ZKIZ Archives


出櫃中環 萬南

1 : GS(14)@2012-11-18 14:30:42

http://www.metrohk.com.hk/index.php?cmd=detail&id=199340&search=1
近期社會興講同性戀,萬南亦都趁熱鬧講呢個題目。金融界素來被人感覺幾開通,但其實好多同志都怕被排斥,照樣藏匿櫃中,冇乜人夠膽公開同志身份,就好似千幾間上巿公司之中嘅管理層,記憶之中只有白花油(239)王子顏福偉承認出櫃。
查實上巿公司嘅管理層,仲有不少人係同志,只係低調處理,就算畀人知道,亦莫畀人見到,所以佢哋開派對都好神秘,其中一名富豪接班人,亦是疑似同志,礙於老爹仍揸大旗,未敢公然斷背;而另一位曾經結婚嘅富二代,離婚後據聞亦都轉軚。
咪以為中國人先至守舊,萬南有位喺四大會計師樓工作嘅朋友,年輕有為,做嘢亦好搏命,所以上位極快,正當差唔多爬到去做合夥人,突然被人揭破同志身份,公司驚佢影響專業形象,希望佢低調行事,就係咁樣,佢嘅仕途亦被煞停,呢位同志朋友當然無癮,最終選擇起身離去,跟佢嘅生活上「合夥人」唞唞先。
咁又係嘅,佢哋搵落好多銀兩,兩個人早年喺中半山掃咗好多層物業收租,依家已升值不少,而佢哋亦相當識歎,喺中半山打通咗四個上下左右嘅單位自住,計落身家都有好幾個億,足夠食過世。
2 : GS(14)@2012-11-18 14:30:59

who?
3 : 寧采臣(25759)@2012-11-18 15:06:38

萬南
筆者為資深中環
金融界人士

依D作者好多都係幻想出來, 一係就作者用真身寫文
4 : GS(14)@2012-11-18 15:08:05

好多真人都唔敢...
5 : 寧采臣(25759)@2012-11-18 15:09:58

4樓提及
好多真人都唔敢...


理解, 但自己又唔開名, 寫文又唔開主人家名, 老吹都得
6 : GS(14)@2012-11-18 15:10:40

5樓提及
4樓提及
好多真人都唔敢...

理解, 但自己又唔開名, 寫文又唔開主人家名, 老吹都得


咁仲死
7 : 肥B(18468)@2012-11-19 12:09:41

打通4個單位呢D「大動作」, 如果一次過做的話, 實會有人知, 個作者唔敢吹水吹咁大既...
8 : GS(14)@2012-11-19 23:06:17

7樓提及
打通4個單位呢D「大動作」, 如果一次過做的話, 實會有人知, 個作者唔敢吹水吹咁大既...


咁呢個人應該唔難找
9 : 寧采臣(25759)@2012-11-19 23:07:36

8樓提及
7樓提及
打通4個單位呢D「大動作」, 如果一次過做的話, 實會有人知, 個作者唔敢吹水吹咁大既...

咁呢個人應該唔難找


Broken Back真係好多
10 : GS(14)@2012-11-19 23:08:18

講下啦中環人
出櫃 中環 萬南
PermaLink: https://articles.zkiz.com/?id=281968

萬南 二五中環 鷹君財技高 咪接火棒

1 : GS(14)@2013-05-11 15:54:19

http://www.metrohk.com.hk/index.php?cmd=detail&id=210756&search=1

                      

五一黃金周期間,萬南有位大陸熟客嚟香港血拼,小弟負責盡地主之誼,招呼佢一家飲飲食食及安排酒店,以為酒店貴到飛起啦,點知尖沙咀五星酒店都係千零蚊一晚,平到嚇一跳,問酒店老友先知,今年全港酒店入住率都差咗。



  
             喺呢個時候,鷹君(041)主席羅嘉瑞宣布有意分拆旗下3間酒店,分別係尖沙咀嘅朗廷及逸東、以及旺角嘅朗豪酒店獨立上市,形成類似派高息嘅Reits,目標係一眾息魔。有高人進言咪幫襯,事關酒店業已開始轉勢,而且鷹君嘅分拆眼光甚準,06年趁市旺分拆冠君(2778)上市,如果由第一日揸到依家,股價跌咗唔少,買家就算有息收都冇甜頭呢。                    

夜期滿月帶旺食肆
唔經唔覺,港交所(388)夜期已經滿月,結果生意一般,唔少夜期經紀都相當得閒,上網打機多過接柯打。不過,夜期亦帶挈一批開到夜深嘅茶餐廳,有啲經紀會趁夜期收市後約埋過嚟食宵夜,亦有一批經紀情願叫外賣。
以前未有夜期,中環除咗老蘭一帶之外,其他地方都冇乜人氣,但自從夜期開始,好多茶記都延長咗開工時間,原本更有意多請員工送外賣,不過最低工資啱啱加到$30,老闆大呻好難請人,惟有睇定啲再算。

新地飯堂大廚被挖
香港唯一嘅米芝蓮三星中菜龍景軒,一向係好多中環富貴人家嘅飯堂,新地(016)郭氏兄弟一家係四季酒店嘅老闆,自然經常嚟捧場,據聞郭老太非常咁欣賞大廚馬仔嘅手藝,每次老太食飯都例必搵馬仔親自揸鑊鏟炮製美食。
早兩日萬南幫襯龍景軒,諗住順道叫馬仔出樓面敍舊,點知經理話馬仔已經冇做喎。幾經八卦,先知馬仔被內地富豪賞識,請佢到上海搞新會所食肆,專門招呼非富則貴嘅內地人。有熟人話要龍景軒大廚薪金已經唔嘢少,而且年尾花紅好大嚿,強國富商能夠請得馬仔離鄉別井,出手肯定非常高啦。

金舖谷數奇招賣金
黃金周假期,大批強國人湧嚟血拼,正因為金價插水,所以滿城盡掃黃金飾物,金舖生意好到不得了,金至尊老闆黃英豪話生意多咗五成,金器幾乎賣清光。某的金舖老闆更呻補貨都嚟唔切,於是叫夥計搵返啲倉底賣剩蔗出嚟應市,照樣畀人掃晒。
呢位金舖老友話聽聞有啲規模較細嘅行家,趁住呢次大浪,出咗怪招力谷其他生意。條橋相當簡單:金器呢期唔憂賣,所以有人收起金飾扮缺貨,人客嚟到就冧佢地順手買玉,咁就確保有金買。呢招真係奏效,令到玉嘅去貨急增,有玉器批發商話,近期多咗零售商大手入啲幾千蚊貨色㖭。
萬南 二五 中環 鷹君 君財 財技 技高 咪接 火棒
PermaLink: https://articles.zkiz.com/?id=282814

萬南 二五中環 外資驚冇「高而富」

1 : GS(14)@2013-07-19 01:34:02

http://www.metrohk.com.hk/index.php?cmd=detail&id=215713&search=1
近期城中熱話,肯定係應否收番粉嶺高爾夫球場,唔少意見認為球場只益一班富商,拆咗佢最好不過,咁樣大孖沙就冇波打笑呵呵。其實城中超級富豪,好似超人,榮太子(圖)或者協成行老闆方潤華等人,即使係粉嶺會員,但卻嫌遠路程,平日打「高而富」都喺深水灣居多,雖然呢個場較細只得9個洞,但來回打兩次咪當完成標準18洞。
今次事件,最牙痛嘅應該係一班外資機構,事關好多外資公司多年以來將亞太區總部搬到中環,早早買落「高而富」會籍供駐港高層享樂,若果真係清拆粉嶺球場,加上香港嘅空氣質素愈嚟愈差,想話叫人做亞太揸fit人都幾難咯,萬南聽到好多賓架講,香港若果連一個似樣啲球場都冇,點配做國際都會呢又?但亦有多口仔話,賓架其實可以移師香港附近嘅觀瀾湖。

依家咁多人反對,其中一個主因係政府賤租土地畀球會,令人覺得冇善用土地,高人獻計話,只要收番市值租金,令庫房有合理收入嘅話,肯定一家便宜兩家着。

正所為一石捲起千呎浪,萬南唔少朋友都買咗大批會籍,買嗰時當然冇諗過塊地係咪問政府租借,依家粉嶺出事,立即第一時間了解清楚,以免當日用幾十萬買番嚟嘅會籍變成廢物。
萬南 二五 中環 外資 驚冇 高而 而富
PermaLink: https://articles.zkiz.com/?id=283532

萬南 二五中環 陳南祿戀制服

1 : GS(14)@2013-07-19 01:34:45

http://www.metrohk.com.hk/index.php?cmd=detail&id=215713&search=1

做咗好多年國泰(293)行政總裁的飛臘陳南祿,轉咗工做恒隆(010)董事總經理後,少咗喺鏡頭面前出現,上星期佢老兄代表恒隆搞新制服揭幕禮,帶領一眾模特兒喺中環行貓步。飛臘陳對搞制服當然有一手,事關每次國泰空姐換制服,例必成為市民熱話,故此每次都搵著名設計師操刀。
今次飛臘搵咗著名嘅Lulu Cheung設計十幾套制服,其中最特別之處係連孕婦服裝都包埋,可見相當細心。恒隆今次創商場先河,搵設計師改look,原來係飛臘睇唔順眼,事關以往旗下各省市嘅商場服務員制服,全部各自為政,全無企業形象可言,唔襯恒隆做內地商場一哥嘅決心喎。
萬南 二五 中環 陳南 南祿 祿戀 制服
PermaLink: https://articles.zkiz.com/?id=283533

萬南 二五中環 高盛做埋財仔?

1 : GS(14)@2013-07-19 01:35:15

http://www.metrohk.com.hk/index.php?cmd=detail&id=215713&search=1

財務公司(俗稱財仔)喺香港開花片地,發展到抵押名牌手袋都得,近日更有某大財仔搞毋須親身上門借錢㖭,可見市場認真受落,亦多咗好多生力軍湧現爭一杯羹。有老友話投行大哥高盛亦唔輸蝕進軍咗呢個市場,萬南喺高盛有大批老友,冇理由收唔到風啫,求證過後先知高盛財務同高盛只係名字相同,全無關係喎。
其實財仔嘅運作公司,普遍都係靠一眾老闆夾資金出嚟放貸,借得多總有子彈用完嘅一日,所以要另覓水喉,於是乎有財仔公司諗到條好橋,就係挖街外疊水人士做金主,上律師樓辦正式文件,年息高達十至廿厘,聽落非常吸引,但回報高風險亦高,制唔制要認真諗諗。
萬南 二五 中環 高盛 做埋 埋財 財仔
PermaLink: https://articles.zkiz.com/?id=283534

萬南 二五中環 霍大班殼王密斟

1 : GS(14)@2014-02-25 00:52:41

http://www.metrohk.com.hk/index.php?cmd=detail&id=228374&search=1

好多人以為有錢佬傾密偈,一定喺5星級酒店,不過和黃大班霍建寧(圖右)同殼王陳國強(圖左)就示範咗並唔需要,上星期中環密使喺和記大廈嘅地舖咖啡店Habitu撞到佢哋飲下午茶,每人一杯熱啡,加埋一張紅衫魚都唔使,之後二人就坐近窗口位密密斟,密使嘗試坐近佢哋,八吓有咩堅料,但好可惜只聽到笑聲,最後兩人傾咗大半粒鐘,才施施然一齊離開。



  
             霍大班唔止同殼王老友,原來佢哋辦公室非常近,霍大班當然坐鎮和記大廈,而殼王老巢則喺隔籬嘅美國銀行中心,佢哋嘅位置去港格或者文華呢兩間5星酒店都有段腳程,所以一得閒就約埋飲嘢,情願貪就腳搞掂。
萬南 二五 中環 大班 王密
PermaLink: https://articles.zkiz.com/?id=284351

萬南 二五中環 芬佬搶保利文化

1 : GS(14)@2014-02-25 00:53:11

http://www.metrohk.com.hk/index.php?cmd=detail&id=228374&search=1

以下為笑話一則,上星期飲茶隔籬枱坐咗批散戶,不停高談闊論講股,席間有人話依家啲新股愈嚟愈離譜,萬南以為對方有料到啦,於是聽吓佢發表偉論,點知佢誤以為今日開始招股嘅保利文化(圖)係「普洱文化」,竟然話「教人飲茶都可以上市。」
查實呢間保利來頭極勁,係內地龍頭冧把溫藝術品拍賣行(外資拍賣行不得喺中國境內拍賣中國文物),其中佢哋每年搞嘅春秋二拍,更係業內一等一盛事,好多幫有錢佬掃藝術品嘅經紀會親身到現場。
就以舊年為例,喺中國成交金額最貴嗰兩件藝術品,包括價值1.28億人仔嘅黃胄名畫《歡騰的草原》,以及創中國古典家具最高紀錄,成交價9,300萬人仔嘅乾隆紫檀浮雕四件櫃,都係由保利促成。
據有玩吓字畫同古董花樽嘅投行K講,拍賣行認真好賺,事關抽兩邊佣各畀成交價15%,由於利錢深開支又唔大,所以毛利率接近八成,分分鐘拍得住賣酒水嘅Magnum,但香檳雞尾酒講緊每支一千幾百蚊,藝術品則每件一千幾百萬,可想而之賺到笑呵呵。
亦因為咁嘅緣故,唔少芬佬已吼實保利文化,早喺幾星期前已經頻頻敲門問負責呢單刁嘅保薦人中信證券要貨,但由於有太多基金都咁做,所以大家頂多分得雞碎咁多,焗住上市後喺市場掃。響咁嘅情況,保利有乜理由唔大升,萬南有好多老友都話要頂頭槌炒一轉。
萬南 二五 中環 芬佬 佬搶 保利 文化
PermaLink: https://articles.zkiz.com/?id=284352

萬南 二五中環 眾安開始Big Tea Rice

1 : GS(14)@2014-02-25 00:53:56

http://www.metrohk.com.hk/index.php?cmd=detail&id=228374&search=1

舊年11月㡳,萬南係全港首個專欄作家唱好眾安房產(672),理據係眾安食正阿爺大搞城鎮化概念,連環公布兩個杭州新項目,都由鎮政府出地,眾安負責動遷,平整土地後再攞出市場拍賣,投行老友更即時飛杭州拜會董事長施侃成(圖),佢結論係實食冇黏牙,等食Big Tea Rice,即係大茶飯呀!
結果呢餐飯遲遲未食出,股價一直喺$1.4橫行,成交亦得雞碎咁多,就連自己都懷疑係咪收錯風。幸好近日終於發力,8日內跳升至$2.5,累計升幅接近八成,而且棍棍有力,成交額更試過單日億億聲,似乎真係有人開始做嘢,大家可認真留意吓。
萬南 二五 中環 眾安 開始 Big Tea Rice
PermaLink: https://articles.zkiz.com/?id=284353

萬南 二五中環 證監難查文化中國春江鴨

1 : GS(14)@2014-03-17 22:32:16

http://www.metrohk.com.hk/index.php?cmd=detail&id=229721&search=1

上星期馬雲旗下阿里巴巴公布大舉入股文化中國(1060)(圖),消息一出,翌日文化中國股價5分鐘內急升至$3.39,較停牌前升日咗4倍幾,之後開始派貨大行動,股價跌到一仆一碌,上周五收報$1.72。萬南知道好多自以為叻仔嘅散戶嘗試撈底,結局好似用手捉實跌緊落嚟嘅飛刀,損手流血居多。之後市場懷疑有人收到風在先,早喺文化中國停牌前大舉掃貨,其中尤以新鴻基金融嘅客人最狠,假設停牌前後低買高沽,呢鋪短炒勁賺2個億,難怪股壇長毛David Webb亦建議證監會開file,調查有冇春江鴨偷步。




             不過高人話以往類似嘅案件,通常都係指有手握堅料嘅金手指幫助至事成,否則要查清件事就難咯。高人理由有二︰幕後玩家通常用人頭做嘢,唔會現真身;第二係好多緊貼魚缸嘅散戶,習慣見某隻冧把成交大増,有理冇理博大霧衝入去,希望坐順風車,正正因為多咗呢批心口掛個「勇」字嘅散戶,勢必增加調查難度。講開新鴻基金融,萬南再補一筆,行內都知佢哋嘅「擒派仁仕」(Compliance)要求有幾高,聽聞好多喺銀行跟大客嘅經紀,只要冧得貴客歡心,好多時下一站都係跳槽新鴻基,只要經紀帶到幾個客過檔,已經發過豬頭,幾個月執幾球佣金嘅大有人在。至於點解新鴻基咁慷慨派佣,下一次有機會再講。
萬南 二五 中環 證監 難查 文化 中國 春江
PermaLink: https://articles.zkiz.com/?id=284406

萬南 二五中環 中環好多「都教授」

1 : GS(14)@2014-03-17 22:32:40

http://www.metrohk.com.hk/index.php?cmd=detail&id=229721&search=1
萬南嘅公司有唔少八十後,近日唔知點解,一批身形瘦削嘅後生男同事,不約而同變咗同一個look,齊齊頭髪向下梳,每人一個新秀麗(1910)黑色大背囊,大惑不解。後來有高層講解,萬南先知原來大家扮緊韓劇《來自星星的你》嘅男主角金秀賢,劇中佢飾演嘅都教授就係咁樣,冧死不少女粉絲。髮形易改,但原來要買呢個包包絕唔容易,事關套劇係中韓同步播放,好多人睇見都教授用呢款包包,立即撲去門市搶購,結果火速斷市,萬南公司就有一個同事遲咗買,竟然叫居住新加坡嘅家姊喺當地買一個空運到港。由此可見新秀麗業績應該唔錯,難怪已有分析開始唱好股價。
萬南 二五 中環 好多 教授
PermaLink: https://articles.zkiz.com/?id=284407

萬南 二五中環 賓架搶7欖門票

1 : GS(14)@2014-03-17 22:33:00

http://www.metrohk.com.hk/index.php?cmd=detail&id=229721&search=1

香港國際七人欖球賽將會喺3月尾舉行,由於好多老外都視呢個賽事係派對盛事,所以好多投行及湊貴客嘅銀行賓架,每年例牌要搶飛送禮。記憶之中,國泰航空一直係7欖嘅title sponsor,近年由於活動太受歡迎,於是衍生co-sponsor,而呢個位置變得爭崩頭,之前幾年都係瑞信攞到,但近兩年則由滙豐包辦,線人估計滙豐應該花咗唔少錢至投到。
不過線人相信滙豐絕對物超所值,除咗做成龐大宣傳外,搞手亦會送番一定數量嘅門券畀贊助商,足以令旗下賓架滿足貴客胃口。無需好似其他銀行咁四圍搶飛,有啲老友更要1月中七人欖球賽公開售票時嘗試買飛,由於人數眾多,要抽籤決定,依然唔得焗買”yellow cow”。
萬南 二五 中環 賓架 架搶 門票
PermaLink: https://articles.zkiz.com/?id=284408

萬南 商觀點二五中環 合和中巴早有「牙齒印」

1 : GS(14)@2014-07-14 21:25:27

http://www.metrohk.com.hk/index.php?cmd=detail&id=237197&search=1
灣仔合和2期籌備超過廿年,合和(054)老闆「哥頓」胡應湘為咗呢個心肝寶貝, 不停修改圖則,最近又再向城規會提交發展方案,但被大批街坊反對,擔心加重區內交通負擔,其中一個星級反對者係中巴(026)顏氏家族,理由係影響其家族大宅重建為十五層高豪宅嘅計劃。
位於堅尼地道嘅顏家大宅,係已故嘅顏成坤故居,位置喺正合和2期地盤嘅後面,若果合和2期如願起幾十層樓高,多數會擋住顏宅重建後嘅景觀,或會影響樓價,所以要畀啲「顏色」合和睇,冇咁易畀你發展。

事實上,合和中巴早喺09年結下牙齒印,當年顏成坤兒子顏亨利竟然出席灣仔居民大會,表示合和2期會阻塞顏宅出入口,甚至影響附近一帶嘅消防車路,不過合和後來反擊,指顏宅出入口根本擅自改變。結果雙方拖拉足足6年,至今問題仍未解決。
萬南 觀點 二五 中環 合和 中巴 早有 牙齒
PermaLink: https://articles.zkiz.com/?id=284833

萬南 商觀點二五中環 導盲犬 變康宏員工

1 : GS(14)@2014-07-14 21:26:20

http://www.metrohk.com.hk/index.php?cmd=detail&id=237197&search=1
好多公司都會落重本,聘請代言人借勢宣傳,但康宏理財(1019)近期有新明星加盟,不單零成本,最重要係永遠盡忠職守,康宏高層老友甚至希望其他公司挖角。咁鬼得意,因為佢係一隻導盲犬,名叫Nana。
高層話最近公司請咗一位失明人士,而佢又有隻經專業訓練嘅導盲犬,為咗鼓勵佢哋加油,批准Nana免纏狗繩喺公司內自由行,更劃咗專用位置畀佢休息。由於一個月「試用期」已過,Nana表現對辦,康宏終於發出一張員工證畀Nana。高層老友話呢招既可幫助有需要人士,亦會提升公司形象,話唔定吸納一班狗主或失明人士幫襯買理財產品?。
萬南 觀點 二五 中環 導盲 盲犬 變康 康宏 員工
PermaLink: https://articles.zkiz.com/?id=284834

萬南 商觀點二五中環 葉茂林借十億抽新股

1 : GS(14)@2014-07-14 21:27:22

http://www.metrohk.com.hk/index.php?cmd=detail&id=237197&search=1

今年眾多新股之中,以超額倍數計,反應最勁肯定係夜場股Magnum(2080),首日掛牌急升九成,不過原來係放煙花,之後無以為繼,上市兩個月後更發盈警,跟手跌穿招股價,到依家仍全無起色,「缸」湖中人大讚老闆葉茂林(圖)財技了得,要喺佢身上贏錢唔容易。
其實人稱「皮蛋葉」嘅葉茂林好鍾意炒新股,財經界早就有傳玩得相當狼死,上星期終於有證據曝光啦,皆因「皮蛋葉」旗下另一上市公司耀才證券(1428)刊登最新年報,其中有一欄披露各董事嘅金融服務協議,原來耀才喺上一個財政年度,預留咗10億元嘅credit line畀「皮蛋葉」借嚟抽新股,結果佢亦唔客氣借到盡。雖然年報冇透露佢炒邊幾隻新股,但肯定係贏多輸少,否則「皮蛋葉」都唔會食過翻尋味。
至於其夥計「股壇大隻佬」郭思冶,公司都醒咗條1億銀嘅credit line畀佢抽新股,不過佢就冇好好利用,成年夾埋都只係用咗3萬銀,怕且只係夠用嚟抽iBond。又難怪大隻佬嘅,佢成日要出鏡講冧把,冇抽始終都客觀啲。
萬南 觀點 二五 中環 茂林 借十 十億 億抽 新股
PermaLink: https://articles.zkiz.com/?id=284835

萬南 二五中環 有銀士請人聽許仕仁案

1 : GS(14)@2014-08-16 16:50:40

http://www.metrohk.com.hk/index.php?cmd=detail&id=239161&search=1

上星期去港島香格里拉「夏宮」飲茶,喺廂房門外撞到好耐冇見嘅大狀P,以為佢準備飯後到隔籬高等法院開庭,佢就笑笑口話「答啱咗一半」,原來佢確實係要到high court,不過今次只坐旁聽席,聽審新地(016)同許仕仁呢單世紀大案。




             法律界秒秒鐘計錢,P君絕唔會「貪得意」嚟旁聽,原來佢係受客戶嘅要求,全程派人聽實呢單案,每日筆錄所有重點,盡可能將原文對答記錄下來。其實新地呢單案咁轟動,每日有傳媒大篇幅報道,好多人都連續追睇,唔明點解會要花錢派人旁聽。大狀官P就話萬南有所不知,傳媒只係對千六萬聘請陳德霖呢啲juicy新聞有興趣,好多庭上爭拗嘅技術法律觀點既悶且難明,一概省略唔報,而呢啲先係有銀士覺得精華所在,或者自己公司都有出現類似嘅問題,總之有則改之,冇則嘉勉,因此使啲錢請人旁聽取經。大狀P當然口密,冇透露邊個大財團或有銀士聘請佢,但強調唔係新地水哥郭炳湘,事關水哥已經搵咗清洪派人嚟聽審,而佢亦間唔中在庭上遇到清洪,不過今次大家都坐旁聽席,而且並非對陣,感覺都幾得意。
萬南 二五 中環 有銀 銀士 士請 請人 人聽 許仕仁
PermaLink: https://articles.zkiz.com/?id=285070

萬南 二五中環 解構 初級銀行家

1 : GS(14)@2014-08-16 16:51:06

http://www.metrohk.com.hk/index.php?cmd=detail&id=239161&search=1

早前bloomberg出獨家料,透露大摩計劃向「初級銀行家」大幅加薪四分一,有口痕友話認識唔少iBankers,當中有老有嫩,但從未見有卡片職銜印上「初級銀行家」。
銀行係一門見人嘅生意,所以對外job title inflation在所難免,換轉你係有銀士,都唔希望搵件初哥嚟湊你啦,因此VP副總裁真係一街都係。有非常資深大摩iBanker向萬南講,公司內部早已劃線,VP級數或以下都屬junior,呢個階層嘅員工流失率素來甚高,而且金融海嘯之後,投行出花紅手緊好多,令到junior怨聲四起,公司為咗保持競爭力,焗大幅加人工。佢更預計其他投行亦會稍後跟做,否則分分鐘出現跳船潮。
萬南 二五 中環 解構 初級 銀行
PermaLink: https://articles.zkiz.com/?id=285071

萬南 二五中環 打簿仔奇遇記

1 : GS(14)@2014-08-16 16:51:35

http://www.metrohk.com.hk/index.php?cmd=detail&id=239161&search=1

萬南有位伯娘移民海外多年,極少返香港,留低間屋放租以及燈油火蠟嘅費用,都係靠自動轉帳找數。上星期佢回港探親,萬南同佢食飯洗塵,食完伯娘就攞本紅簿仔出嚟,想我幫忙去銀行打簿。萬南望望呢間中資銀行,分行喺正我公司樓下,便一口應承。入到銀行,左望右望都唔見有打簿仔機,實Q話要埋櫃位做,已經令我嚇咗一跳,今時今日櫃位成本超高,通常趁機冧客做交叉銷售,邊會做呢啲婆仔嘢。排隊一輪終於到我,職員聽到我要打簿,再揭去睇最後打簿日期係8年前,不自覺「唉」了一聲。原來,呢間中資銀行好有交帶,每逢客人打簿,都會將歷來每一筆交易帳目列印出嚟(其他銀行只會印最近半年嘅交易,再之前啲會統其成),結果我足足換了4本簿仔,企足20分鐘至完成,由此可見呢間中資銀行尚有大把改善空間。
萬南 二五 中環 打簿 簿仔 奇遇
PermaLink: https://articles.zkiz.com/?id=285072

萬南 二五中環 衍生熱爆定價留水位

1 : GS(14)@2014-10-18 23:18:53

http://www.metrohk.com.hk/index.php?cmd=detail&id=248023&search=1

衍生熱爆定價留水位




             呢排新股表現相當靚仔,一眾細細粒嘅公司,更惹嚟瘋狂認購,好似今個星期四上市嘅衍生集團(6893),話晒係香港知名品牌,集資只係兩億幾,又食正呢排藥股當炒,自然爆到七彩,公開招股超額860倍,打入今年超倍榜頭5名,有入飛嘅芬佬已預計派得唔多,焗住上市後搶貨。招股反應靚絕,衍生絕對可以$1.2嘅招股價上限上市,但主席彭少衍係老實人,認為賣藥呢行唔鍾意賺到盡,所以上市前無將公司現金盡派自己袋,更決定預留輕微水位,以$1.18掛牌,取其意頭「日日發」,希望同股東共創雙贏,公司因此少收幾百萬元。衍生最為香港人熟悉嘅產品,係嬰幼兒飲嘅「開奶茶」,更係市場上同類產品嘅龍頭,經常見到強國人嚟香港超市藥房掃貨。老闆彭少衍更瞓身力谷呢隻王牌產品,除咗親自參與廣告度橋創作,就連自己嘅WeChat戶口,亦都以「開奶茶」做自己稱號,藉此滲入式宣傳。原來衍生仲有一大批中成藥排緊隊推出,據聞單係為咗註冊呢批藥,衍生已經花咗過千萬,彭老闆做咗好多市場研究,發現嬰幼兒發燒,依家好多家長都係餵西藥,但就食到小朋友好散,所以即將推出嘅退熱中藥,成分用咗羚羊絲,彭老闆話呢隻中藥原材料超貴,但成效顯著,所以貴一貴都值得。
萬南 二五 中環 衍生 熱爆 定價 水位
PermaLink: https://articles.zkiz.com/?id=286145

萬南 二五中環 大孖沙坐港鐵避「佔中」

1 : GS(14)@2014-10-18 23:19:41

http://www.metrohk.com.hk/index.php?cmd=detail&id=248023&search=1

近排佔中搞到港島大塞車,好多藝人都改搭港鐵。閣下睇緊呢篇文章時,如果正係坐緊港鐵,不妨暫停做低頭族,望下四周,睇吓有冇明星喺附近。其實除咗娛樂圈,好多金融界或上市公司老闆,都變咗港鐵常客,貪其時間較易掌握。
好似信和(083)大老闆黃志祥咁,以前久唔久都會單拖坐港鐵,據聞近排更隔日見佢蹤影;而香港電視(1137)老闆王維基,如果要由葵涌公司總部去金鐘,亦會叫司機車佢到尖沙咀,自己坐港鐵過海。至於另外一位非常有名嘅賓架,呢排將辦公室暫搬九龍東,佢家住中半山,聽聞公司安排兩部車,一部由屋企車佢去中環,另一部喺尖沙咀接佢,仲要由一位助理跟出跟入。點解?因為賓架十幾廿年未坐過港鐵,八達通都冇張,公司驚佢搭錯綫喎。
萬南 二五 中環 大孖 孖沙 沙坐 坐港 港鐵 鐵避 佔中
PermaLink: https://articles.zkiz.com/?id=286146

萬南 二五中環 創板新股 好過中六合彩

1 : GS(14)@2014-10-18 23:20:09

http://www.metrohk.com.hk/index.php?cmd=detail&id=248023&search=1

上星期五,創業板有隻新股樂亞國際(8195)上市,由於係全配售,圍內人玩晒,散戶冇得認購,只有125名幸運兒獲派股份。樂亞以$0.6掛牌,首日收報$4.15,狂升5.9倍!股東真係笑到見牙唔見眼。
喺呢125位新晉股東之中,有5個係超級幸運兒,事關樂亞今次配售1億股,佢哋已瓜分咗6千2百萬股,大約每人可得千零萬股。若果以首日每股賺$3.5計,每人可執3千幾萬,仲多過中六合彩頭獎。相信你睇到呢度,最想知點可成為呢批幸運兒,答案係“guanxi”,你懂的。
萬南 二五 中環 創板 新股 好過 六合彩 六合
PermaLink: https://articles.zkiz.com/?id=286147

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019