魚油一樽 - 方俊傑 為甚麼要逼人壁咚? 2016年11月18日
1 :
GS(14)@2016-11-21 03:49:02http://www.am730.com.hk/column-337882
很慘。現年57歲的毛舜筠，於今年4月，曾笑言如果跟現年52歲的黎耀祥在處境劇中有親熱戲份，擔心會害觀眾睇到嘔吐。不幸言中。日前一集，2人仿效韓劇青春偶像，來一招壁咚激咀。聞說香港電視界青黃不接，孭飛的主角，往往有一定年紀。自古有云，睇餸食飯，或者因材施教。手執毛舜筠與黎耀祥兩位演技有保證的主角，如果劇本寫得合適，照道理，即使不能得到觀眾擊節讚賞，至少也可避免惹起公憤。正如，我不明白，明知要用田蕊妮做女主角，點解要視后扮可愛小貓？唔係話唔扮得貓，除非你敢用張秀文做女一囉。很慘，我是指早有自知之明仍要死頂上場的毛舜筠。
很慘。我也明白，從事幕後創作的，當然希望盡量創新。否則，餐餐也是《溏心風暴》式爭產，或者《宮心計》式勾心鬥角，又會有人走出來批評食老本。演員陣容來來去去同一堆，想創新，就難免要冒一定風險。你總不能叫夏雨搭李司棋搭關菊英，主演校園愛情劇；也不太可能叫羅霖學新垣結衣飾演月薪嬌妻，集集跳萌舞。會死人㗎。很慘，我是指有心有力有熱誠但冇資源配合冇上層支持的幕後製作單位。
咁，點算呢？市面上有不少真人真事，適合改編成電視劇，而符合電視台的男一女一平均年紀。例如劉嘉玲與關之琳的反目經過，就充滿張力，一言一語隔空攻擊，充滿追看性。加埋周旋於兩位阿姐中間，挑起明爭暗鬥的男主角，三個角色都年紀不小。疑似談情靠行山，疑似鬧交是出席同一個舞會，總順眼和合理過黎耀祥壁咚毛舜筠。
又例如，找田蕊妮扮演恍如毛孟靜的政客，忍耐6年才等到最適合時機跟黨友反枱，在記招上，句句有骨，比起扮貓，也應該更適合視后發揮。當然，如果電視台願意提攜新血，我覺得被搶奪議席的故事，其實更加具備戲劇衝突。單單動作場面都多好幾場，要找《城寨英雄》的武術指導幫手。
針對知名人士，太過容易被對號入座？又太過離地？強烈建議拍一個巴士司機與的士司機的恩怨情仇連續劇。兩個小市民，究竟在日常生活受到幾大壓力，才抵受不住而爆煲，接載乘客時也要在隧道不惜一切鬥撞？呢個劇本，夏雨好，歐陽震華又好，鍾景輝都好，完全符合角色需要。甚至可以加插到場調停的交通警，原來剛剛被報社主編的太太辱罵完畢，一樣充滿戾氣。嘩，仲唔係苗僑偉？
當然，我也很明白，以上種種建議，都不會變成真實。會變成真實的，只會是富豪在報紙頭版登廣告發聲明證實已跟前度分手，並早早安排了20億生活費。香港觀眾嘛，到最後，還是富豪三角戀最受歡迎。真的，處處好題材，不要再勉強黎耀祥扮韓星了。真係很慘的呀！我指班觀眾。
方俊傑
觀塘長大，壹仔打滾，現職商台，偏愛西片、
西劇、中日韓美女。
利物浦悲慘球迷，
娛樂與感性並重。