擁護, 但其息高兼估值便宜既因素非常切合個人口味 (呢點帶多少主觀); 而新昌管理上年度份中期業績異常驚嚇, 但下半年己大幅改善, 可以預期今年度份中期業績亦應回歸正常 - 即比起上年度有很大反差, 屆時若有機會我反而有興趣加大倉位. 當然現時 P/E 達15倍以上肯定唔便宜, 甚至係倉內估值最貴既股份, 所以持倉比例不宜太高, 目前10%以下是適中的.

好抱歉, 整個組合檢討好多論據都係舊調重彈, 但事實上當我重新GO THROUGH一次組合時, 得出的結論的確同早前的無異, 分別可能只在於市場氣氛.

檢討既目的在於探討自己有無辦法做得更好, 例如組合成員變動或資金調配等等. 寶光(84), 經濟日報(423)呢D一直在我重點WATCH LIST既股其實股價一直都冇太大郁動, 前者甚至升得太多, 所以我根本無太大選擇的空間; 至於現金水平, 我過往半年一直都係全攻型的, 即全段時間都係近100%全倉股票. 此打法有辣有唔辣, 剛好過去半年所遇著既係大橫行市, 恆指點穴不動, 有人有能力24500沽, 22000渣, 食盡上落市入面幾個小浪; 亦有人有能力早早選中189, 3323等倍升股; 若然兩樣能力皆沒, 即類似我呢類人, 有幸會有聯亞呢類股點綴下, 但更大可能係過去半年來組合都係上落不大, 呢點大家可以自己問自己. 鬼唔知最起碼都要跑贏大市咩? 若然大市橫行仍可以力保不失, 其實已經算不錯了.

趁淡 淡市 再度 檢視 組合 PARTIPRAL 派得 得好
PermaLink: https://articles.zkiz.com/?id=25876


ZKIZ Archives @ 2019