ZKIZ Archives


及早學狡兔 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20131022/18473517

梁政府在免費電視牌照一事上,推翻前朝之招標原則性決定(即發牌無上限),又推翻政務官之政策決定(三牌齊發),一於政治掛帥,將創意十足,幹勁衝天,熱情如火之王維基踢出局,足以令所有生意人心寒,在香港做大生意,以後唔考慮政治及捉摸北京心意唔得,但凡政府講甚麼適度有為,就表示自由市場已經半死,政府之手隨時可以扼殺十幾億元之投資決定,如果左丁山係擁資一千幾百億元嘅大財團,從今開始要逐步將「香港籃」裏面嘅雞蛋拿走一半,放進「世界籃」咯,不怕一萬,最怕萬一吖嗎,否則就係對唔住投資者,唔保護股東之最大利益。
王維基燒錢九億,換番嚟嘅,係fb上嘅四十八萬個like,每個like要近二千蚊,都幾昂貴,佢冇得做免費電視噃,於是香港電視界創意淪亡,無綫電視繼續獨大,如和尚敲鐘,是是但但又一日,繼續賺錢。
王維基可能係中大成立以來,最有創意嘅一位創業家/企業家,佢創辦城市電訊,挑戰大東電報局嘅香港電訊,已經技驚四座,為了轉型進軍電視業,不惜出售城電,大灑金錢,以較合理(未必一定優厚)薪酬吸引無綫僱員轉工,再顯大膽本色,十分進取,點知就因為好進取,而為當局所忌(據明報報道),仲有乜好講吖!特區政府即係話權在我手,你地要唯唯諾諾,唔好咁創新箒。王維基在中大時,已經唔係聽話學生,衝擊馬臨校長,大個仔就衝擊電訊壟斷,現在年過五十,再度衝擊電視,俾「自宮群英」(梁文道創作名詞)夾硬焗死,可說冤哉枉也。香港話要發揚創意工業喎,以後搵鬼信。做聽話學生就一生平穩,加上好命嘅話,還可平步青雲,例如林鄭月娥,由中學至香港大學至港英政府至特區政府,一生聽話,係聰明乖乖女,今日咪為港大爭光囉!
王維基在十月十七日中大成立五十周年之日返中大演講,原是老早編排之新傳學院校慶節目,料不到遇上免費電視發牌風波,大量學生聞風而至,原是在李兆基樓最大演講室(可容四百餘人)舉行,臨時移師新亞書院圓形廣場,搞到有近三千人出席,逼爆現場,連誠明館天台都有人,盛況前所未見,魔童不愧魅力十足,可惜迷唔到冷面禿鷹呢。

及早 學狡 狡兔 左丁 丁山
PermaLink: https://articles.zkiz.com/?id=80440


ZKIZ Archives @ 2019