ZKIZ Archives


毛孩子林日曦

2014-12-11  NM

 

多得王維基質問高官,「你們知道《100毛》嗎?」

這本林日曦有份創辦的雜誌最近儼如「年輕人標本」,被老餅們拿着放大鏡檢視。

「好娘呀!唔好呀!從來都話,你想一個潮牌死,就搵班阿伯著住佢嘛,而家個個老嘢喺度講《100毛》,即係out咗啦。」差點沒抱頭痛哭,「希望佢哋快啲唔睇。」

五年前因商台工作納悶想「搵啲嘢搞」,跟同事陳強、阿Bu每人夾二千蚊就印了第一期《黑紙》,一張紙的黑色批判,語不驚人死不休。

後來的《100毛》較單純,「只想氹吓香港人開心。」有人主張

「Stop making stupid people famous」,媒體應冷處理偲嫣BB、薑蓉等跳樑小丑,林日曦卻「Keep making stupid people funny」,「面對呢個香港,唔笑多啲,真係好難捱。」

兩年前《明報》老闆張曉卿入股,以一百萬換來一成股份,「佢當跌咗個毫子啫。想了解吓年輕人諗乜啩。」

他把招廣告和會計工作都交給《明報》系的萬華媒體,專注創作,連銷量都說不太清楚,「呢個時代搞雜誌,無死就係成功。」

「黑紙有限公司」不但無死,還愈來愈人強馬壯。由三人行的創作單位,長成一間二十人的公司,出版《黑紙》和《100毛》,也接廣告企劃、拍MV和宣傳片等。關於萬華入股,他談起來卻興味索然。「你哋寫到件事好紅咁,一開口就問我張曉卿。」他沒好氣,「其實唔關佢事,我哋都未見過佢。係萬華CEO Patrick Lam(林栢昌),佢就咁email嚟話見到《黑紙》,有興趣合作。」其實黑紙已拒絕過其他投資者,但萬華是同行,旗下刊物形象也相對中立,他們覺得可以一試,「兩年前《黑紙》叫做有啲聲勢,佢可能覺得認同、覺得有可為,咪入少少股搏吓。你問點解一百萬佢會肯?我哋唔特別好賺,但都唔算失敗。我估對佢嚟講,好處是佢哋現有刊物冇嘅目標讀者,我哋識做囉。」

坐在那裡邊嬉笑邊工作的,都是廿來三十歲的年輕人;八○年出生的林日曦,全公司最老。「《100毛》的內容都交晒俾廿幾歲的同事寫,我只比較緊張個封面。」《黑紙》批判社會政治,辛辣諷刺;《100毛》做娛樂消閒,是甜品,「最初係咁定性。但後來後生同事覺得講政治都好好笑喎,仲好笑過王祖藍,我們就由它這樣發展。」貫徹始終的,則是那種反老餅、反權威、反賺錢至上的邏輯,「其實你份人係點,做啲嘢就係點o架喇。」

出竅

他自言讀書時已反建制,「上學主要活動就係瞓覺,唔知點解咁眼瞓。」住大窩口邨,小學成績不錯,升到葵涌名校林護中學。「點知第一年就留級。」之後愈發反叛,「叫我交功課我唔交,叫我考試我瞓覺,話考試唔准瞓覺我就嘭門走。學校管我唔到,阿爸阿媽又管我唔到。但其實渾渾噩噩,唔知自己想做乜。」升不到大學便去IVE讀設計,「以為讀設計之類就型啲囉。」第二年卻輟學,「真係好記得嗰日。我如常地等巴士返學時,突然間覺得自己好渣,做設計又唔夠同學勁,咁我讀完又如何呢?」從此沒再上學,也沒找工作。那年他廿二歲,一年看三百幾套電影,又愛上填詞。「細個唔知啲歌詞講乜,但那時突然覺得,咁勁嘅?林夕、Wyman的詞,真係好勁。」自己不期然試着填,「填廣東歌詞好難。每次填詞就非常專注,乜都唔諗,淨係focus在首詞度,是非常講求毅力的工作。但當你完成到就有好大滿足感。」填好他會放上網交流,從中認識一些音樂人,幫他們填demo,「令我這個對文字完全無興趣的人,會主動去睇書、研究,都幾影響我之後的路。輟學真係好事嚟。」

拍門

他至今只打過一份工,在商台待了九年。○三年尾、輟學一年後,朋友介紹他去商台網站工作。○四年,商台籌備網上論壇,林日曦忙了好幾個月,推出後聽眾熱烈留言;網絡世界當然有讚有彈、也有謾罵,十幾日就被管理層下令關閉。「上司同我講要停,我成晚都瞓唔着,唔知點解咁在意。可能擺咗好多心機落去,加上覺得依個係電台未來應該行的方向。網就係咁o架嘛。但當時大家仲有傳統包袱,認為主持人唔應該俾你咁樣攻擊。」翌日他晨早八點返公司,那時他的座位剛好在俞琤房門口。「我知道佢都早返,一見佢返嚟我就同佢講,我係咩部門嘅邊個,我覺得個forum唔停得。」俞琤掃他一眼,叫他入房,然後自己篤手機;林日曦愣在旁不知所措,看着俞琤打了幾個電話,「Multi media有個同事叫阿Roy,佢話個網站唔停得喎,你上來傾傾。」沒多久,全部商台高層來到,「佢哋都覺得我好怪o架喇,死僆仔,做咩事啫?其實繞過自己上司去講,係唔恰當。但我知道啲上司唔會同俞琤講。」惟有硬着頭皮講出理據。高層們各自表述意見,俞琤總結,「咁啦,不如會員制,令留言的人負責任啲,準備好先再開番啦。阿Roy你滿唔滿意?」那刻他當然見好就收,「走得甩囉竟然!」後來他又選了一批自覺填得最好的詞作,印出來放在俞琤案上。「好天真咁諗,我想入行做填詞人,如果我真係得嘅,佢或者會幫我。」結果俞琤又不動聲色,叫他多印十份,轉發給其他高層,包括林夕。他沒有立刻成為職業填詞人,但俞琤把他由文職轉去創作部門,「也將我成個career path轉了。」881、903都做過,主要是幕後,○七年起在商台社企「天比高」帶年輕人做創作。

長幼

林日曦一張撲克臉,任何人見到都會認為他不可一世。「覺得啱,咪講囉。當然講時要有禮貌。但唔好同我講咩你食鹽多過我食米,唔好同我講經驗,要講道理。啱就係啱,無話你有經驗就啱啲。」討厭恃老賣老,但真有料到的前輩,他很尊重。訪問中他不只一次提到俞琤的身教,「佢唔只ban你橋,佢會真係同你度,然後佢第二日返嚟又度咗啲新嘢,再ban番自己尋日嗰啲,嗰種唔放棄、一定要度到最好的精神,對我影響好大。」○七年起林日曦開始發表填詞作品,至今近百首;林夕在他初入行時也常提點他,「我最欣賞是他的毅力。出街那份歌詞多數都係自己唔鍾意的,因為多數都係俾人彈鐘後的第二、三、四稿嚟。但第一稿你已傾盡所有精華落去,要改,總帶住晦氣怨氣去改,通常寫得唔好。但林夕可以寫到第八稿,都繼續追求再寫得好啲。」在天比高他是年輕人的前輩,小心翼翼不想成為老屎忽。「天比高在天水圍,係間製作公司,又係社區中心。接外間嘅job,俾有志創作的年輕人邊做邊學,而作品真係會出街。」五年間他做到創作總監,「但作為mentor,自己覺得唔稱職。因為創作就係你用自己的方法去做,我share唔到任何經驗俾佢哋,經驗即係包袱,係廢嘅,我不如做好自己先啦,我都需要邊做邊學。」二○一二年他辭職,全力做《黑紙》。

賺蝕

《黑紙》是○九年他和陳強、阿Bu在商台工作時構思的,打工仔交的作品總不能百分百盡如己意,決定工餘再經營一個表達的媒介。二○一○年一月一日,他們每人夾二千元,印了第一期《黑紙》,自己開車送到kubrick、GOD等七個售賣點,主要是文化場地,定位較小眾。最初沒明星封面,內容是一句句精煉的「黑句」,依每月主題發揮,「懶幽默、懶感性、懶批判咁囉。」本來印了二千張,很快就要加印,「最後好似賣咗萬幾二萬張。」一頁紙的雜誌,令人耳目一新。「一來想做啲無人做過的事。二來這個世代的年輕人睇長文能力有限,仲搞print media仲叫人睇字的話,一定要短、好輕巧地睇得完。」頭兩年每月一期每張一蚊,收支平衡。一二年轉為每週一期、免費派二十萬張,想靠廣告收入,「完全失敗,唔夠廣告。過咗幾期即刻同讀者沙冧,印少啲,賣番一蚊。」同年林日曦辭職,接更多廣告企劃工作,有時也靠這些收入幫補《黑紙》出版。他一再強調自己不懂經濟,好怕數字。「曾經有財經雜誌訪問我,首先我話佢搵錯人啦,我到三十幾歲都無買股票無買樓,真係唔識。問我《黑紙》賺定蝕,我話,OK啦,賺少少。但佢糾正咗我,原來要計埋人工,嗰陣我都無支過人工。如果咁計,應該係蝕的,但可以維到生,唔使死囉。」去年再辦《100毛》,一樣是計落「唔使死」就去。「我哋預咗四至八期的資金,即係個幾兩個月,可能幾十至百幾萬啩,我唔記得囉。前輩或者朋友都話我哋黐線,太少喇,起碼要有半年或者一年啦。但我哋覺得,至多咪蝕到第二個月執咗佢。」他們請了幾個員工,「佢哋都唔知咁危險o架,俾人呃到而家,咪好彩囉,無事。」現在《100毛》印八至十萬本,通常賣出八成,賺定蝕?他照樣不懂答,「總之大家有糧出啦。我係盡量避開唔睇,一睇數呢,就好易返去啲大人嘅思維模式。我哋想唔好講錢住先,講咗點樣做好、做啱件事先,呢個係同資本主義相違背。」

古墓

他的生活也好古墓派,辦潮流雜誌卻害怕上網,覺得資訊疲勞;不交際應酬,平時不在公司就在家。家也要靜,這些年住過西貢、粉嶺、元朗村屋,現在住屯門龍珠島,要花十幾分鐘行一道堤壩才出到黃金海岸;家中謝絕探訪,因為有潔癖。近兩、三年每日要交報紙專欄,他每朝清早五點起身寫。討厭人遲到,自己也不會遲。他認為要自由,先要自律。公司盡量少規矩,「一有制度即係唔人性化,我哋想盡量逐個逐個人睇。呢位同事自律嘅,咪多啲自由,唔使理佢返唔返公司、遲唔遲到;有啲人分內事都無做到,咁就要過問多啲。」請病假也不用交醫生紙,「佢唔覺得公司係地獄,咪唔使詐病囉?我哋都未做到,但會嘗試改變。」他與另外兩位老闆都年過三十,「好老喇,要多啲俾後生同事搞。年輕人可能睇得少過你,但佢睇得啱過你。可能佢睇得窄過你,但佢睇得集中同埋透徹過你。我覺得唔需要train佢哋嘅,佢哋train返我轉頭啦。」

毛孩 子林 日曦
PermaLink: https://articles.zkiz.com/?id=123168

白紙:可憐天下偽文青 林日曦

1 : GS(14)@2012-08-15 09:22:29

http://www.sharpdaily.hk/article/sup/20120815/122644
「今天不小心把從星巴克買回來的咖啡杯打碎了,事後我用了十五分鐘去逛誠品,發現香港的誠品,竟然比起台灣那個形態更美。然後我再用了十分鐘去下載手機程式『文青相機』,再以其拍照,這短短的三十分鐘,算是今天我思緒最文藝的時間……」就此打住好了,我不是來抽文青水的。
以上一段文字,假設我就這樣登上Facebook,大概又會給別人揶揄我是偽文青。這類文字──雖然我是寫得誇張了點──經常會在別人的status上出現,通常配以加入大量效果的照片乙幀,然後總有某些看不過眼的人會將之截圖再轉發加以嘲笑一番,網友也就樂於集體揶揄。
要談偽文青,先要定義一下甚麼是文青。文青不就是文藝青年了,表面上用來形容一群關注文化藝術的青年,可這種解讀本身隨時代不斷轉變,乃至後來趨向成為一個貶義詞,多指無事也傷春悲秋,不理現實殘酷而一頭鑽進文藝世界裡的青年。後來衍生出偽文青一詞,沒有真確脈絡,我是用猜的,應該多半和消費與炫耀扯上關係。
或許偽文青也只不過在真心抒發自身情感,可是當在文字或照片上加入大量消費符號時,難免就給別人覺得那一切的文藝腔都是虛空的。可偽文青有錯嗎?當然沒有錯,錯就錯在星巴克、誠品等品牌太成功,偽文青們都被迫成長在品牌城市中,沒有花,沒有草,不拿咖啡書本出來傷春悲秋,便深怕要在A&F囝囝面前跪低了。
白紙 可憐 天下 文青 林日 日曦
PermaLink: https://articles.zkiz.com/?id=280975

【我主場】毛記腦細扮工全直擊林日曦 真.心話

1 : GS(14)@2016-01-23 19:27:22

■《100毛》老細林日曦面對「網絡23條」惡法逼近,仍然大無畏籌備第二屆毛記分獎禮。攝影:仇志德


《100毛》舵手林日曦,一張蒼白撲克臉生人勿近。因一個「毛記分獎禮」,忽然響朵,以為這名80後從此不可一世,但原來世事不可盡信表面。本報記者日前由朝到晚近距離訪問他,他一時大談自己和《100毛》其餘兩位掌舵人陳強和姚家豪(阿Bu),開會日日反枱,一時又肉麻細說太太蔡明麗(the pancakes)100分package,堅貼地。撰文:勞燕萍



講工作:兩位拍檔缺一不可

工字不出頭,現年35歲的林日曦7年前離開商台天比高,和陳強、阿Bu每人夾$2,000,創立「黑紙有限公司」,由原本3丁友規模,再演變成日後的《100毛》和現時擁有50多名員工的毛記電視。林日曦,是作家、填詞人、創作人,近年加多一個「腦細」銜頭。身份多多,但生活卻異常規律,他說:「我每朝習慣5點鐘起身睇fb同新聞,喺屋企寫完專欄,8點半返到公司開門準備開會。」雖然毛記有3個老細,但每次只有林日曦浮面,拍檔隱形,林日曦抵死說:「懶囉,懶低調唔鍾意見人囉!」三個廢青步入廢中行列,又共事多年,理應少火氣多默契,但事實剛剛相反,他說:「我哋唔算好好朋友,只係啱傾嘅合作夥伴,鬧交?日日開會都鬧,但就對事唔對人,我哋唔會投票,總之拗到最後睇吓邊個最先放棄,不過阿Bu次次都係最先放棄,佢就好似一支KY(潤滑劑)咁。而我哋鬧完交就算,轉頭傾閒偈又傾得好開心。我哋三個性格一凹一凸,好似砌積木咁,缺一不可!」



■(左起)林日曦與阿Bu、陳強由《黑紙》到《100毛》,嗌交嗌出好多鬼主意。資料圖片

■俞琤在廣播界德高望重,毛記分獎禮有幸得俞琤支持,令林日曦非常感動。資料圖片



俞琤現身眼濕濕


對於《100毛》路線不時與廣告客戶期望有分歧,林日曦早已設有底線:「我份人比較衝動,見親客都幾乎反枱,所以我唔會見客,阿Bu就成日笑笑口,啲客見佢最開心。Sales詐型,由佢囉,總之好笑就會講,攞咗條命先算!」毛記分獎禮,無疑是令《100毛》由小眾網媒步入大眾主流的一次分水嶺,對於商台前話事人俞琤,沒有現身商台叱咤頒獎禮,反而出席毛記分獎禮,俞琤畀足面,林日曦難免飄飄然:「哦!咁梗係勁啦,我覺得真係勁喎,佢(俞琤)係一個傳媒界咁勁嘅人,竟然肯嚟不等止,仲肯接受個獎。其實當佢覆我message話嚟嗰一刻,我已經眼濕濕!」



分獎禮劍指紅館


林日曦受訪翌日,「網絡23條」二讀通過,靠二創、惡搞的毛記,當日在facebook聲言「殺入死亡直路……」惡法逼近,但林日曦的回覆是:「照做!」訪問時他更向記者透露開始着手籌備第二屆「毛記分獎禮」:「陣間會同同事傾研究場地嘅嘢,紅館會申請,會展Hall B、C同九展Star Hall都會諗,或者亞博館,雖然好遠,但原來大家都唔介意……不過其實一年後好多嘢都唔同,可能到時一個人都冇……而家純粹只係落定book場。」





來源: http://hk.apple.nextmedia.com/entertainment/art/20160123/19463521
主場 毛記 記腦 腦細 細扮 扮工 工全 全直 直擊 擊林 林日 日曦 心話
PermaLink: https://articles.zkiz.com/?id=294873

林日曦盼亞視播分獎禮

1 : GS(14)@2016-01-24 17:08:05

毛記電視之前舉辦咗「第一屆十大勁曲金曲分獎典禮」,獲得群星齊撐,昨日有報道指大台助理總經理杜之克不排除有機會跟《100毛》合作,表明想播分獎禮,更不介意大家有不同意見,只要不是有惡意。《100毛》創辦人林日曦表示如果搞第二屆分獎禮想選電視台依然是亞視,他說:「有關惡意嘅問題,我本人同毛記電視個台出名nice。」亦指大家是友台。





來源: http://hk.apple.nextmedia.com/entertainment/art/20160124/19464406
林日 日曦 曦盼 亞視 播分 分獎 獎禮
PermaLink: https://articles.zkiz.com/?id=294955

【科技籽】平民iPhone今開賣 林日曦試完SE 都係用番6!

1 : GS(14)@2016-03-31 14:49:32

【科技籽:出閘搜新】月初的春季發佈會上,蘋果展示了多款新品,其中兩大話題作:4吋iPhone SE及9.7吋iPad Pro今日正式開賣。此前,坊間詬病兩機創意不足,似走回頭路,而且以「細」作招徠,簡直是另類「驚喜」。到底細芒是否仍有市場?Gadget Guy邀請「腦細」林日曦及短片製作團隊「開片」分別「細」評,用開iPhone6的林日曦會否換機?即睇!


創辦《毛記電視》及《100毛》的「腦細」林日曦一向實話實說,從來不怕得罪人,以為他對SE的評價都是一針見血,有一定的參考價值,怎料現正使用iPhone6的他,竟表示對手機沒特別要求,甚至差點忘記手中的iPhone是6還是6s,只記得對上兩部手機均是iPhone4,換機只因跌爆芒,「對上同對上一部手機都係iPhone4,因為鍾意佢個樣,所以人哋用緊6嗰陣,我都去買4。」那4吋的平民版iPhone SE細部又好揸手,理應適合他吧,他卻說:「原先我都覺得6同6 Plus係非常大,所以我淨係鍾意用iPhone4,點知我用咗iPhone6之後呢……真係好似廣告咁,返唔到轉頭!」試用了SE一會後,他說不懂得分辨功能上的upgrade,即使電量增強、拍攝質素提升,以及支援NFC、Live Photos等新功能都不是他考慮換機的原因之一。惟有現實一點,告訴他SE是現時最平的iPhone,他則表示錢不是問題,自己有錢過李嘉誠,且一再強調:「真係返唔到轉頭。」



試用SE後,林日曦說:「用過大機,真係返唔到轉頭。」

林日曦的iPhone6已跌至遍體鱗傷,但他依然沒有考慮換機。



3大iPhone效能比拼

單憑林日曦的個人意見,當然絕不客觀,所以同時找來iPhone6及6s,與SE作一次大比拼!



【電量測試】細芒SE最慳電

很多用家關心SE的續航力,我們把6、6s及SE的電量充至100%後,再連續播放12條「動新聞」短片。30分鐘後發現,6剩下91%;6s用電最多,只剩下88%;而屏幕最細的SE就剩下95%,成績最好。以SE屏幕最細所以較省電作推論,結果合乎預期,但要注意測試用的6及6s並非新機,電池會有一定折舊,結果只作參考。





iPhone SE勝(右)




iPhone SE勝(右)

【跑分測試】SE、6s並駕齊驅

以跑分軟件安兔兔測試,結果iPhone SE及6s的分數均高於13萬,6則只有7萬。其實iPhone6僅配A8處理器,低分是常識吧。至於6s及SE得分相若,相信是因為兩機均用上A9處理器及2GB RAM,令手機效能相差不遠。另外,新推出的三星Galaxy S7得分約12.5萬,但以SE平逾千多元的定價來看,似乎更具競爭力。



【拍攝能力】SE對焦快有偏色

三部手機的鏡頭取景闊度均差不多,實試對焦反應,發現6s及SE在點擊屏幕那刻已能成功對焦,而iPhone6的反應則明顯較慢,約需半秒時間才能準確對焦。然後以三機拍攝同一主體,放大後發現6s及SE的成像細緻度極高,相比之下,6較為粗糙。值得留意的是,SE屏幕有點偏黃,未知是否測試機的個別問題。



iPhone6s勝(中)





【3D Touch及Live Photos】6s多玩法

三部手機當中,6s同時具有3D Touch及Live Photos兩大功能;SE則只支援Live Photos;而最早推出的iPhone6……當然甚麼也沒有。



iPhone6s勝(右)

啟動Live Photos拍攝後,長按照片即可觀看動態照片。




總評:SE性價比最高

雖然iPhone SE的屏幕只得4吋,或者無法吸引愛用大芒手機的用家,但實測其性能表現後,發現SE真的可以媲美6s,定價更是最平的一部,性價比極高。至於最舊的iPhone6,唯一優勝之處就屏幕較大、解析度高一點吧。



記者:陳詠兒攝影:楊錦文編輯:陳國棟美術:吳子豪





來源: http://hk.apple.nextmedia.com/su ... t/20160331/19550793
科技 平民 iPhone 今開 開賣 林日 日曦 曦試 試完 SE 都係 係用 用番
PermaLink: https://articles.zkiz.com/?id=298903

我Q你答問會:人人問林日曦揭夢遊採礦神技

1 : GS(14)@2016-04-13 17:09:02

■「腦細」林日曦接受挑戰回答敏感問題,結果自爆瞓着也會撩鼻屎。攝影:陳順禎


搵毛記電視「腦細」林日曦做「人人問腦細」,最初他用短訊推搪了,終於等到他落叠應承,記者在將軍澳搜羅毛迷各種古怪問題,面對一班廢青廢中踴躍發問,他表示自己最出名的運動是un腳,寸爆梁振英的午餐游水論。林日曦卻嫌:「我覺得問題太過冇公共性!」他表示想睇「人人問梁振英」,腦細最想知道:「我下次喺機場遇到麻煩,可唔可以call佢幫幫手?」採訪:皓騫




Q1.梁小姐:腦細,同大家分享你一個秘密呀?

林日曦:諗一諗好唔好講,唉,講啦,怕咗你!細個每朝早起身,發現喺床嘅側邊,會發現有啲鼻裏面嘅嘢喺床嘅側邊,原來我瞓覺嘅時候,會不自覺做啲挖掘嘅工作,我竟然講咗出嚟!




Q2.東方昇:我想問你,最能夠令你唔黑面,微笑係乜呢?唔係恥笑,係微笑吖?

林日曦:會令我微笑咪你囉,東主播,見到東主播可以做到自己喜歡嘅嘢,啲戲咁浮誇終於有人欣賞,我都好開心嘅。




Q3.秦小姐:見你白白淨冇乜曬過咁,除咗打籃球仲做乜運動?

林日曦:我最出名運動係un腳,幫助我健康好多,如果我唔un腳,我諗我死咗好耐,大家得閒可以多啲un腳,隨時隨地都做到,尤其香港人咁忙,你估真係咁容易lunch time抽時間去游水咩!




Q4.馮先生:你同麗芸出trip時,有冇喺酒店做過啲乜嘢?

林日曦:叫佢蔣議員吖,蔣議員因為係尊貴議員,我同crew住一間cheap酒店,尊貴議員同老公住隔籬街貴酒店。




Q5.Anthony:你頭髮婁丘係咪唔會變,如果變會轉乜嘢髮型?

林日曦:如果假設一日我甩髮,雖然地中海都有地中海嘅魅力,但我接受唔到,地中海髮型唔襯我,我會剪光佢。




Q6.江小姐:如果畀你run一間電視台,你會點玩?有乜節目睇?

林日曦:我覺得我哋真係好失敗,而家咪run緊一間電視台囉,但從來冇人認同,得我哋自high覺得係一間電視台,大家依然覺得有牌就係電視台,冇錢冇牌就唔當我係電視台,真係慘!




Q7.麥小姐:腦細,除咗蝙蝠之外,你仲想掛乜喺身度?

林日曦:一講到掛呢啲好鬼敏感,惟有掛老婆啦。




Q8.陳先生:有人想搵你做戲接唔接?同邊個做對手戲?

林日曦:我哋呢啲做幕後好鬼堅持,如果唔夠錢係唔會接戲,我好想同黎明演出,佢係一個巨星,講嘢又有見地,唔我負責拍佢做幕前我都好開心。




Q9.Matthew:你自稱創作總監,有邊啲創作人你真係服?

林日曦:馮煒光囉,身為一個創作人經常出嘅post都幾好反應,仲好反應過我啲post。





來源: http://hk.apple.nextmedia.com/entertainment/art/20160413/19568418
答問 人人 問林 林日 日曦 曦揭 夢遊 採礦 神技
PermaLink: https://articles.zkiz.com/?id=299229

蔣麗芸咒林日曦:你本雜誌仔就釘

1 : GS(14)@2016-05-08 01:56:22

■蔣麗芸(右)在前晚的《矛盾》中,揚言睇死《100毛》就釘。電視圖片


ViuTV節目《跟住矛盾去旅行》前晚播映林日曦和「元秋」蔣麗芸尾集,林日曦繼續無視元秋,結果她在節目單獨訪問時,放下假笑鬧爆林日曦:「我又唔係要同你做friend,同你做friend做乜鬼啫!啱唔啱呀,你嗰本咁嘅雜誌仔(《100毛》)就釘啦!睇佢捱到幾耐,威到咁喎真係!」昨日林日曦在facebook回應:「難得尊貴議員洞悉傳媒行業現況,知道經營環境困難,我哋本雜誌仔隨時釘,係絕對唔出奇嘅事。鏡頭前彬彬有禮嘅尊貴議員,喺鏡頭後(佢以為喺鏡頭後)稍有失儀口出預言,係人之常情,佢冇做錯到,我哋選民係會繼續支持。」


■林日曦指蔣麗芸擦鞋的能力應該比他好。電視圖片


林日曦亦透露中間人曾問會否擔心因議員勢力大而影響生意?他坦言:「口講話唔驚,當時心裏係有啲啲啲啲驚,唔係驚公司冇生意,係驚公司冇生意時會影響我兩位拍檔同埋啲同事。但幾分鐘後又醒番,有乜好驚?我有幾低能,我兩個拍檔只會一樣低能。」撰文:唐琛悠





來源: http://hk.apple.nextmedia.com/entertainment/art/20160505/19598079
蔣麗 麗蕓 蕓咒 咒林 林日 日曦 你本 雜誌 仔就 就釘
PermaLink: https://articles.zkiz.com/?id=299875

林日曦撐方健儀:沒有問題繆美詩斥前主播 將專業淪笑話

1 : GS(14)@2016-05-22 12:16:10

■方健儀曾以輕鬆形象為《100毛》做節目,「腦細」林日曦當然力撐。資料圖片


前亞視主播、其後開公關公司的繆美詩,前日在《信報》專欄撰文,題為《新聞主播的最底線》,文中直指有前主播食老本拍廣告搵錢,破壞整個行業的專業及公信力,寫着:「當年家喻戶曉的新聞人仍以同一主播形象兼用同樣報道手法,反過來去嘲笑新聞報道這專業,令專業淪為笑話橋段,形同向同行摑了一個大巴掌。」文中亦特別提到,除了離職主播的底線「低處未見低」,更開名直指《100毛》「學生幾乎完全不看電視新聞。」



■前亞視主播繆美詩在專欄上,斥前主播食老本拍廣告,破壞行業的專業及公信力。資料圖片

■柳俊江認為現今新聞質素下降,最大責任是新聞部的總監。資料圖片



柳俊江:我唔會咁做

雖然未有指邊個主播,但方健儀曾為《100毛》做節目,身在韓國的方健儀昨透過短訊回覆稱不清楚繆美詩的看法。而繆美詩昨日在電話中否認針對方健儀,她說﹕「當然唔係啦,我都認識方小姐,我講緊成個現象。我喺自己fb都冇named任何人。我嘅年代training一路都係,如果我離開呢個崗位,咁我就卸下呢個光環。」她覺得新聞從業員轉任何行業都不是問題,但要有底線,她解釋:「我都有睇毛記電視,覺得好好笑。但當一個曾經從事新聞嘅人用番呢個形象手法,稿件已經唔係新聞稿,咁就有問題。」林日曦用短訊回覆:「每個人都有投訴嘅權利。不過香港人好少就呢啲嘢投訴,因為我哋都有基本思辨能力。正如我哋睇《足球小將》,唔會話投訴『新一代誤以為《足球小將》就是足球之宗師』……有關方健儀,我認為完全沒有問題。難道李麗珊不可以以前運動員身份賣廣告嗎。阿明(黎明)以歌手專業甚至唱歌形式去賣咖啡廣告,也應該沒有影響音樂專業吧。」柳俊江說:「我唔會咁做,但亦唔覺係罪大惡極嘅一件事。」可覺得拖低新聞質素?他說:「新聞質素而家普遍都降低緊啦!我覺得最大嘅責任都係新聞部嘅總監,新聞部嘅編採人員身上。」陳珍妮則說:「佢嘅value係冇錯,但個market係改變緊,我冇資格去講啱定錯。」採訪:嵐山、皓騫、林妙萍





來源: http://hk.apple.nextmedia.com/entertainment/art/20160522/19622377
林日 日曦 曦撐 撐方 方健 健儀 沒有 問題 繆美 美詩 詩斥 斥前 前主 主播 專業 笑話
PermaLink: https://articles.zkiz.com/?id=301086

【你幫我同佢講...】林日曦元秋傳話人OO由繙譯榮升Producer

1 : GS(14)@2016-11-11 08:10:34

OO全名Viola,o依家唔做繙譯,轉行做公務員,喺首爾公營電台做英文節目監製。



【尋找首爾的香港】「OO...OO...OO...」一個林日曦曾經不停嗌嘅名字,一個站於林日曦同「政壇元秋」蔣麗芸之間嘅中間人,一個用廣東話譯廣東話嘅繙譯員,全名Viola!Viola係韓國人妻,三年前跟老公搬去韓國定居,花年半時間精通韓語。最近,Viola唔譯廣東話,改行做公務員,喺首爾TBS公營電台做英文節目監製(Producer)。
Viola做公務員唔係為咗高薪厚職求穩定,原來只係同林日曦一樣鍾意做試驗,佢笑住咁話,「申請原因真係好低能,我見韓國人細個讀書要補習,大個想入大公司,原來都要補習筆試同面試。有冇咁大件事呀?大學畢業唔係代表準備好出嚟社會做嘢咩?好慘呀!」所以Viola就身痕,去搵份工嚟申請吓,睇吓係咪真係咁難!



Viola話見工嗰陣有9個面試官,勁誇張!

結果得佢一個in到,榮升Producer,直播室嘅人都嗌佢:「PD님!」

Viola話Producer係乜都做,由揀歌、定主題,到主持講乜都要諗。

試過就知大陣仗,淨係份申請表就有23頁,Viola話好多要填嘅資料根本係私隱,「真係唔知點解要填,唔止填阿爸阿媽嘅資料,仲要填埋阿爺阿嫲嗰代,又要填銀行有幾錢,租樓定買樓,連血型都要填!」申請合格者先考筆試,然後再要面試。
Viola話面試就誇張,「有九個面試官!嘩!好chr!九個人不停問、不停問,問你如果製作節目,點可以肯定個節目喺韓國會受歡迎?喺韓國嘅外國人想聽啲咩節目,你了唔了解?」Viola形容好似打咗場仗!結果,呢場仗畀貪得意、無補習、冇大冇細嘅Viola取得勝利!換嚟電台直播室嘅工作人員嗌佢:「PD님!(韓國人對Producer嘅尊敬稱呼)」Viola話Producer係乜都做,「揀歌、定主題、主持講乜都要諗。」拍攝當日,喺直播室嘅幾位節目主持就特別同Viola開玩笑,喺大氣電波講佢好似大明星,有香港傳媒嚟採訪佢,仲對攝影機揮手交足戲!



鬼馬主持特登向攝影機揮手,交足戲!

班主持又細數Viola,話佢食嘢好快,令佢哋有壓力。

Steve(右)仲話Viola講嘢直接,叫嘉賓試咪,就嗌佢「Say Something」。

呢班鬼馬主持又細數Viola,先講啲門面嘢大讚佢為人好好、合作性高、畀自由度大...但係慢慢就數埋啲奇怪嘢!外籍主持Liam Lusk話同Viola食飯好有壓力,因為佢食得超快,另一位主持Steve Hatherly就爆Viola講嘢直接,「有次佢想一位嘉賓試咪,正常都會同嘉賓講『唔該你試咪』,但係Viola就嗌佢『Say Something!』」Steve自己講完都笑,不過就話明白Viola只係直率,唔係無禮貌。至於大老細點睇呢?TBS電台部局長Kim Yeong Sik就話,因為Viola係外國人,第一次見佢就「打咗個突」,「韓國人打招呼係鞠躬,但係Viola係舉起手『Hi』咁樣!」不過局長話o依家已經習慣咗喇!雖然同事好,不過打工制度點都比唔上香港,Viola話:「一定要朝九晚六,遲一秒鐘都畀人睥住你!」莫講話一秒,唔少韓國公司都不明文規定要早半個鐘返工,老細未走都無得放工,相信有睇韓劇《未生》嘅朋友都明白,不過Viola就懶理,「早起身真係好難!」



上司金先生都加把嘴,話韓國人打招呼會鞠躬,但係Viola就咁舉手say hi,不過o依家就慣咗喇!

Viola話喺韓國做嘢好忟憎,韓國人階級觀念重,唔識變通又唔敢表達意見。

所以佢都係用返香港人最叻嗰招,用自己方法,咁個人就會開心啲喇!

Viola又話韓國人好目標為本,唔理成效係咪理想,總之定咗目標就一定要達到,「好急o架喎,老細會話『聽日,你聽日要做畀我!』我心諗:『吓,我諗都未諗!』」最令Viola忟憎嘅,係韓國人唔夠膽向上司表達意見,甚至乎根本唔知有另一個方法做嘢,只係盲目跟前輩話點做就點做!Viola話一於少理,貫徹香港人用自己方法行事,「做到咪得囉!」至少,自己開心啲!記者:鄒倩婷(阿仙)攝影:陳家文、李錦鏵剪接:Roy編審:陳家文導演:陳家文




來源: http://hk.apple.nextmedia.com/entertainment/art/20161111/19829490
你幫 幫我 我同 同佢 佢講 林日 日曦 曦元 元秋 傳話人 傳話 OO 由繙 繙譯 榮升 Producer
PermaLink: https://articles.zkiz.com/?id=315082

林日曦陪妻遊日放蚊

1 : GS(14)@2016-12-06 03:56:07

【機場呆等】■林日曦與老婆蔡明麗結婚十年從未一起公開露面,二人日前在福岡機場終被捕獲,林更打呵欠。讀者提供圖片

耷低頭猛撳電話

36歲的腦細林日曦和老婆蔡明麗老夫老妻卻十分低調,婚後十年兩夫婦從沒一起公開露面,沒有被影過合照,日前他們拍拖蜜遊福岡,預備返港時在當地機場被讀者李小姐透過本報「爆相爆片」,分享兩人的首張合照,李小姐表示:「佢哋坐喺候機室等上機,雖然間中有傾偈交流吓,但大部份時間,林日曦都係耷低頭撳電話,一係就抬高頭望住天花板發呆,再唔係就擘大個口放蚊,而戴住黑框眼鏡,冇乜化妝嘅The Pancakes,就起勢摷個背囊。」航班抵港後,兩人刻意分開出閘,現場還有電台crew等林日曦做訪問,未知是否林日曦避免老婆被影到,所以出閘時各行各路呢!蔡明麗是樂隊The Pancakes唯一成員,曾為電影《麥兜故事》的Miss Chan及《麥兜菠蘿油王子》的少女麥太配音,她為《麥兜菠蘿油王子》創作的主題曲《咁咁咁》更奪得第24屆香港電影金像獎最佳原創電影歌曲獎。


【狂篤手機】■林日曦全程耷低頭玩手機,老婆蔡明麗呆坐身旁。

■抵港後,林日曦(左)刻意與老婆分開出閘,更邊行邊接受電台訪問。攝影:馮嘉銘



來源: http://hk.apple.nextmedia.com/entertainment/art/20161205/19855703
林日 日曦 曦陪 陪妻 妻遊 遊日 日放 放蚊
PermaLink: https://articles.zkiz.com/?id=318334

再合作賣啡 林夕驚喜登場黎明林日曦玩HeHe甜蜜蜜

1 : GS(14)@2017-05-13 05:34:08

■林日曦(右)攬着黎明腰坐單車尾,好有斷背feel。互聯網圖片



黎明越來越玩得,過去一年除了變身「明福俠」在facebook和網民互動,去年夥拍「腦細」林日曦拍咖啡廣告,開金口唱《情深咖啡未曾飲》,亦受網民及粉絲拍手讚好,廣告點擊已累積至逾460萬及8萬多個分享。最近黎明和毛記、咖啡品牌再度合作,新廣告片昨晚曝光,除了黎明演的「初級秘書」、去年有份參與的劉江演「高級Intern」,最令人驚喜是林夕客串飾演「林總經理」一角。


重提籌款走音

配合新廣告硬銷越南咖啡,黎明除了一身傳統越南裝打扮出現,廣告中他為勸服想用原子筆自殺的劉江,唱《對不起我愛你》的改詞版《對不起我愛越南啡》,還不介意自嘲,將91年他在籌款節目唱《對不起我愛你》走音一事拿來開玩笑,果然做到其金句「我豁達,所以我唔介意別人話我唔豁達!」



■黎明在電影《甜蜜蜜》,經常載着張曼玉踩單車。劇照

■黎明(右)以一身越南裝打扮再拍咖啡廣告。

至於,在片尾出現的林夕,角色是「腦細」的老細,他以「林總經理」身份出來鬧人,指大家改歌詞好夾硬,又問他們是否識填詞,十分搞笑。另一笑位是黎明入「腦細」房送手信,要求「腦細」坐在單車上攬他腰,重現他與張曼玉在電影《甜蜜蜜》的經典場面,但廣告中hehe味極濃。撰文:小米


■林夕(圖)及劉江都玩埋一份,在廣告現身。

劉江



來源: http://hk.apple.nextmedia.com/entertainment/art/20170513/20019459
合作 賣啡 林夕 驚喜 登場 黎明 林日 日曦 曦玩 HeHe 甜蜜蜜 甜蜜
PermaLink: https://articles.zkiz.com/?id=332851

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019