ZKIZ Archives


【我Q你答問會】人人問發哥 「賭神呃人㗎!」

1 : GS(14)@2016-07-06 08:11:28

■周潤發雖然演過賭神,但原來他唔識鋤大Dee。攝影:陳順禎


周潤發日前去了老婆陳薈蓮的娘家新加坡宣傳《寒戰2》,做完宣傳會留在當地度假一星期,在他離港前,《蘋果動新聞》邀請他做「人人問發哥」環節,請來一批市民考考發哥。雖然發哥的賭神形象深入民心,但他笑言唔識賭錢,賭神全靠液晶體眼鏡呃人,認真爆笑。問到通識問題,被喻為最貼地的民間特首發哥,一般都能對答如流,但仍然會被郵費幾多這類問題難倒!採訪:倩宜





Q1.范先生:Show Hand入面最大副牌係乜?發哥:老老實實,你唔好搵呢啲嘢嚟蝦我,我話晒都係賭神嚟,其實我係唔識嘅。鋤大Dee我都唔識,賭神唔使識,呃人之嘛,有個液晶體眼鏡就得㗎喇!





Q2.黃小姐:香港本地平郵幾錢?發哥:仲有人寄信咩?我唔識寫字,冇寄信好耐,雖然舊陣時我做過助理郵差。而家平郵使唔使$1.1呀?係咁上下啦,你哋寄多啲信啦。(答案:$1.7)





Q3.洋先生:想請問吓九巴61X嘅起點同終點站喺邊?發哥:你當我係邊個呀?站長呀?我阿爸開九巴㗎?我鬼識呀?我最多係坐7號由九龍塘去尖沙嘴。(答案:九龍城碼頭至屯門市中心)





Q4.麥先生:發哥,知唔知邊條係全港最長嘅行山徑?發哥:大家都以為麥理浩徑100公里好長,其實唔係,現時有條150幾,喺八仙嶺嗰頭兜一圈。





Q5.Carrie:發哥,facebook有個捕獲你嘅群組,你知唔知最多合照嘅地方係喺邊?發哥:行山囉,都係城門呀、大帽山嗰邊多。





Q6.Jason:發哥,你覺得整一個盆菜最重要嘅靈魂係咩?發哥:個盆囉,係咪咁話呀?其實對我嚟講盆菜最緊要係豬皮、蘿蔔。而家有黑松露嗰啲唔啱嘅,盆菜嘛,盆菜好粗嘅嘢嚟。





Q7.楊小姐:發哥,你知唔知道菜心幾多錢一斤?發哥:楊小姐,老老實實,阿太好錫我嘅,呢啲嘢通常係佢去街市聯絡好晒,等啲人送過嚟,幾錢斤可能佢都唔知,佢月結嘅。





Q8.李小朋友:美國幾時選特……總統呀?發哥:美國無特首得總統,特特特特特!李小朋友,呢個選舉將會喺今年嘅11月選,祈望新一屆總統,為世界帶來和平。(答案正確)





來源: http://hk.apple.nextmedia.com/entertainment/art/20160706/19682554
答問 人人 發哥 賭神 神呃 呃人
PermaLink: https://articles.zkiz.com/?id=302711


ZKIZ Archives @ 2019