橫洲風暴中，十八鄉鄉事委員會主席梁福元爆響口，謂橫洲背脊「丫髻山」乃是香港十大名穴之一，興建太多公屋群怕影響風水。嗱，小心呀，八十年代初興建橫洲工業村時，村民恐防工廈太高影響其族人風水，為保「名穴」抗爭到底，七、八十歲嘅阿婆遂到元朗警署門口淋屎淋尿。呢個「屎尿陣」非常奏效，大家見工業村的樓宇高度只是兩、三層樓高咋。 貴為十大名穴，小宗即管爬上丫髻山，feel吓嗰度啲靈氣，從山上能遠眺后海灣以及上村的觀音山，風水師觀龍謂：「呢個名穴叫玉女拜堂，丫髻成誥軸之花，專出郡馬（即駙馬），鄧氏族譜有記載，在宋朝當官的鄧氏四世祖——鄧符協，佢都係風水先生，打大風時經過屯門、元朗一帶，睇到呢度風水好，返到江西直頭將江西嘅祖墳搬嚟呢度定居。」而丫髻山另一名穴叫「仙人大座」，能大發丁財貴；鄧氏如此多名穴，後人有田有地又有丁，多得祖先不惜淋屎淋尿都要保住風水寶地！ 董伯伯人老心不老 董伯伯牽頭成立團結香港基金之初，已被謔稱為「耆英會」，嗰三位重量級名譽顧問為九十九歲的饒宗頤、八十七歲的楊鐵樑以及九十四歲的楊振寧教授；不過董伯伯深懂「人老心不老」，團結基金上週同中聯辦合辦的「創科博覽 2016」，演辭特別強調世界最高科技成就的科學家多麼年輕！替科學家逐個「數牌」，如研發北斗導航的徐穎是八十後，主導研發全球第一顆量子通訊衞星的潘建偉是七十後，而參與開發高鐵列車的賈利民，亦「只是六十後」，嗱嗱嗱，「只是……」六十後，難得七十九歲的董伯伯心境年輕，依然有心有力拖埋董太團結香港，齊齊撐場！ 中環寸嘴無「國師」傍身生意大極有限 楊國佳 工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。 香港地以前發三師：律師、會計師同埋醫師，家陣乜都講風水，最發應該係凌駕三師之上嘅「國師」，起碼市場有 demand嘛，你睇陳振聰嘅全港最大遺產案，涉及二千幾億，試問有邊單 M&A有咁大額？有錢佬通常都有兩、三個「國師」傍身，否則其生意大極有限，取其交叉共通點，因為生意佬深明七分實力三分運，所謂風水佬呃你十年八年，咁就已經兩個 business cycle啦，不過據我所知，勁嗰啲「國師」，晨早已經被「私有化」咗啦，所謂千金易得，名將難求。 早排去新加坡，試過間米芝蓮兩星 Les Amis嘅姊妹店—— Pollen，打開餐牌見有個「 Cocktail Pairing」，我行走歐、美都真係未見過， cocktail呢家嘢通常僆仔僆妹飲嘅啫，實在難登大雅之堂，吖不過有驚喜喎，可能呢度有花園供應新鮮香草做 cocktail，我行走江湖，竟然衰喺杯 cocktail手上，冇食早餐空肚隊一杯，搞到我頭 wing wing行錯路！嗱，呢度食晏就抵， set lunch五十五蚊坡紙，平過晚餐一大截，仲可以由餐廳穿入去「有料溫室」 Gardens by the Bay，咁就慳番廿八蚊坡紙入場費，而且日頭去 refreshing啲，望住室內光猛大花園，好過夜麻麻，你估非洲和尚黑夜入黑森林打烏鴉咩！ 陳南祿「剝衫」撞板 恒隆老闆陳啟宗咁得閒撰文論政，撐 689連任，多得有位年薪二千萬嘅陳南祿（ Philip）擔任恒隆董事總經理兼出任太子陳文博嘅「太傅」;菲臘好鬼勤力，同屋企人食飯不忘工作，恒隆係渣打銀行大廈業主，地庫嗰間被金融人稱為「剝衫」餐廳—— Mott 32，最出名係片皮鴨同黑毛豬叉燒，菲臘就帶埋外父、美心集團創辦人伍沾德去試食，點知外父食完，劈頭一句：「成四百蚊一碟叉燒，去美心食好過啦！」菲臘好識做，接受報章訪問時，只說這碟可能是全港最貴叉燒好味道，並馬上帶外父去試食，外父的試菜反應就冇提噃！ | ||