【宅男大變身】曹星如師弟跑步輸畀女仔 誓做世青拳王
1 :
GS(14)@2016-10-30 14:35:59Raymand希望喺23歲前，成為世界青年拳王
「由細到大，運動細胞都冇乜。試過跑衝次跑嘅時候，女仔都好似快過我一兩下。冇乜社交，淨係坐喺屋企，一係睇書、一係對電腦。」20歲嘅潘啟情(Raymond)，係「神奇小子」曹星如(Rex)嘅師弟。Raymond出道一年都未夠(今年5月14日正式打第一場職業拳賽)，已經取得職業生涯兩戰全勝紀錄，當中喺上一場越級挑戰嚟自泰國嘅帕沛哈馬拉，喺五千觀眾見證下T.K.O(技術性擊倒)對手，令大家都開始注意呢粒「超新星」。擂台上，Raymond拼勁十足，雙眼有火，但原來喺佢接觸拳擊前，係一個內向又懦弱嘅「宅男」！「平時返學嘅時候，我都係自己一個坐喺角落頭，係嗰啲邊緣人咁滯。中學嘅時候真係唔講嘢，淨係自己對住本書。」唔慣面對鏡頭嘅Raymond，一副尷尬嘅表情，完全幻想到以前嘅佢有幾「宅」。
大家覺得Raymond有冇Rocky(史泰龍)嘅影子呀？
第一個個人動新聞專訪，係緊張啲嘅
雖然Raymond成個「排骨仔」咁，但佢嘅拳真係勁度十足！
自言運動同讀書都唔叻嘅Raymond，因為一場比賽改寫咗佢嘅人生：「18歲嘅時候，啱啱完咗DSE，喺youtube睇咗曹星如對沙里夫嗰場。嗰一場佢哋都打出好大拼勁，嗰時就俾佢感染到，開始對拳撃呢樣嘢有啲興趣。」加上佢未見到自己嘅將來，Raymond就開始到拳館學拳。佢當時喺嗰一間拳館受過別人嘅白眼，亦曾經俾人睇唔起，佢話：「嗰陣時(打業餘拳賽)就對咗一個澳門嘅拳王，嗰一場3 round都俾人打到毫無還撃之力。當時嗰位教練同我講，『打拳嚟講，你都冇乜天份。其實你可以試下揾其他正職，或者專心其他工作，打拳都唔係好適合你。』當時真係有諗過其實呢個運動唔係好啱我，好傷心、好hurt，因為當時嗰一年我嘅時間係得拳館同嗰度嘅人，佢哋就係我所有嘢。」一場嘅失敗，令到Raymond開始質疑自己的實力；加上當時教練嘅冷言冷語，佢更加頹廢咗足足一個月。好在憑住一首《Loser》，激勵到佢企返起身：「突然之間覺得要振作，係因為嗰陣時聽到首Mastermic嘅《Loser》。」歌詞中：「我睇到唔係句號，係一條起飛嘅跑道，我不停步，喺跑道將青春盡情消耗~~」呢一句令到Raymond決定要邊度跌低、邊度企番起身。
中學時期嘅佢，真係隔住個芒都聞到陣「宅」除！(圖片由被訪者提供)
全靠堅持，令佢可以邊度跌低、邊度企番起身
因為曹星如，令Raymond踏上職業拳手之路
所謂千里馬須遇到伯樂，曹星如話過冇佢經理人阿Jay(劉志遠)，就冇今日嘅曹星如。Raymond同大師兄阿Rex一樣，佢可以成為職業拳擊運動員，最想多謝嘅人都係阿Jay：「佢喺我出場前好認真咁同我講，話你夠膽打呢一場，你已經嬴咗。無論你輸咗又好，第一round俾人knock down(撃倒)都好，我都會以你為傲。」Raymond由以前俾人睇唔起，直到有人對佢有咁大期望，佢當然要加倍努力，用成績去報答阿Jay，佢更以23歲前贏到世界青年拳王為目標o添！想了解Raymond更多，睇吓佢man爆一面就即刻去片啦！採訪：植詠珊(Cathy)編審、編導：懷鈺剪接：Roy拍攝：Kaman、馮峰、Neo場地：DEF Boxing Gym
來源:
http://hk.apple.nextmedia.com/entertainment/art/20161030/19817011