改名記住負心女友葉念琛用「阿寶」紀念暗戀對象
1 :
GS(14)@2017-07-09 12:16:11如果你熟悉葉念琛，應該會知道呢個唔係佢嘅真名，當然都唔係網民謔稱嘅MK活地亞倫，佢真名叫江柏樑，但你未必知道「葉念琛」嘅由來。據佢所講，呢個名原來同一個叫「阿琛」嘅女仔有關。葉念琛嘅電影入面，幾乎都有一個女角色叫「阿寶」，至少先後出現過15次。葉念琛喺訪問中都大致講過，「阿寶」係同一位佢愛慕嘅女孩子有關，咁究竟「阿寶」同「念琛」嘅出處，就好似唔係好多人知。據知情人士話，「阿寶」係葉念琛中學時期嘅同學仔，亦都係佢暗戀對象。再睇番資料，葉念琛就讀嘅聖文德書院，喺02年前都只係一間男校，只有F.6及F.7先收外校女生。照咁計，呢位「阿寶」應該係預科時期嘅同學，葉念琛到今時今日仲用緊呢個名為角色命名，可想而知佢對呢個女仔有幾鍾情。至於「念琛」名字嘅由來，聽聞係一位同葉念琛拍過拖、傷得佢好深嘅女孩子，小道消息話，導演試過為呢個女仔打手提電話打到冇電，對方都唔肯聽，甚至激動到推冧咗個小巴牌。提番你，當年宣傳《紀念日》，方力申就玩踢爆，「阿寶」就係hurt過葉念琛嘅人。齋睇呢兩個名都有出處，葉念琛果然係港產片愛情大師。
來源:
http://hk.apple.nextmedia.com/entertainment/art/20170709/20083692