ZKIZ Archives


少林功夫加唱歌跳舞,有無得諗呀?

來源: http://hkcitizensmedia.com/2015/04/21/foxshaolinkungfu/

少林功夫加唱歌跳舞,有無得諗呀?

上一篇「你睇基本因素,我睇人民日報」帶來不少回響,有讀者私訊盛讚小弟一矢中的講出要點,話雖如此,係過去的星期五、六、日,全新的冰火感覺,令一眾股民沖左個正宗的「芬蘭浴」。

在上星期五收市後,中證監放風要叫停傘型信託基金,又話要收緊兩融,消息一出,夜期即時急挫800多點,收市跌近600點。及至週末,中證監澄清其只想大家控制風險雲雲,正當大家估個都會PK之時,星期日人民銀行又宣布降低存款準備金1%,力度為2008年以來最大的一次,那究竟咩野葫蘆賣咩葯呢?

其實不難理解的,作為監管機構,幾時都係叫人註意風險架啦,幾時會叫人地去賭架?正如你幾時見鬍鬚曾出黎講:「大家買少少股票玩下啦。」,道理如出一徹。

而作為央行的中國人民銀行,佢要睇嘅係經濟增長,當大家見到中國第一季個GDP只得7%,係6年最低增長之後,大家都憧憬佢會做番啲

老狐貍身為一件市場粉餅,估計中國政府要穩定,要慢牛,要長牛,要受控,邊個亂來就打巢佢,所以大家有睇《人民日報》的都明白呢個新常態。

呢幾日更多人係度問,究竟個市係咪玩完?

小弟的意見係:「未,整固下咪幾好咯。」

點解?

單睇幾樣啦:

1. 熱錢

金管局在港匯於4月上旬觸及強方兌換保證出手接280億元後,今日再出手兩次共115.85億,證明有熱錢流入市場。

2. 市盈率

係呀,我睇基本因素嘛,港股市盈率仲係得11倍左右,應該唔會隊住。

3.未見明顯敗跡

在過去幾時浪,老狐貍必定會見到有人辭職炒股,又或者按樓炒股,雖然今日見到有華資行高調話可以按樓借錢炒股,但呢樣其實一直都有,風氣未盛未使擔心住。

至於出現股神呢D野,個條肥仔股神中學都未畢業,有人聽佢都傻啦,又唔會拎單俾你睇,講野都未正,思路唔清淅,呢件唔算。

好了,即係話個市未玩完,咁應該買乜呢?

至於呢點,我就會用番「睇人民日報」技巧去留意下國內資訊,睇下可唔可以找到亮點。

老狐貍留意到國家能源局宣佈了國家能源互聯網行動計劃正式開始制定,同時成立中國能源互聯網聯盟,意在促進清潔能源高效利用,促使傳統產業轉型升級,當中重點包括高效節能、智能電網、新能源汽車、新型太限能發電、新能源互聯網化,即是繼「互聯網+教育」、「互聯網+金融」之後的「互聯網 +能源」,相信為市場最亮點。

咁究竟會有乜受惠?遠的不說,按國家能源局公佈,1Q新增光伏發電裝機504萬千瓦,而全國現時有共3312萬千瓦,增長極快,老狐貍相信以中國政府的快速執行力(不計其質量),此類行業的投資將非常強勁。

另一樣的是新能源汽車的充電器,我的國內朋友有反映過國內類似的汽車充電設備嚴重不足,若要加快新能源汽車的普及,充電設備是重要一環。

「互聯網+」好似乜都用得著,就好似睇緊「少林足球」一樣,功夫可以用黎踢波,追巴士,修樹葉,又或者防PK,只要唔好用黎唱歌就得了。

 

註:老狐貍從不喜歡直接講出股票號碼,希望大家可以自己思考一下,記得不要問我啊!

如大家有興趣,歡迎大家加老狐貍的FANPAGE交流下啦

https://www.facebook.com/oldfoxfanclub

老狐貍

少林 功夫 唱歌 跳舞 有無 得諗 諗呀
PermaLink: https://articles.zkiz.com/?id=141691

抄《少林足球》橋碌柚葉+番梘有得諗?

1 : GS(14)@2014-10-28 22:09:07



阿媽成日話,只要用碌柚葉沖個涼,乜嘢衰氣都可以沖走晒,但原來西方一樣有呢樣嘢可以去衰氣︰「比如係白鼠尾草,喺墨西哥嗰度已經過千年歷史,而且係薩滿式祭司會用嘅嘢!」做開marketing嘅徐緣,自然就將白鼠尾草聯想到做生意︰「因為我做護膚品,一諗起呢啲,就會諗係咪好似hand cream咁?你知道碌柚葉都有沖涼嘢啦!」碌柚葉加上番梘?會唔會同太陽能電筒一樣咁爆?星期四晚11:00《亂噏24》足本版!沖走晒啲衰氣!



潘紹聰X柳俊江星期一至五 晚晚「搵鬼睇」
http://hk.apple.nextmedia.com/horror



【三個粉絲去首爾】追星實錄,即上韓劇讀:http://hk.apple.appledaily.com/kstar




來源: http://hk.apple.nextmedia.com/entertainment/art/20141028/18914921
少林 足球 橋碌 碌柚 柚葉 有得 得諗
PermaLink: https://articles.zkiz.com/?id=286249

解決土地問題好頭痕搞水上宿舍有無得諗?

1 : GS(14)@2016-10-11 08:11:47

丹麥哥本哈根有建築公司在海港興建水上宿舍,以解決當地租金昂貴,大學生租不起房子的問題。根據當局數據,哥本哈根作為2015年全球十大生活費最昂貴的城市之一,寸金尺土,每年約有2.4萬名大學生租不起房子。當地建築公司於是逆向思維,用了9個舊貨櫃,在海港興建一個12人宿舍「Urban Rigger」。宿舍天台裝有太陽能板發電;內部則用美國太空總署(NASA)研發的氣凝膠密封,保持室內溫度。宿舍預計10月底會有首名學生入住,月租為729美元(約5686港元)。建築商目前正計劃在國內其他城市以及瑞典發展更大規模的水上宿舍,目標是未來10年,為全球提供1.2萬至1.8萬個廉價宿生單位。英國《每日郵報》




來源: http://hk.apple.nextmedia.com/international/art/20161011/19797509
解決 土地 問題 好頭 痕搞 水上 宿舍 有無 得諗
PermaLink: https://articles.zkiz.com/?id=311524

財路:津發炒雄安有得諗

1 : GS(14)@2017-04-12 22:40:06

天津發展(882)揸近60億現金,貴為天津市窗口,銀彈足,無論本身資產壯大或者俾阿媽湊大,一樣有concept,股價仲喺三年底,窗口當中PB又至平,加埋掂到家陣熱爆雄安新區,津發有得諗。津發到上年尾揸現金近59.2億元,就算減咗同期借款近22.7億元,淨現金高達36.5億元,市值得48.7億元,淨現金係市值75%!津發銀彈勁厚,2015年向阿媽收購隆騰醫藥67%股權,兼喺當年年尾搞掂,揩到前景靚仔瓣數。但津發家陣仲包括電力、自來水、熱能、機電、升降機等,尤其機電瓣數,唔計資產減值,2015年同2016年仲係蝕過億元,呢個前提下,津發係咪有進一步重組,將資產執到靚靚仔仔嘅空間。早幾年《21世紀經濟報道》引述消息人士稱,天津市政府授權天津醫藥集團嚟港上市,兼屬意借殼形式。只針對一個point講,終極對口,係有好多優質資產,津發確實有條件,俾大孖沙母系湊到肥肥白白!排除呢個可能,津發現價4.59元,潛喺三年底,PB得0.47倍,比過去十年平均0.6倍仲要低。津發揸住34.4%嘅力生製藥(深002393),家陣PB2.3倍。又場內主要窗口北控(392)PB0.9倍、上實(363)0.7倍,津發平咗大截!內地政府決定設立河北雄安新區,美銀美林報告話,雄安新區喺港口方面以津發最受惠,津發一樣有呢壇炒作concept。買津發,當單係追番本身十年平均PB,講緊要升28%到5.75元,追最近磅窗口上實,津發講緊要翻半番到6.7元,到時集團總市值都係得73億元。錢雋細價股專家本欄逢周二刊出




來源: http://hk.apple.nextmedia.com/financeestate/art/20170411/19986298
財路 津發 炒雄 雄安 安有 有得 得諗
PermaLink: https://articles.zkiz.com/?id=330091

操盤手札記:銀髮概念有得諗

1 : GS(14)@2017-05-13 02:03:22

港股上演屠熊記!日前市傳國家隊為一帶一路峯會護盤,好友借勢大挾淡倉,兩日共91隻熊證打靶,相當於近5,100張對沖期指,一地熊血!恒指昨日突破25000關,大市已連續兩日收於前浪頂之上,睇多一日係咪企穩,就知係真突破定假突破。內地金融去槓桿,成為A股緊箍咒。A股受壓,港股會被拖後腿,皆因中資股佔港股市值六成。A股短期難以轉勢,想買優質H股宜有耐心,不急撈底。另外,可留意3月底年結嘅公司,下月會派成績表。對於內地金融去槓桿,《華爾街日報》認為「有利於中國經濟長期健康發展」。經濟健康當然重要,身體健康更加重要!根據彭博全球健康指數,喺163個國家中,意大利居首,新生嬰兒平均預期壽命超過80歲。至於向來以長壽見稱嘅日本則排名第七,中國就排第55位。雖然排名無提及香港,但根據衞生署嘅2016年臨時數據,男性出生時平均預期壽命係81.3歲,女性係87.3歲。換言之,港人係全世界最長壽!點解港人會咁長命?怕死囉!怕死自然會注意飲食、重視體檢等。其實現今醫學昌明,人越嚟越長命,全世界都面對人口老化問題,但人口老化亦帶嚟銀髮商機。市場上嘅銀髮族概念股,主要針對生老病死中嘅老病死,包括保健、養老、醫療、復康、墓園等;不過,亦有針對衣食住行嘅,以飲食股為例,中式快餐兩大巨頭大家樂(341)、大快活(052),近年就鬥推健康餐;大快活更自2014年起推出長者優惠。大快活係3月底年結嘅公司,往年業績撼贏大家樂、翠華(1314),今年拭目以待。隨着集團加強成本控制,加上本地續租租金升幅放緩,未來又會增加分店,盈利有望穩健增長。大快活現價32.65元,PE20.6倍,息率4.1厘。走勢上,呈現頭肩底向上突破,股價升穿頸線,不妨留意。割柑人本欄逢周四刊出




來源: http://hk.apple.nextmedia.com/financeestate/art/20170511/20017331
操盤 手札 銀髮 概念 有得 得諗
PermaLink: https://articles.zkiz.com/?id=332688

笑到最後:「樓價產品」有得諗

1 : GS(14)@2017-10-22 16:23:44

一個不方便說的真相,因為太過政治不正確,無人夠膽講,所以就由高明嚟講得白啲:香港樓市嘅問題並唔係住嘅問題,而係冇份贏嘅問題,對樓市咁大怨氣,因為未上車嘅人冇份贏。高明7月寫過「冇份贏係慘過輸」,其實應用喺樓市亦一樣。樓市家陣最大嘅問題並唔係冇得住,而係冇份贏。更大嘅民怨係,過去10年,聰明人知道咁多外圍不穩因素,係唔會買樓。10年過去,樓價飛升,聰明人仲等緊時機,反而一個天水圍師奶,發咗個小達,鬧番人食屎專家轉頭。聰明人的財富大落後於一個師奶,民怨就係咁嚟。今次份施政報告講明要解決市民置業嘅問題,證明咗特首都明白,主要問題唔係住屋,絕大部份怨買唔起樓嘅人都有地方住。今次施政報告話要起首置,詳情未寫明,但賣出條款一定嚴,如果最後類似「十年內只可以原價賣畀政府」,變相令首置變成升冇份贏,跌就當儲錢。要香港人有份贏,就應該發明同樓價掛鈎嘅資產,例如賣地表現掛鈎債券或者認購居屋期權,同iBond一樣,香港人優先認購,買賣單位拆細到一萬蚊,確保大部份人買得起,並且喺港交所(388)掛牌買賣,令到未有能力上車嘅人,都可以分享樓價上升嘅成果。無論樓價高定低,買樓成本大,一定有人無法上車,加上現金長年跑輸任何資產,極難靠儲蓄上車。如果發明資產將樓市拆細,喺資產上局部上車,到真係買樓時都冇追得咁辛苦,叫做救得一個得一個。最後,跟進高明喺第四季投資導航推介嘅中州證券(1375),當時推介原因有二:一、旗下「中原期貨」分拆釋放價值;二、H股相對A股大折讓。前者因為係中國新聞,香港較靜,報導講過董事長菅明軍話計劃有5間子公司在新三板或香港主板上市,可能要到分拆公司香港上市先有較多焦點。至於折讓,現時仍維持66%。季初推介時3.63元,上星期最高見過3.79元,幾肯定股價已經見底,但要炒得起,都要時間去蘊釀,惟有繼續耐心等待。高明
http://fb.com/bigricetea本欄逢周一刊出




來源: http://hk.apple.nextmedia.com/financeestate/art/20171016/20184563
笑到 最後 樓價 產品 有得 得諗
PermaLink: https://articles.zkiz.com/?id=342975


ZKIZ Archives @ 2019