ZKIZ Archives


加國預婚巴打找數鄭敬基:我一毫子冇出過!

1 : GS(14)@2016-04-15 04:29:39

2016-04-14 NM

53歲,又離過婚的鄭敬基,下月再做老襯,娶細19年的地產女友Angie。自嘲「又老又冇錢」的他,難得老婆仔唔mind,更為老公慳一蚊得一蚊親手製作囍帖。老婆抵錫,鄭敬基傾盡友情力量,上週同準新娘及雙方親友,在加拿大舉行一個百分百韓式pre-wedding trip,讓女友化身韓劇女角。有個以他為重的老婆,仲有班戥他開心,包起成個pre-wedding使費的好兄弟,鄭敬基在party內對另一半情深表白:「你知我包袱有幾大,但你都可以接受。」兩口子感動到攬到實,半百鄭敬基難得有情人。嘉樂仔做伴郎

鄭敬基半生吊兒郎當,廿年前更因偷食導致離婚。由多倫多回流香港後,亦不停換畫,女友名單不乏圈中人,包括鄧萃雯、鄺文珣。人生下半場,與三十四歲做地產的女友Angie拍拖半年決定拉埋,女友條件好又體貼,但令鄭敬基決定再娶,是對方冇嫌棄年紀大又冇錢。「本來打算唔擺酒,未婚妻仲話:『我喺教會派餅宣布消息就得。』我更加要逼自己唔可以返轉頭,要對佢一條心,就要公告天下。」鄭敬基說。好日子是下月七日,一對新人上午先在北角國際神召會堂區行禮簽字,晚上設宴十圍招待至親摯友,伴郎「南山三虎」錢嘉樂走唔甩,他一對廿多歲仔女亦會做戥 穿石。冇錢唔緊要,鄭敬基肯花心思,一樣氹到另一半冧爆。上個禮拜,鄭敬基偕未婚妻飛加拿大,出席佈道會同教友分享,實情是搞pre-wedding party氹老婆。

抄足《浪漫滿屋》

Party於香港時間四月八日晚在多倫多一酒店舉行,出席者包括雙方親友,及鄭敬基當地的「巴打」。鄭敬基吹雞搞party,但他竟然一毫子冇俾過,一班朋友負責全部使費兼安排行程,更刻意安排準新娘一嘗做韓劇女角滋味,令也是韓迷的Angie冧晒。從party場內的片段可見,現場氣氛有如韓劇《浪漫滿屋》一樣浪漫;雖然只是預婚派對,但一對新人進場、上台合巹交杯、互餵蛋糕、祝酒等等,過程跟正式婚宴 無異。

讚老婆完美

席上,準鄭太公開多謝出錢出力的賓客。「多謝你哋經常咁幫佢,尤其喺佢孤單時候陪佢飲咖啡,飲到佢咁醒(全場爆笑)。」讚醒目未夠,Angie更當眾表白:「你唔需要成功,唔需要完美,你已經對我好重要,因為你係神為我預備嘅 伴侶。」之後鄭敬基攬住老婆跳舞唱《酒杯敲鋼琴》,又一邊對住老婆唱《為你鍾情》,一邊講:「佢對我真係好包容,佢知我包袱有幾大,但佢全數接受,想話俾大家知,你(老婆)真係接近完美。」二人隨即攬住喊晒。

一毫子冇俾

鄭敬基接受本刊長途電話訪問時說:「我哋喺呢邊仲影多咗輯新嘅結婚相,影相嗰日得零下六度落緊雪,好凍但好靚。攝影師想有韓劇feel,就算漫天風雪,都有我撐起另一半,要佢幸福,感覺真係好正。呢個trip我哋仲坐直升機環島、去睇NBA同影呢輯相,仲有成個pre-wedding晚宴啲費用,我真係一分一毫冇出過,全部係朋友嘅心意。」鄭敬基自認「冇樓冇車」,下月的婚禮亦慳得就慳,但因為朋友多,禮服、婚紗、首飾通通有贊助,而囍帖則是未婚妻親手製作,自己黐黐貼貼,賢內助。

專食花旦

鄭敬基唔高大亦唔靚仔,但識氹人,更是「花旦殺手」。

撰文、攝影、攝錄:娛樂組
加國 預婚 婚巴 巴打 打找 找數 數鄭 鄭敬 敬基 我一 一毫 毫子 子冇 出過
PermaLink: https://articles.zkiz.com/?id=299264

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019