ZKIZ Archives


中環食肆水盡鵝飛 宗菁華


2011-3-10  NM




三八婦女節前夕,股市延長交易時段,上下晝各早開半粒鐘。唔好睇小呢半粒鐘噃,禮拜一晏晝,中環食肆通通水盡而鵝飛!點解?

得一粒鐘食晏,經紀同埋啲炒家點食得切呢?落樓上樓埋位埋單,在在需時;計過條數,唔夠鐘出街食,焗住叫飯盒三文治,咁啲食肆有乜辦法唔學得李清照話齋,尋尋覓覓冷冷清清淒淒慘慘戚戚呢?中環租金搭火箭,再又遇上延長交易時段,你叫啲食肆怎麼辦?怎麼辦?

股壇長毛David Webb認為香港忝為世界三大金融中心之一,有必要同先進國家併軌;而併軌之道乃在延長交易時段 —— 及學得華爾街咁食晏無休。觀乎延長交易時段而仲未取消食晏之中環狀況,即使佢老哥業已升呢為夠資格攞六千蚊之永久居民,睇怕佢忘記咗一個基本事實:唐人以 食為天。鬼咩,佢來自英倫!弊。

印度裁縫轉數高

印度裁縫Raja Daswani狙擊「抽水大王」官永義,一經敝刊報導,聲名大噪。近日佢一轉口風,話唔作全面收購永義,更加開始減持。結果?禮拜一永義股價應聲滑落六個巴仙。但一切於佢無損,事關佢手頭嘅股票已升值近倍,袋袋平安矣。

佢老哥食住個勢喺自己本行出擊,玩其團購。上個禮拜四佢喺ubuyibuy現身,以優惠價$888賣價值$4,000之度身做西裝。

唔知係佢老哥夠號召力,抑或係團購嘅魅力,短短一日之間,250張優惠券盡數沽清,認真犀利。佢老哥轉數高成咁,好彩佢不為已甚,冇將場狙擊戰堅持落去,否則官永義都幾濕滯。執番身彩,仲唔去做番套新西裝還神?

強積金貨不對辦

正是一石激起千重浪,鬍鬚曾要注資強積金兩百四十億元,非但激發萬人上街,人人更因而『目及』多兩眼自己個強積金戶口。不『目及』猶自可,一『目及』唔少人至發覺班基金經理如何食人唔『舌累』骨,唔少人更又發覺唔少基金貨不對辦。

即以信安之香港股票基金而言,開宗明義話係「主要投資於香港股票市場」,但睇清楚其所持之股票,當中赫然有2.38%為怡和控股。眾所周知,未過渡,渣甸業已搬到新加坡掛牌矣。

又如信安之「美元儲蓄基金」,既為儲蓄,衰到貼地亦係冇息收而已,係咪?然而自○○年推出至今,其累積回報竟然係負2.86%;喺○七、○八年,其回報更劇跌9.23%。紅簿仔最多咪冇息收,點都不致蝕入肉啩?啲高官強迫人作此投資,唔上街咪真係當正你係病貓?

搬一搬獅子升三成

獅子錢庄新大班歐智華雖然已講到明佢老哥唔會搬竇返香港,因為鋪頭總部設在英倫,佢一搬,每年只可以留喺英國八十九日,做生意會好方便。但如果鋪頭都搬埋,咁咪冇呢個牽制囉?

果然,英倫之《星期日電訊報》透露,雖然獅子錢庄否認會搬竇返香港,集團其實已經考慮過其可行性。何以要搬?英倫非但皮費貴,稅更加重。搬返香港將大大改善其股東回報。有股東更作過估計,只要一公布搬,股價大有可能即時彈升三成咁講。

形勢比人強。所有公司都要向股東負責,獅子亦唔例外。有現成辦法可以即時大幅提高股東回報,班管理層若果唔認真諗諗,你估佢哋想唔do乎?

田王之都有逸夫樓

眾所周知,六叔邵逸夫乃上海阿拉,但喺盛產田王石之福建福州壽山鄉原來佢都有唔少粉絲擁躉,更加有人以佢之大號為自己之樓房冠名,足見捧場。

壽山鄉有名得過你叫,盛產田王壽山石。國家唔少人響應鄧總舵主號召,先富了起來,故此大有餘資炒其田王石。當下田王比價格拔足狂升之黃金更加貴,只要係真貨,一克要成人仔一萬大元。

矜貴成咁,壽山鄉由是到處張貼告示,「嚴禁開採,違者以盜竊罪論處」。社會主義中國「依法治國」,實情又如何?梗係執輸行頭、慘過敗家,你有你禁,我有我掘也。有乜辦法呢?掘田王仲好過掘金噃,唔掘又豈非搵自己笨?


中環 食肆 水盡 盡鵝 鵝飛 菁華
PermaLink: https://articles.zkiz.com/?id=23136

【先達收風】先達水盡鵝飛 店主:新年後可能執笠

1 : GS(14)@2016-01-18 01:34:12

先達廣場以往一向是低價買手機及放機地方,但近年聲譽變差,不少人對「先達」兩字避之則吉,加上上月實施的競爭法,令先達手機價位比百老匯、豐澤低不了多少,再加上早前炒燶6s一事,令商場的小商戶更難經營。記者早前去到先達掃場,光在地面一層就至少有五個吉舖招租,二、三樓更多,問及相熟店舖老闆,他認為現時先達聲譽太差,生意難做,「有某幾間黑店令到成個先達個朵臭晒,將翻新機當新機賣,出過幾次事啦!依家根本就無人會嚟,未來幾個月,慢慢會有更多店舖執笠呀!」他又形容競爭法令先達本來擁有的平價賣點全無,街外其他店舖都可以相同價位賣機,「店舖開始轉型,只做收機或維修,唔敢入新貨喇!」他指場內店舖大多營業額不足以支付租金和燈油火蠟,農曆新年過後應該會有更多商店離場,分分鐘包括他自己。記者:方健銘



光是地面一層,已經有至少五個吉舖招租。

就連二樓電梯口亦罕見人影,可見先達的冷清程度。



來源: http://hk.apple.nextmedia.com/su ... t/20160117/19455077
先達 收風 水盡 盡鵝 鵝飛 店主 新年 可能 執笠
PermaLink: https://articles.zkiz.com/?id=294418

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019