ZKIZ Archives


李小加叫人試A餐

2014-09-25  NM
 
 

 

今年十月除咗有佔中,仲有滬港通。小宗聽聞滬港通將於十月中開車,近排港交所就同班經紀演習咗N次。早兩晚,港交所搞嘅「滬港通投資者教育講座」舉行第一場,港交所行政總裁李小加現身支持,仲笑晒口打咗個比喻。佢話自家出品嘅H股未必好食,但保證乾淨,出咗問題要負責,但A股呢,就係賣對面餐館嘅餸菜,唔係自家出品,出咗問題當然「零負責」啦!李小加擺到明「有鑊唔孭」,小宗啲證券界老友,當堂聽到O晒嘴!

而家已有好多華資證券商狂呻,呢個「滬港通遊戲」去到咁大,無得唔玩埋一份。但陪玩嗎?如果A股出事班客詐晒型,佢哋只能硬食,無得向上反映。證券商呢幾個月已成日問港交所,究竟證券商有咩具體風險及權責,但對方闊佬懶理,答唔出。或者好似李小加呼籲大家咁,無乜嘢做,咪隨便買一千股A股,感受吓大陸股市操作先囉。嗱,不過後果自負呀!

貼金 vs 擦鞋

喺中環,無邊間夠文華酒店頂樓間文華廳「寸」,淨係週六、日至有點心食,仲過百蚊一碟,夠喺地踎酒樓食一餐;週六去過踩場,睇吓佢寸定我寸。點咗幾個點心,四粒蝦餃皇$90;兩粒蜂巢鮑魚盒$107,一盅燕窩雞豆花,私人帶咗一樽日本嚟嘅「金箔」,city'super貨色,四嚿幾水;呢排日圓貶值抵玩呀,等我即席表演咩叫做「貼金」,搵牙籤撩丁點金箔鋪喺蝦餃、鮑魚盒個面,啲貴氣出晒嚟,咁搞一搞,碟點心賣貴一百幾十都得呀!其實以前幫襯文華地下間coffee shop食早餐多啲,特別係溫哥華坐完飛機返香港有jet lag,朝早等如嗰邊晚黑,坐低食個早餐時,有碗粥落肚,好似食晚飯咁;周不時見到啲老細約埋下屬晨早八點食power breakfast(即係工作早餐會,通常有重要決策),遲到者負責找數,九點啲友就散水返公司做嘢。以前文華門口有個殘障嘅擦鞋佬,咪睇佢又殘廢又擦鞋,條友好鬼有霸氣,擦鞋由佢開價o架,見你行完地盤沙塵滾滾又話要貴啲,著去飲嘅鞋啲皮靚啲,都係要收貴啲。佢仲好少出聲o架,用個鞋刷喺木箱上敲吓「dot dot」,客仔自動提上另一隻腳;朝早文華有專人同佢搬個木箱出去俾佢搵食,夜晚幫佢收返嚟,抵佢招積喎,無法,全條街得佢一檔,所以話擦鞋佬有本事,佢霸到個有利位置,喺佢個行業都可以彈起做number 1,又唔見踎喺皇后戲院班擦鞋仔去到?從呢個殘障擦鞋佬身上,我學到嘢o架,特別係俾老豆鬧到頭耷耷嗰陣!

中環寸嘴

工廈大王楊耀松大仔,家族的收租物業,遍布港九,屬正牌收租公。自認寸得起,謂「有我咁得閒,無我咁有錢;有我咁有錢,又無我咁得閒」,經常流連富豪飯堂品嘗美食,仲喜歡到新開食肆「踢竇」試新菜。

陳啟宗阿媽至高權威

朗尼.陳啟宗呢輪捐錢捐上癮,半個月前,以「晨興基金會」之名捐咗三億五美金俾哈佛,支持其公共衞生學院發展;到上星期,佢又同老婆捐兩千萬美金,俾南加州大學嘅職能科學與職能治療學部。雖然金額比捐哈佛少,但已係該學部最大筆捐款,所以同樣有得冠名。上次用咗阿爸陳曾熙個名,今次輪到阿媽啦!朗尼陳阿媽譚慶芬,今年已九十幾歲,朗尼陳話想藉冠名向做過多年護士嘅阿媽致敬!睇個冠名係「Mrs. T.H. Chan」,即係陳曾熙夫人,無用到「陳譚慶芬」呢個名,貫徹老人家「嫁夫隨夫」嘅精神。其實恒隆系由陳氏嘅信託基金持有,而陳老太就係信託成立人,由佢「話事」增持減持;佢同新地郭老太一樣,揸住把「尚方寶劍」,單係恒隆地產(101),市值已一千億元。原來陳老太先係揸弗人,失敬!

本週暴戰

李小 小加 加叫 叫人 人試
PermaLink: https://articles.zkiz.com/?id=113161

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019