懷孕8個月張名雅IG突然上載烏雲相
1 :
GS(14)@2017-03-24 17:08:01已懷孕8個月嘅前港姐冠軍張名雅(Carat)，昨日突然喺Ig貼咗張烏雲密佈嘅相，留言話：「難忘的一個晚上，從未見過這樣的自己，卻停不了下來。」跟住寫咗一大堆hashtag「i will never forget tonight」、「very disappointed」、「love me or leave me」。由於張名雅留言頗負面，唔少擔心佢嘅朋友，都喺佢Ig留言問佢發生咩事，但張名雅都冇再覆好友。《蘋果》亦試過聯絡佢，但一直未有回覆。再睇張名雅律師老公蔡錦豪個Ig，5日前曾更新狀況，上載兩公婆一齊喺蛋糕面前影嘅合照。相中二人流露笑意，依然未見異樣。其實張名雅上年9月嫁俾男友蔡錦豪後，曾有指結婚當日，姊妹利是被爆金額，有傳張名雅因此同陪嫁姊妹有心病，不過事件好快雨過天清。到11月張名雅同老公宣布成功陀B，更透露呢胎係男B。成為準媽咪後，張名雅心情明顯靚爆鏡，不時喺Ig分享懷孕點滴，除貼出為即將出世嘅初生B，準備嘅嬰兒用品外，更上載兩公婆嘅BB照，問朋友邊個可愛啲，日前兩公婆更孖住去影大肚寫真，處處流露準爸爸媽媽迎接新生命嘅喜悅。而直到昨日下午約3點，張名雅忽然刪去早上喺Ig貼嘅烏雲密佈相。好多人話大肚婆心情起伏變化大，未知臨近生B嘅張名雅，情緒係咪因此受影響呢？到咗傍晚六點半左右，張名雅終於出現喇，雖然唔係真人，只係喺ig貼咗一張新相，留言話：「耍花窗完畢。大肚媽媽係特別麻煩嘅」，哦！果然係大肚婆情緒易波動，真係嚇死死呀！
來源:
http://hk.apple.nextmedia.com/entertainment/art/20170324/19968704