📖 ZKIZ Archives

樓市短打(8)：市場告訴你樓市轉角位 梁隼

今年住宅物業成交比去年下跌了六成，業界形容為慘過沙士，交投疏落但無損對地產市場的指指點點，除了大聲疾呼要政府減辣之外，另一爭議就係未來樓市走勢，個個都睇跌但跌幾多就各執其詞。

對筆者而言跌幾多不是重點，掌握倒轉角市訊號才是重要，否則就只能隨波逐流，升果陣剩係識gogogo，跌果陣就總覺得低處未算低。有好位都做唔倒野。

回顧過去十年數據，筆者發覺恆基一手盤的開價往往成為轉角市的序幕，例如：

2003年：港灣豪庭二期兩房單位以「一口價」促銷，其後樓市開始反彈

2007年：星匯居以二手價高出20%開售，其後中原指數由高位輾轉下跌一成，再因金融海嘯再下跌三成。

2009年：亮賢居貼二手價開售，中原指數由五十幾點一直升到創歷史高位。

2012年：逸峰首批單位比二手價高30﹪，其後中原指數只在高位俳佪，是否見頂尚待証實。

好期待恆基再一次貼二手價開盤。

歷史教室(8)：點火睇post 梁隼

上回提到孫臏總算去到齊國，仲適逢其會幫大將軍田忌一把， 往後的日子，孫臏就要幫齊王打江山了。 其中一場仗，就係響馬陵同師兄弟龐涓帶領既魏軍黎一場大戰。

呢場戰初期形勢係， 魏國龐涓隊兵人強馬壯，讓對手半臂都可以秒殺果種。 孫臏見倒咁既形勢，都明白正面對撼蠃面就好似香港對巴西一樣，輸少當蠃了。

不過講得上同門師兄弟，龐涓對孫臏了解有幾深就唔清楚， 不過應該唔多，但孫臏又被害過又咁醒，就肯定對龐涓略知一二。

古代行軍，係無卡式石油氣爐的， 佢地煮飯係要就地掘個灶頭出黎的， 第一日，孫臏命令灶頭數目要足夠十萬士兵食飯的， 之後幾日，孫臏就命令灶頭數目每日減少： 第二日灶頭只夠煮五萬人份量，第三日就三萬，逐日減少。

古代又無雷達又無望遠鏡，對手只係靠望下有幾多個灶頭，去估計對方有幾多兵力，只係估唔到龐涓居然又信，見孫臏果邊的灶頭少下幾萬，少下又幾萬，就以為對方怕左自己大逃亡，咁都未算，仲要求其到輕裝上陣，帶少少兵馬就衝埋去等派彩。

可惜龐涓的對手係孫臏，當龐涓踩入去孫臏一早設定的埋伏位之後，就四面包抄，龐涓咁既情況下相蠃都難，結果，自殺一死以謝天下。

「減灶法」去到現代辦公室，就進化成不同的化身，我地稍一不慎就會中招了！

1 有D老細同你扮老友，或派D心腹同你做朋友，某程度上都係一種減灶法，目的都係想令你少左戒心。咁老細同你friend唔通請佢食檸檬咩，但係friend 還 friend，切記不要同老細做face book朋友，因為有時會睇唔開會因為個人感受而恨恨地留了一些真心話嘛，假如呢D真心話係衝著老細而來，就唔係幾好了。

2 個人方面，有些人會考埋考埋一堆証書，以IT行業為例，就會有人寫程式果D又考一堆，整網絡的又考一堆，但係依家IT工種都專門，寫程式的唔會叫你走去搞網絡。所以見工時唔用減灶法，將部份唔match既証書收埋，一來公司唔會因為你多左堆唔關事的証書而加人工，另一方面又會覺得你唔夠專門，或騎牛搵馬未搵定方向，想有好印象都難。

3 最實際的減灶法，莫過於唔好講太多自己野俾同事知。

原文：

孫子謂田忌曰：「彼三晉之兵素悍勇而輕齊，齊號為怯，善戰者因其勢而利導之。兵法，百里而趣利者蹶上將，五十裏而趣利者軍半至。使齊軍入魏地為十萬灶，明日為五萬灶，又明日為三萬灶。」龐涓行三日，大喜，曰：「我固知齊軍怯，入吾地三日，士卒亡者過半矣。」乃棄其步軍，與其輕銳倍日並行逐之。孫子度其行，暮當至馬陵。馬陵道陝，而旁多阻隘，可伏兵，乃斫大樹白而書之曰「龐涓死於此樹之下」。於是令齊軍善射者萬弩，夾道而伏，期曰「暮見火舉而俱發」。龐涓果夜至斫木下，見白書，乃鑽火燭之。讀其書未畢，齊軍萬弩俱發，魏軍大亂相失。龐涓自知智窮兵敗，乃自剄，曰：「遂成豎子之名！」齊因乘勝盡破其軍，虜魏太子申以歸。孫臏以此名顯天下，世傳其兵法。──《史記》【孫子吳起列傳第五】

P.S. 順便講一單八卦野：龐涓去到馬陵，離遠見到一棵樹好似有Ｄ字，因為當時仲未有電筒，咁就懶醒咁點火睇下喇！點知孫臏一早落令，見到火光就射埋去…

以前讀這個故事，覺得劇情實在太爛，很有韓劇feel：被同學陷害，然後復仇成功。
現在看來，種種跡象顯示，龐涓其實是一個浪得虛名的人：

即使孫臏裝瘋，為甚麼不順手送他安心上路？
齊軍就算逃亡，也不會一日之間由十萬變五萬，五萬變三萬下化？
打緊仗，仲要八卦去棵樹度睇告示，睇唔到仲要點火。

所以，孫臏之勝在於隱藏實力，處處設局，而龐涓則是短視以及欠缺思慮，而且是觀察力極低的人。
一齊讀書都唔知同學係乜野人，唔係下化？

財務智商(13)：銀行尊貴客戶這名份是咁樣用的 梁隼

假如你認為， 成為銀行尊貴客戶只係為左唔駛排長龍兼有帝皇式享受的話， 那未免太浪費了， 因為躋身高階客戶， 係可以有好多著數， 好好利用的話， 甚至幫倒你儲錢、理財， 實現人生夢想。

首先大家一定有疑問， 要成為尊貴客戶， 無幾十萬存款都唔駛諗啦， 我擺得幾十萬係銀行的話， 仲駛貪呢D小恩小惠？ 不過大家又知唔知其實銀行依家為爭客， 好多時都會借意 free upgrade， 例如你係按揭客戶， 或者係自動轉賬出糧， 有間銀行仲過份到 MPF 結餘都當係銀行結存一部份， 呢個都解釋到點解有 D 銀行的 MPF 表現咁差但係仍然係市場一哥。

咁成為尊貴客戶， 好多時都會有一張尊貴信用卡， 信用額仲要係幾高下的， 咁大家又會問， 信用額高有咩野用？唔駛還嗎？ 首先筆者要強調， 借銀行錢一定要還， 仲要千祈千祈千祈， 準時準時準時， 為的是一個好的信貸紀錄， 當有齊咁優質的信用額同埋信貸紀錄之後， 就係可以用逆向思維儲錢了。

原理很簡單， 就係首富成日用的借錢買平貨。 說實在我地又無本事買起成間電廠或者超市， 但五、六厘股息的優質收息股也不難吧， 只要能夠低過五厘借番黎， 保守點就可以賺息差， 進取點就 buy low sell high， 財富就是這樣煉成的。

就算回報和利息只係打過和，對於平時無儲蓄習慣的人來講都係賺左，因為儲錢可以有好多理由推搪，無人會話你，但係唔還錢就唔係咁講，輕則銀行會溫馨提示，重則法庭頒令破產，點都唔係一件好事。只要將借番黎既錢好好處理，例如做下人仔定期或買收息股，再從人工度扣起部份黎還錢，咁就可以變成強制儲蓄了。

所以，作為銀行尊貴客戶，並不需要為左被冷落或者大排長龍而唔開心，與其無病呻吟，不如諗下點屈銀行機好過。

財務智商(12)：公器私用儲錢大法 梁隼

先旨聲明，呢度唔教犯法野， 千祈唔好解讀做虧空公款去自己戶口先至好。

呢個方法係指將每個月預一筆錢出黎作為家常開支， 例如供樓，水電煤電話寬頻等， 當然仲有日用品食用雜物等費用。

例如每個月預萬五係以上各項目的話， 每個月就過萬七蚊去一個指定戶口，所有開支都係果度支付。

就算個戶口有剩，下個月都維持過萬七去個戶口度，每年才清算一次。

如果個個月都慳慳地用唔晒筆錢， 年尾埋數就會多一筆意外小財，可以用黎獎勵下自己，例如去下旅行咁。

有人會問：又話儲錢做乜拎筆錢去駛架？其實儲錢係bonus而己，最重要係藉呢個機會養成節儉應駛則駛的習慣，因為慳得越多，年尾份bonus越大架嘛。

當習慣養成後，又怕甚麼儲唔倒錢呢？

歷史教室(7)：屈機賽馬 梁隼

上回提到孫臏諗住旨意同門師兄弟龐涓介紹一官半職做下， 點知乜野都撈唔倒之餘仲要慘遭臏刑， 最後要扮癲扮傻先留番條命仔，然後又點呢？

孫臏終於去到齊國， 但係依家既孫臏係一個著草中的跛佬， 正所謂唔打得都要睇得， 可惜以孫臏當時既台型真係輸台型都輸晒。

不過機緣既野，真係估佢唔倒，有一日，齊王要同大將軍田忌賽馬（同阿爸話睇賽馬一樣，實係上係賭馬），孫臏心諗，如果田忌堂堂正正咁蠃晒齊王就以下犯上，如果輸晒又無面，於是就度條橋俾田忌。

你搵隻最弱既對齊王最勁果隻，再用自己最勁果隻對齊王中等果隻，最後就用自己中等果隻對齊王最弱果隻，咁齊王隻馬王蠃馬就威威食雞啦，你搵D高班D既蠃齊王既馬，蠃左仲可以話齊王讓你，咁就大家都有面，最重要係，你會蠃兩場，咁就大家開心。

田忌聽完之後都覺得幾好，於是就照孫臏的計劃安排，結果梗係如之前劇本咁安排啦，於是齊王都好賞識孫臏咁有計，就請佢度橋了。

原文：

齊將田忌善而客待之。忌數與齊諸公子馳逐重射。孫子見其馬足不甚相遠，馬有上、中、下、輩。於是孫子謂田忌曰：「君弟重射，臣能令君勝。」田忌信然之，與王及諸公子逐射千金。及臨質，孫子曰：「今以君之下駟與彼上駟，取君上駟與彼中駟，取君中駟與彼下駟。」既馳三輩畢，而田忌一不勝而再勝，卒得王千金。於是忌進孫子於威王。威王問兵法，遂以為師。──《史記》【孫子吳起列傳第五】

今次故事又告訴了我們三件事

1. 就算你明知你醒過你老細一萬倍，都唔好功高蓋主，做到個局面好似老細無左你唔得。
2. 就算想晒自己才華，最好都包裝到係老細栽培，或者老細唔出手才有機會發揮。
3. 做所有事情都要做到資料搜集，像田忌都要知道齊王邊匹係上匹，唔係錯點鴛鴦就幾有計都無用了。

歷史教室(10)：宋朝是最好的？！ 梁隼

筆者細個讀中國歷史時，成日都係話漢朝同唐朝是最偉大的，因為偉大的定義係如何令外族臣服（筆者心裡覺得，咁似依家個美國既），對於尋求安穩的朝代如宋朝就描述為國勢弱的時期。雖然宋朝喺外交同埋軍事上面都係技遜一籌，但係講到人均收入，經濟環境筆者真係要俾十個叻俾宋朝，唔信嗎？就拿一點數據來分享下。

用稅收嚟反映當時國家的財力就係最準確，如果國家稅收多，計埋D逃稅避稅等因素即係人民收入會相對多好多。北宋時期稅收曾去到1億6000萬貫。呢個數字好抽象，我地又折算下即係值依家幾多錢？

引用呢個網址提供的折算表 http://wenwen.soso.com/z/q477712508.htm

1兩黃金=10兩白銀=10貫，1億6000萬貫即係有1千6百兩金左右，當12,000港幣一兩，即係值1,920億左右。

當時的稅率約為1/15，而其他賦稅亦都唔多，咁GDP就即係1,920億x15 = 28,000億港幣，北宋的人口約1億人，即係人均GDP就係28,000港幣一年，依家睇落就梗係唔多啦，但係果陣係千幾年前的宋朝喎。

就算宋朝中後期國家朝政有點亂，一般也可收到8000-9000萬貫稅收，即使是得番半個中國的南宋，財政收入都高達10000萬貫文。

咁其他朝代又點先？就拿幾百年後的明朝比較下，明朝中葉時期每年稅收白銀250萬兩，到末年又要抗外敵（後金，即清朝前身），同內亂（農民起義），迫於無奈左挖右挖先有1,000萬兩白銀，加埋正常的稅收就大約1,500萬兩左右。不要忘記明朝以白銀作單位，即係話就算係1,500萬兩白銀，以1兩白銀=1 貫銅錢作計算的話，只有150萬兩黃金，連宋代1/10都沒有。

咁龐大的收入，或多或少係反映宋朝產業多元化，唔係以農業為主， 好似在「水滸傳」中，一個禁軍的中級軍官（林沖）可以拿出1000貫錢去買一把刀，可想而之當時人民收入係幾豐厚。

其實宋朝富庶係有理由的，因為宋朝的國土只佔有中國最富庶的地方，真係想窮都難，就好似公司重組咁，只留底搵倒錢的部門，搵唔倒錢的就外判或掃出街一樣。

不過咁樣會有兩個問題，第一，組織缺乏擴展同向上的動力，第二，就係強幹弱枝。

下回就會講下，有一個滿有志氣的人，如果在安逸的宋朝下嘗試變法失敗的故事。

歷史教室(11)：王安石變法教你做人三件事 梁隼

先睇片重溫番袁腾飛講王安石變法08：天變不足畏

上次講到宋朝其實好好景，可能仲有錢過依家任何一個國家，一個人有錢就身痕買呢樣買果樣，一個國家有錢都同樣會身痕，一係就四圍打仗，一係就架床疊屋係咁請人，結果都係洗腳唔抹腳。宋朝當時形勢係周邊國家都好好打，四圍打仗似乎無乜著數，於是就行第二條路，係咁請人。

又講下少少數據，北宋真宗景德年間(1004-1007年）內外官員已有一萬多人，五十年後仁宗皇祐(1049-1053年)官員數目就達到兩萬多人，當時做官係可以唔駛交稅同當兵的，另一邊箱，雖然宋朝唔敢四圍打仗，不過周邊國家成日打宋朝，於是軍隊數目，以致軍事支出都唔係小數目。到英宗(1065年)，官費、軍費等支出已超過各大小稅收，簡單地講，就係有赤字。

到宋神宗即位後，當時任參政知事嘅王安石就得到宋神宗嘅眷顧開始推行新法，即是王安石變法，詳細的變法內容太多太廣，恐怕講三日三夜都講唔完，簡單地講就係改變政策企圖增加稅收，同埋精簡架構尤其是軍事方面利用保甲法（類似民兵）同埋裁兵法去減少老弱殘兵。

只可惜王安石急於求成，又自視過高唔接受別人意見，結果就只有失敗收場了。

睇番成個中國歷史，其實一點都唔守舊封閉，反而久唔久就有人走出黎，諗住變化革新，改變社會的弊端。

好耐好耐之前就有滅亡西漢的王莽（公元23年），就是改革新朝復古為口號；也有明朝有萬曆的張居正一條鞭法；清朝有光緒的戊戌變法；近年就梗係唔少得偉大的鄧小平實行開放改革。

上面嘅例子好似以失敗居多，只有極少例子能夠撥亂反正，唔通中華民族真係守舊保守到丁點新意都接受唔倒？歸根究柢，唔係守唔守舊嘅問題，而係每做一項改革之前，最好諗諗以下三個問題先去做。

1. 點解要改革？

正所謂「迫虎跳牆」，一個人好地地都唔會走去改變，更何況一個國家？改革的出現，就係反映了現況已經不能適應現實，才會出現。

因為改革意味著一班既得利益者的利益受到損害，記著，呢個世上最難看的，就是既得利益者意識到自己利益受損時的表情！

所以在太平盛世時搞改革，尤如食食下飯有人放屁一樣，這是沒有問題的，不過怪咗D囉。

只有在唔改變現狀就連飯都無得開的情況下，改革的阻力才會較少，因為同既得利益者的立場一致。

就如1976年文革結束後，國家是窮到要有足的紙張出考卷，要推遲毛澤東選集的出版，那時候鄧小平才可以推行開放改革。

相反，王安石的時候，國家國庫空虛是一回事，當時官員同人民仍然有糧出有飽飯食，還未去到山窮水盡，邊度有動機去配合改革呢。

所以，適當時候做適當的事是很重要的。

2. 改革的力度應如何 ？

又要引用一句名言：天時、地利、人和。

夾啱Timing都要用對方法，太急促或者太慢都係唔Work的。

因為人總是有惰性，習慣了就好難改變，太急去改變，就會令人產生厭惡，相反太慢就令人習慣，兩種步伐都會令到事半功倍，吃力不討好。

鄧小平的改革，是先由「做又36，唔做又36」變為「多勞多得」，到進展到今時今日的自由競爭。

明朝張居正一條鞭法，只不過是加強戶籍和土地的測量，才有機會成功。

用錯方法，好似王安石的變法咁，就如同光緒的百日維新，用了太急速的步伐，失敗收場。

3. 不怕神一般的對手，只怕豬一樣的自己？

好多歷史學家評價王安石變化失敗，其實係王安石過度自信同埋「偏聽」。

王安石曾滿自信地說：「天變不足畏，祖宗不足法，人言不足恤。」

翻譯為現代的語言，就是：唔好理自然定律，唔好理以前點做，唔好理人地點講。

他的好友曾鞏就對此有着頗爲客觀的評價：「勇於有爲，吝於改過。」

現時香港都有一個人有類似行為，大家睇下呢位人兄做野係唔係諸多阻滯，處理失當？

同樣，對於既得利益者，以至其他大多數人唔係好想同佢合作，結果係點？唔駛講啦。

走到現狀和大多數的對立面，要成功唔係好難，係非常、非常困難。

一個國家的改革那麼大我們唔係經常遇到，不過就個人黎講，公司的改革，部門的改革，甚至少到一個工作小組的改革，都睇怕係三年一小遇、五年一大遇。面對每一個改革，牽涉到在工作環境作出改動的話，最好就要諗清楚以上三條問題，同埋緊記大多數人都只願行多一步，做多一點，而不是翻天覆地的改革。

歷史教室(12)：古代通識科天皇 梁隼

http://notcomment.com/wp/?p=8740
一個國家從事科研通常有兩個目的：一是稱霸世界，如美國，一是谷底翻身，如戰敗後的日本，韓國等，但係返去一千年前的北宋，果陣外族都好打得，但偏安中原仍然是無問題，於是無必要稱霸世界，又無需要谷底翻身的情況下，文化發展就好蓬勃，而科研發展就不算主流。

不算主流並不代表無人做，否則中國歷代都唔會有四大發明，至於邊位古代科研精英可以威震中外，到今時今日好多中外人士都讚好呢？不如引述下以下科學家點講。

日本數學家三上義夫：沈括這樣的人在全世界數學史上找不到，只有中國出了這麼一個。

英國著名科技史家李約瑟：沈括是「中國科學史上最奇特的人物」。

呢位生於宋朝時期的沈括，就係被稱為「中國科學史上的座標」的《夢溪筆談》作者。

沈括有幾巴閉？幾百年後的近代，為了紀念呢位中國古代科研名人，有一粒小行星2027被命名為“沈括小行星”。

介紹下沈括的背景，沈括，字存中。浙江錢塘（杭州）人，生於官宦之家，算是小康家庭長大。

佢十四時，經母親的指導下，經已讀晒屋企入面的藏書，由於老爸都係官要被調來調去，沈括就要跟隨老爸四圍去，當中得著就係可以免費去旅行增廣見聞，而沈括都唔係孤寒的人，佢晚年定居潤州（今江蘇鎮江）夢溪園之後，就將生平所有見聞，再加佢係各方面的科研心得，仲有考古、語言、史學、文學、音樂、繪畫以及財政、經濟等記載係《夢溪筆談》之中。

《夢溪筆談》實在有太多好東西，現節錄少少同大家分享下：

1. 天文方面，沈括曾試過連續三個月觀察天象，之後大膽提出北極星與正北相差達三度之多，將前人認為的一度相差甚遠，呢個說法同現今的科學家研究不謀而合。

另外沈括比發現新大陸的哥倫布早了400年發現磁針偏角，呢個相信係地球上最早談及地磁偏角的記載。

佢仲發現月亮本身不能發光，其光亮乃是由太陽反射而來，並發現：每當月亮在正南或正北時，海潮就上漲，因此潮汐現象是月亮引起的，而不是太陽。

2. 在曆法上，就是首位提出「十二氣曆」的說法，主要用廿四節氣黎定月，簡單來講就係現今所用的陰曆。

由於使用十二氣曆較符合實際的天體運行，對農業活動的安排起實際的作用，重要性不少於依家世界各國通用的公曆。

另外，佢亦都提出夏至日和冬至日不等長的偉大見解。

3. 數學方面有兩個學說，因軍事工程之需要，研究出堆垛問題，用幾何求積的方法，來解決級數求和的代數問題，是為隙積術；另外也發表由已知圓的直徑和弓形的高，去求弓形﹝弦﹞底和弓形弧的會圓術，呢個係中國歷史上第一個由弦和失的長度來求弧長的近似公式。

4. 在地質研究上，沈括相信係呢個世界上第一個叫「石油」做「石油」的人，不如睇下佢點描述。

「鄜、延境內有石油……頗似淳漆，然之如麻，但煙甚濃，所沾幄幕皆黑……此物後必大行於世，自余始為之。蓋石油至多，生於地中無窮，不若松木有時而竭。」

另外亦曾明確指出化石是古代動物和植物的遺跡，並且根據化石推論了古代的自然環境。而達芬奇到四百幾年後的文藝復興時期先開始發表對化石的研究。

另外在製圖學、物理學、工藝以至軍事上都有不少學說發表。

筆者認為，形容沈括為科學家未免以偏蓋全，如沈括生活在現今社會，佢應該是通識天皇。

所以話中國人都不是一味死讀書，平時觀察多D，研究多D，都可以創出一片新天地，這正是通識的精神，也說明了將通識規範化成為一個學科，是多麼多麼滑稽的行為。

歷史教室(12)：古代有無地產霸權呢？ 梁隼

政府成日大聲疾呼覓地起樓難，大家又會唔會想像到，係古代的中國，政府（皇帝）為左要擴建皇宮，都同樣要同地主講數，而唔係派隊兵去強行收地就搞掂呢？

一個周代的銅器上就記載了一段歷史，約公元前826年，周厲王想擴建皇宮，於是就向一位叫鬲從的人買地，但係又無立即俾錢，只係派人同鬲從講： 你別擔心，我會俾錢的，如果我賴數，就讓個天懲罰我四處流放吧。據史載，周厲王搞到「國人暴動」，要被迫出走京城著草，相信呢條友應該都係無比錢的居多。

呢個，就係古代房地產交易的雛型，咁樣有交易就會有商人，那麼在古代又有無開發商呢？

答案是有，但地位甚低，只屬於「順便做埋」的兼職，例如在北宋時期，就有個官方機構叫「修完京城所」，本來係負責為城牆同宮殿進行修葺工作，後來宮殿同城牆都修葺得七七八八，於是就向上級請示撥些地皮去起住宅店舖，再租或者賣俾老百姓，增加國庫收入。呢個都可算是古代的房協。

但私人發展商這一名詞是近代中國才有的，因為古代一來從商都係下等人，只係買賣必需品，也就是少人從商，二來古代囤地係犯法的，例如在唐朝唐玄宗時期，對國民買地起樓係有限制的，例如平民家庭一家三口就可以買一畝地，而賤民家庭要一家五口才可以買一畝地。

偏偏商人就係屬於賤民呢個級別，無論幾有錢都好，都只屬於賤民。呢個古代的限購令真係非常有效。

那麼窮得只剩下錢的商人偷偷地買多幾畝地又得唔得，答案係這是犯法的行為，而罰則就係買地每超過一畝，就罰打十大板。

就算政策上稍為寬鬆的朝代，發展商這條路也不好走的，因為古代思想上一直有重農輕商的傾向，買樓收租係一個被人睇唔起的行為，例如北宋期間，單靠收租賺來的錢被稱為「痴錢」，即係傻仔才做的事，以古代人的尺度來說，真的只有傻人才願意被人睇唔起去賺這筆錢。

另外就係資金問題，依家就話寸金呎土，但係在古代，拆借資金難度相當之高，因為古代的銀行（錢莊）大多不願意抵押地皮來借錢俾人，有錢就寧願借俾其他行業的商人，鑑於起樓由買地到建成樣樣都要錢，所以資金短缺也間接壓抑了開發商的生存空間。

因此，古代社會是容不下發展商這行業的，但沒有地產霸權下，一般百姓買樓又係唔係好易買樓上車？下星期再同大家分享。

歷史教室(13)：古代圖解學先驅 梁隼

圖解學喺台灣同日本都好流行，喺誠品書店直情有一列書架專用講圖解有關的知識，不過係香港呢門東西就無乜人提起，相關書籍都欠奉，可能香港人開會多過做野，日日睇唔少presentation，覺得呢門係一個普通野，學左又唔會升職加人工所以唔會專注。

依家資訊泛濫，係互聯網求其打個關鍵字都可以搵到大量相關資訊，同時又因為量太多而睇唔切或者會浪費好多時間去了解消化，圖解學就係針對呢個弊端，用簡單的圖畫同埋清晰的流程圖去將複雜的東西表達出來，避免各人因咬文嚼字所帶來的誤會同爭坳。

圖解學既然係講緊將所有野圖像化表達出來，在中國古代重文輕武的社會，相信更加不入流，學識幾多絕對同識幾多字有好大關聯，同時也令到好多用文字難以表達的技術只能以人傳人的形式，即師徒制，去流傳開去，結果就因為師傅永遠留一手令到傳下來的知識越來越少，要麼消失，要麼老作。

凡事總有例外，明朝就有一位人兄因為生於亂世，親眼見盡政治腐敗同埋學風敗壞，於是就逆主流而行，專心實學。佢就係被英國歷史學家稱為「中國的狄德羅」（百科全書的主編）的科學家宋應星。

宋應星前後寫過多本著作，包括有《野議》、《論氣》、《談天》、《思憐詩》、《天工開物》等，另外仲有兩本已經失傳的《畫音歸正》和《厄言十種》。當中最出名的就係於崇幀十年（1637年）初刊的《天工開物》，呢本《天工開物》後來在17世紀末傳入日本，19世紀廣傳於歐洲。仲要被譯成多種文字，受到許多國家重視，有「技術百科全書」的稱號。

《天工開物》書名概念來自「巧奪天工」同「開物成務」呢兩句成語，呢度順便上一堂中文堂，學下成語。

巧奪天工指人類用自己的聰明才智同埋精堪技藝去生產一些勝過天然形成的精美物品。

開物成務指要辦好一件事就要掌握事物的規律。

兩句成語併埋一齊意思就指只要提高人類的知識技能，清楚事物發展的規律，再加上辛勤勞動，就可以生產製造各樣生活所需品，仲要靚過天然生產的。

《天工開物》分為上中下三編合共十八卷，上編主要講衣食方面的生產技術同經驗，中編就著重各種日用品，下編就最高層次，除左講五金采冶，兵器同火藥之外，仲有製曲、釀酒、珠寶玉料採琢等技術。唔好以為幾百年前寫的東西就係舊技術，書中記載左好多生產技術，到今時今日仍有沿用的。

至於書內詳細內容，有興趣的讀者不妨搜尋一下互聯網，有大量相關記載。

全書精采之處就係呢度，三編十八卷入面一共有123幅圖，描繪了130多項生產技術和工具的名稱、形狀、工序。

筆者從維基百科網站轉載了書中其中三幅插圖同大家分享下，有圖有真相，並不是現代的網民專利，古代也很重視的。