青笑怒罵：拎住iPhone反資本
1 :
GS(14)@2011-10-25 22:31:55http://m.sharpdaily.hk/detail.ph ... 5307&category=daily
香港怨氣重，港式「佔領華爾街」活動口號，口口聲聲要打倒金融霸權、地產霸權，有主持人竟然把活動比擬為「好似八九年六四天安門廣場」，與一場愛國民主運動反貪反腐相比，唔係呀化﹗邊忽似呀？也有主持堅持停留於一貫以挑釁中大與港大之間矛盾為己任的out到唔out形式來搞分化。
高舉反資本主義旗幟，嗌得聲嘶力竭，訴求一大堆，聽落去超正義，行動就標榜集體，思想就標榜個體，求其搵一位成員接受電視台電話訪問，開場白一大堆，竟然口口聲聲話只能夠代表自己發言，帶主持遊花園。
當人人都只係從自己利益出發，反映焦點方向目標模糊，索性找一個不需日曬雨淋的地方，有哪裡會好得過滙豐總行﹗
假如今次去IFC樓下光天化日之下紥營兼玩絕食，所表達出對活動的誠意會更可嘉。
以現時形勢，頂多仍只停留在柴娃娃形式化階段，何解？個個拎住部iPhone，用主要大型寬頻供應商網絡通訊，不就是身體力行，百分百體現對資本主義產物的崇拜與對網絡寬頻霸權的支持嗎？
今次活動的共通點，只係人人本着一股怨氣，卻表面團結，實質鬆散，也許即使曠日持久，亦只為等更有組織能力、凝聚力的領隊出來主持大局。
現在似乎已有人想走出來，為活動主持大局當領導，只可惜這些人都係一些平時未見明顯鋪排部署，卻在一時三刻之間覷準機會攝位，對公眾依然係面目模糊，說穿了明顯又係從個人利益考慮，想搵點着數博上位而已。
適逢換屆，發展下去，好可能會好似美國，出現較具民意基礎的政黨介入，但要把議題包裝引發共鳴，又係離不開要打倒甚麼甚麼。畢竟到了今天，究竟係要打倒資本主議，抑或要改良資本主義，同一群人裡都未見有明顯共識。
不要忘記，極富階級之所以能成為極富，因為他們有方法賺更多之餘，亦有更多方法鑽政策空子，令自己少交稅，尤其是活動背後的資金從何來，「佔領華爾街」發起者係反資本主義推翻現有權力架構著稱的Adbusters雜誌，你們有樣學樣搞佔領，意義上肯定係歸了邊，尤其整個活動背後的疑似金主傳聞正是金融大鱷。
最終的所謂打倒，原來都只係畫虎不成，打劫所有納稅人荷包，把社會所有財富平均分配，香港已成功了一半，因為做又廿八、唔做又廿八，可惜更多人是連廿八都睇唔起，最好搞的生意是hea住守株待兔，或者但求不勞而獲。
胡孟青
獨立股評人