ZKIZ Archives


古靈精怪集資 Money Cafe

http://moneycafe-icable.blogspot.hk/2014/04/blog-post.html
因為被認為集資行為怪異,招商局國際一度被洗倉。收市後,透過公關安排,又來個電話會議,大投資者要知多的、小投資者要知多的、媒體亦要瞭解多的,為何要拒絕傳媒?

公關失分,媒體希望替公司解釋,亦等同對方自動棄權,亦將小股東權益棄之不顧,實在要打八十大板!!

老實,市場好,小股民好,對一四四印象不俗,云云中資來說,招商算實事實幹,做好本業,從不搞古靈精怪企業行動。

集資?無問題、供股?亦無問題。但溢價供股,同時數字上三年後溢價代價全數歸還,市場就是搞不清。

四成負債率要集資,但逾百五億集資所得,逾一半還債。公司認為集資方式最佳?但每股盈利大攤薄、等同成本變相增加。

用首年八釐息率,索性可換股債會更便宜,用招商個招牌借銀團,九成九毋須八釐息。

當然,透過有關方式集資,利息開支不列入損益帳內,數字上慳息,但息始於是來自公司本身,數字遊戲已經表露無遺!

如果用招商說法,既集資,又為股東公平起見,你一四四大可以溢價供股,但大股東設禁售期,並同時向股東一次過派特息,道理其實跟招商MCS框架,方向一致吧。

市場多古怪野。招商之外,恆大負債大增,但卻大派高息。還有早前新世界最高估值提出私有化新大,亦有內銀盈利增長放緩亦維持派息率。

如果諗得的,可能會諗多左,但如果唔諗,或者未必適應市場新常規化情況!
古靈 精怪 集資 Money Cafe
PermaLink: https://articles.zkiz.com/?id=95457

古靈精怪素食店處處「危」「機」

2014-09-05  NM
 
 

 

兩年前,香港首間以氮氣製作雪糕的Lab Made(分子雪糕),在大坑開業。老闆鄭康宏(Ronnie)當年接受本欄訪問,記者以「危」「機」處處形容生意。經過兩年洗禮,Lab Made找到生機,分店愈開愈多,由小店變成六家分店,上週更衝出香港到上海開業,每月盈利由五萬元狂升至三十五萬。插好旗,他今年中再與一班飲食好友,在北角堡壘街開設素食店「素食‧分子」,大玩中西合璧的新派素食。雖然與雪糕「大纜扯唔埋」,但同樣有「危」有「機」。開鋪初期,曾因煮食問題將整個廚房「炒魷」;鋪頭十個股東,又各有各生意,自然各有各主見。這一次,喜歡踩界的Ronnie又如何化危為機?

本是藥劑師的Ronnie,兩年前從英國回流香港創業,在大坑開設分子雪糕店。分子雪糕是以低溫把氮氣加壓,轉化為液態氮,令溫度低至-196℃,材料在三十秒內凝結成雪糕。由於新奇有趣,鋪面的機器加表演,令人氣不俗。但液態氮屬第二類危險品,儲存量有限制,而運輸及食材成本亦高昂,令這盤生意有不少危機。Ronnie經過兩年時間,把問題逐一化解:「開咗工場,令好多嘢可以中央控制;而新鋪必揀旺鋪,起碼有人流保證。」加上,市面上競爭甚少,令Ronnie獨佔商機,現時分店已開至六間。生意穩定,令他鬆一口氣。這時,Ronnie在稻苗學會(稻香旗下烹飪學校),認識一班飲食業行家,如得龍大飯店老闆曾國生、百年老字號珍香園豆腐店、金蘭花泰國菜,另外數人從事有機蔬菜場、餐廳設計等等,一行十人受其中一位信佛的導師影響,萌起搞素食店的念頭。Ronnie見有時間,於是參與,雪糕店交由女友「睇場」,「我哋雖然全部都搞飲食,但竟然無人開而家好hit嘅素食店。」這檔「素食‧分子」,有賺錢機會,但亦有隱憂。

優勢一:中西合璧吸年輕人

坊間素食店多的是,他們為了突圍,決定走多國菜路線,用創意吸引年輕人。菜單中如「腐乳Pizza」及「豆腐厚多士」等都是獨創,「加啲香春菜落去,配埋腐乳,就吸引好多鍾意食意大利菜嘅人柯打。」Ronnie說。亦有外觀如冬菇的「冬菇蓮蓉包」及「鳳凰天使麵」。記者以為鳳凰天使麵只是普通走肉的西式醬汁麵,但Ronnie以中式煮法,將天使麵用油炸成麵餅,外貌似潮州的糖醋麵餅,再配以西式醬汁及冬菇片,令食法新鮮,「將西式嘅食材用中式煮法,中式食材用西式或者東南亞式去煮。唔似以前舊式素食鋪,食來食去都係味精齋或者素肉。」身形肥胖、自稱是食肉獸的Ronnie,現時每週兩次茹素:「要做到啲客人同我一樣,食完都唔覺自己食齋!」Ronnie亦在裝修下功夫,他在北角租下一個樓底極高、面積逾三千呎的鋪位,裝潢似café多過傳統餐廳。他亦在鋪頭內以分租形式,開設Lab Made小型專櫃兼賣雪糕。除了提高自己雪糕店生意額,亦吸引一班年輕的分子雪糕「粉絲」來吃素食,產生協同效應。Ronnie強調生意站穩陣腳後,會推出分子素食料理。賺錢指數:$$$$$

隱憂:素菜廚師質素參差

雖然「素食‧分子」背後有一班飲食界老闆撐腰,但開業初期,竟敗在廚師手下,最後要把他們通通「炒魷」,換過一批。Ronnie無奈說:「廚師被『中式齋』呢個傳統框死咗,有啲認為煮齋就要重口味,唔識變通,又接受唔到中西合璧,無創意,唯有開鋪前炒晒。開張第一日要拍檔得龍飯店嘅生哥來幫手煮菜。」他坦言,「素食‧分子」的賣點是多國菜,但死穴也是多國菜,「喺市場,好難搵到擅長多種菜式的廚師。」因此開業頭兩個月,因廚師問題令菜式質素不穩定,「嗰時我完全唔敢叫朋友嚟幫襯。」Ronnie希望逐漸把廚房及煮食方式系統化,「我哋唔想請一個炒餸炒到識飛嘅廚師。如果佢一辭職,餐廳點算?我要嘅廚師係適應到公司原則。而家會用西廚嚟做主廚,煮西餐嘅接受能力高啲,可以在菜式上玩花款。」

優勢二:股東多攞平貨

Ronnie與這班拍檔開業時,已想好運用各拍檔的本業支持,例如店內出售的豆漿及豆腐多士,全由在西灣河經營多年的珍香園提供,「有個拍檔係種菜嘅,鋪頭所有菜都由佢提供,價錢平過出面供應商一成。有人開泰國菜,有人開中菜,亦都有西餐,大部分貨都由佢哋提供,所以成本係比其他餐廳有優勢。」他們當中有拍檔是冠藝老闆張先生,「佢主要負責餐飲業裝修,經常幫米芝蓮得獎餐廳設計。最近Openrice排頭位嗰間樂天皇朝都係佢負責裝修嘅,素食‧分子搵佢搞比市價平咗三成!」另一位股東專負責飲食業出牌照,為「素食‧分子」申請牌照時只收取成本價,「如果冇咁多位拍檔利用佢擅長嘅一面幫手,我諗間鋪投資額要多成一百萬。」攞平貨,加上無肉菜式,減輕成本,如腐乳pizza一碟售九十八元,細細件的芝士豆腐多士售四十八元,毛利高達七成。賺錢指數:$$$

隱憂:股東多易爭執

「素食‧分子」多達十位股東,Ronnie表示開鋪前,各股東已明確分工,如得龍飯店老闆曾國生擔任行政總廚,Ronnie則負責marketing,「負責嗰個範疇嘅,落決定都係佢自己話事,除非有其他人強烈反對,咁就開會同投票。不過呢三個月嚟都未試過投票,好似我負責宣傳,所有方法都由我嚟做決定。」不過記者認為股東人數多,始終在協商方面較繁複。尤其鋪頭開始賺錢,分錢還是再投資?已可各持己見。而且各人都有自己本業,這盤生意相對上是小投資,有爭拗時,隨時抽身話咁易。

優勢三:素食店競爭小

現時愈來愈多人食素,但北角只有四間素食餐廳,競爭不算太激烈,Ronnie開店宗旨是令更多非素食者幫襯,成為一班素食分子,因此除了會有素食者幫襯外,目前大部分顧客都是屬貪新鮮的非素食者。記者在現場訪問了四枱客人,只有一位客人本身茹素,其餘均是貪新鮮來試食,本身住北角的黃先生表示受其素菜pizza吸引而幫襯,「我食完先記起呢個pizza係冇肉嘅,令我呢啲食肉獸都唔反感。」賺錢指數:$$$$

隱憂:鋪位偏僻

「素食‧分子」位處北角堡壘街,夾在港鐵北角站及炮台山站中間,前往哪一個站,步行都需時十至十五分鐘,鋪位旁邊是一間車房,整條街更有兩個吉鋪待租,人流明顯不及傳統食街七姊妹道及英皇道。開業初期靠分子雪糕及素食等gimmick吸引客人,曾出現門口排隊的熱鬧情況,但暑假過後人流開始減少,記者在上週五及週六視察,發現晚飯時間未坐滿,店鋪經理Kenny解釋,由於附近酒吧多,「最近英超開鑼,夜晚少咗好多客。」Ronnie坦言由於租金較平才會選址這裡,「呢度租金十三萬五千,但有三千呎,我尖沙嘴間雪糕店唔夠二百呎,要十八萬租!」他認為要提高盈利,就要開分店,「同沙田新城市廣場傾緊開鋪,今年內應傾得成。我哋係想盡快開,如果係商場鋪,人流一定旺!」

開業資料(5/14)

^三上一按及經紀佣金租金^:HK$540,000裝修:HK$1,450,000入貨:HK$250,000設備及雜費:HK$550,000總投資:HK$2,790,000

營業資料(8/14)

營業額:HK$850,000租金:HK$135,000人工:HK$250,000入貨:HK$300,000雜費:HK$50,000盈利:HK$115,000

古靈 精怪 素食 處處
PermaLink: https://articles.zkiz.com/?id=113159


ZKIZ Archives @ 2019