ZKIZ Archives


【未必係傑青 但唔係廢青】喺韓國畫雞畫狗 好過你做牛做馬

1 : GS(14)@2016-10-13 08:09:39

早前六位網絡漫畫家上韓國綜藝節目玩,其中一位就係GASFARD(右圖)。(《無限挑戰》截圖)



【三個粉絲追韓劇】近年好多韓劇都改編自網絡漫畫,例如《未生》、《奶酪陷阱》、《好運羅曼史》、《打架吧鬼神》等。韓國網絡漫畫界發展蓬勃,早前《無限挑戰》就以網絡漫畫做主題,請咗六位網絡漫畫家上節目玩。其中一位係外形似足藝人趙寅成嘅GASFARD,喺節目播出後一炮而紅,因為佢將《無限挑戰》主持畫成動物,相當神似搞笑!三位粉絲專程坐KTX由首爾去釜山拜訪GASFARD,訪問借用咗一間咖啡店嘅場地,店長同店員一見GASFARD就好似小粉絲咁,爭住要同佢影相,仲時不時偷影佢做訪問,簡直人氣爆登!



GASFARD個樣好似藝人趙寅成。

GASFARD嘅成名作係動物漫畫,佢將主持畫成動物,神似又搞笑。(《無限挑戰》截圖)

GASFARD畫阿仙畫到奸笑。

GASFARD即場將動主播阿仙、viu韓劇導賞員Ruby和繙譯Joyce畫成動物,佢話:「阿仙好似貓仔咁瘦小,所以我覺得似Cornish Rex。」佢畫完之後對住阿仙奸笑,有啲怕羞又擺出副可愛樣,事關佢嘅畫風唔係唯美,唔玩可愛,反而用誇張和搞笑嘅形象表達,所以畫完佢自己都笑!GASFARD靠住獨特畫風,用動物做主角,畫出成名作《선천적얼간이들》。佢話:「漫畫內容都係我生活中最搞笑、最得意嘅回憶,好似日記咁嘅作品。」點樣為之成名作呢?梗係唔似得香港咁,將漫畫公仔擺喺漫畫星光大道就代表紅。韓國最大網站Naver有漫畫平台Webtoon,一日流覽量就高達600萬,仲有中文版。GASFARD話最初喺Webtoon發佈作品都係為興趣,無錢收,估唔到大受歡迎。畫咗三、四個月,儲到啲人氣,就收到Naver邀請佢轉做正式Webtoon作家,佢就一於辭埋份工,全職畫漫畫,做正式連載。



佢話阿仙瘦小,似貓品種中嘅Cornish Rex。

網絡漫畫喺韓國超流行,劉在鍚話每年有超過560部漫畫連載。(《無限挑戰》截圖)

《未生》作者尹泰浩可以話係「星級漫畫家」,收入可能拍得住藝人。(《無限挑戰》截圖)

韓國漫畫界係玩經理人制度,將漫畫家變藝人賺錢,好似GASFARD就試過幫時裝品牌賣廣告。GASFARD話近年韓國出現「星級作家」、「星級漫畫家」,就好似《未生》作者尹泰浩。尹泰浩好多Webtoon作品都被改編成電影、電視劇、音樂劇、動畫等,最近仲為熱播韓劇《W-兩個世界》創作漫畫部份,呢類超人氣作家嘅收入可以拍得住演藝人!
GASFARD出道得3年幾,梗係無尹泰浩前輩咁多元發展,大部份時間都係專注畫畫同趕稿,佢話:「一朝早起身就開始畫畫,到睡覺前都係繼續不停咁畫!」要chur到盡,因為韓國網絡漫畫界競爭大,劉在錫喺《無限挑戰》講過,Webtoon一年有570部作品連載,網絡漫畫作家人數超過4600人!



最近尹泰浩有份為《W-兩個世界》創作漫畫部份。(《W-兩個世界》截圖+網上圖片)

人人睇網絡漫畫,傳統漫畫書又點生存?三個粉絲拜訪曾經借場畀《來自星星的你》

Webtoon咁勁,傳統漫畫書又點生存?因為《來自星星的你》取景而出名,花香滿溢漫畫屋嘅老闆娘Kim Eun Ju話,「真正鍾意睇漫畫書嘅人,都唔太睇Webtoon,我嘅客人都好少搵Webtoon作品嚟睇,除非改編咗做電視劇或者電影,先會有客人嚟搵。」不過,佢話o依家客人的確減少咗一半,同漫畫沒落無關,反而係因為競爭大咗。佢話:「由上年年尾到今年五月為止,喺本店周圍開多咗五間新式漫畫咖啡店!」新式漫畫咖啡店贏在裝修靚,服務好似餐廳咁,唔似得舊式嘅只有零食、杯麵,所以老闆娘話:「客人七成都係男仔,女仔都去晒新式漫畫咖啡店。」



花香滿溢漫畫屋嘅老闆娘,佢話鍾意睇漫畫書嘅人都唔睇網絡漫畫。

老闆娘話客人係少咗,不過唔係漫畫沒落,係周圍開多咗新式漫畫咖啡店,裝修靚啲又似餐廳。(右圖為網上圖片)

場地提供:Cafe IRANG主持:動主播阿仙、viu韓劇導賞員Ruby記者及繙譯:卓惠媛(Joyce)攝影:陳家文、李錦鏵《無限挑戰》片段由Viu提供:
https://goo.gl/IYmQQ0【三個粉絲追韓劇】
http://hk.apple.nextmedia.com/enews/animation/kfans/




來源: http://hk.apple.nextmedia.com/entertainment/art/20161013/19798779
未必 係傑 傑青 但唔 唔係 係廢 廢青 韓國 畫雞 雞畫 畫狗 好過 你做 做牛 牛做 做馬
PermaLink: https://articles.zkiz.com/?id=311863


ZKIZ Archives @ 2019