ZKIZ Archives


賣保險 教做戲 53歲江華再現:睇我唔使睇張家輝

1 : GS(14)@2015-06-18 14:31:39

2015-06-18 NM

○九年開始消失幕前的江華,一度因為受腰傷困擾而患上抑鬱症,要老婆麥潔文教唱歌孭起頭家;停工五年,已完全康復的他除了轉投保險業,更收生開班教人做戲。週日(十四日),身形起格的江華膠手套配波褲,chok住洗車,劉華mix張家輝,唔到你唔服!被迫搬屋

幾乎絕跡娛樂圈的江華,近年偶然被傳媒撞到,鏡頭下的他總是游手好閒行街飲茶,在沙頭角凹下村隱居五年,最近被業主逼遷,好頭痛。「條村唔大,江華成家住咗呢度五年,八千蚊租住地下嗰層,聽講兩個月前業主話要收番層樓嚟賣,唔知點解只係收佢嗰層,二、三樓租客可以繼續住。」有村民透露。住開有感情,江華雖然唔想搬,但業主態度強硬,唯有在村內另覓租盤。「呢度租盤其實唔多,江華睇中棟新起嘅,周圍問緊人租唔租幾錢租,不過未有答覆,但就算租都唔慌平。」村民說。上星期三(六月十日),本刊在尖沙咀海港城見到已經復工做保險的江華,對於被逼遷,他表現勞氣,「問業主囉,唔好問我!」

自比張家輝

星期日(十四日)上午九時,本刊到凹下村搵江華,只見他戴住膠手套、波褲人字拖襯頭箍,洗車洗到大汗疊細汗,白tee濕透,現出一嚿嚿肌肉!五十三有此狀態,fit!壹:壹週刊江:江華壹:好劉德華呀!江:嘩,舊唔舊啲呀呢句?真係失望!其實有啲渲染,呢個話似嗰個話似,耳濡目染,加咗印象分落去。壹:咁係劉德華似你囉!江:嗱,呢句說話啱聽喇,哈哈哈!壹:點樣keep到咁fit?騷個body睇吓!江:傻o架咩?要俾廣告費o架大佬,幾十歲人唔能夠隨隨便便,留番喺電影度啦,睇我唔使睇張家輝,哈哈哈!

兩車共用車牌

江華洗車期間,記者留意到他兩部私家車竟然共用同一個車牌。壹:你好鍾意呢個車牌?江:因為呢個牌太耐喇,嗰陣年少無知,無知嚟自呢個係我生日號碼,而家有乜所謂,咩都一樣,但係用開咪繼續用囉,係咁解。壹:不過你兩部車用同一個車牌喎!江:其實銀色架Jaguar我冇郁o架,因為冇俾牌費,未換番個牌啫!

收生睇緣分

過去五年,江華停工養病,生活只能食老本,只靠老婆麥潔文教唱歌、登台、開演唱會賺錢撐起頭家。復工後,江華表現積極,轉行做保險經紀外,還會開班收生教演技。「啱嘅就會教,好隨緣嗰種,我唔係話好似學校咁招生,覺得佢係可以嘅先會收,要睇時間。」投身保險業已經三個月,對於工作,江華聲言順其自然。「我唔會刻意叫人買保險,我只會做朋友,買唔買係其次。啲人以為搵到錢先叫成功,我人生觀唔係咁,食得幾多著得幾多?俾晒啲錢你又點?」江華說。

走下坡

有「翻版劉華」之稱的江華,86年參加亞洲電視藝員訓練班入行,曾是亞視台柱,拍劇外,89年亦憑電影《但願人長久》奪得香港電影金像獎「最佳新演員」獎。96年,江華轉投無綫開始為人注意,第一部大台劇《西遊記》創44點高收視,03年再憑《九五至尊》和《楚漢驕雄》攀上事業高峰後,便離開大台返內地拍劇,可惜發展不如理想,04至09年間,只拍過《新聊齋——畫皮》、《風塵三俠之紅拂女》及《跟紅頂白大三元》三套劇集,其間更因腰患困擾和事業走下坡而患上抑鬱,自此全面停工,消失幕前。

中佬熱

男人易keep!53歲江華有型有款外,唔少娛圈半百中佬都冇乜走樣,有條件繼續撈!

邵仲衡51歲95年離開大台外闖,01年與圈外女友Wendy結婚後,正式退出幕前,專心經營車房和內地賽車中介人生意。今年4月無綫重播神劇《大時代》,「大佬孝」邵仲衡人氣忽然爆升,商演活動一個接一個,令他快賺過百萬。曾在美國柏克萊大學讀政治策略的他,因夠膽識,被網民熱捧:「『袋住先』我唔鍾意,篩選咗先俾我揀,我有得揀一定唔係咁揀。」

林俊賢54歲曾是80年代當紅小生之一,96年退出幕前從商,兩度因炒股輸身家仍成功翻身,現時是證券行及製作公司老闆。去年復出拍電影《最佳嫌疑人》,今年再為應采兒做監製的網劇《天才在左瘋子在右》客串一角過戲癮,除了一頭銀髮的他,並無走樣。

吳岱融55歲87年加入大台後,憑《絕代雙驕》、《邊城浪子》等大熱劇迅速上位。90年代初,吳岱融因在亞視宣傳個人唱片被無綫雪藏及解約,之後拍過三級片,其後轉戰內地拍劇,並任職國內民企顧問。最近被無綫邀回巢救亡的他,自信爆燈:「好多外國劇都唔用年輕小生,反而用四、五十歲演員做男主角,因為佢哋有人生閱歷,演戲會更有味道。」
保險 做戲 53 江華 再現 睇我 我唔 唔使 使睇 張家
PermaLink: https://articles.zkiz.com/?id=291081

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019