七級偽術：識英雄重英雄
1 :
GS(14)@2016-07-06 07:47:36某日有人問起Mary對某公關公司主事人的評價，話唔明白何以她能如此吃得開，Mary想一想過去的合作關係，結論是對方夠專業，而且能贏取老闆級人士的信賴，但未完，還有這個──她同時和機構的公關負責人合作愉快。喂，千萬不要看輕這三個條件。第一點確是最基本要求，但老老實實，也不是間間公關公司畀到呢個感覺你。泰半是pitch嗰陣高層傾巢而出，contract到手後，搵來搵去只搵到個senior officer招呼你。人哋in house那位都出senior manager做對囗啦，一比拼年資經驗，你話邊個專業啲先！至於贏得客仔至高無上最頂層的信任，食得住對方，就肯定是米路攸關的大事。記住，在老闆面前，最緊要淡定兼堅定，千萬不要被老闆的霸氣懾服，要扮晒專業，為佢好才講真說話，叫佢千祈唔好介懷，淨聽好說話就不用外聘顧問啦，被公司同事縱慣的老闆，通常這時會收晒火扮開明，死死地氣聽你支笛。至於最後一點，反而最少外聘公關做得到。大部份能食住大老闆的公關都會漸生氣燄，看不起in house那組夥伴，頤指氣使乃指定動作，尤其容易出現在agency的洋人領導身上，這些洋鬼子，根本至今看不起中國人。但Mary前述那位行家就大不同了，根本打個照面就知大家夠班否，她一旦看得出in house那位也是有料之人，往往能和對方成為親密戰友，大家看法分析相似，打個眼神就你一句我一句挾老闆上馬，有晒默契，呢啲咪叫識英雄重英雄囉。彭瑪莉
mailto:
[email protected]
來源:
http://hk.apple.nextmedia.com/financeestate/art/20160705/19681143
七級偽術：奧巴馬的社媒路
1 :
GS(14)@2016-07-12 08:14:08美國總統選戰如火如荼，意味着美國史上第一個黑人總統即將卸任。由2008到今天，轉眼八年，看着奧巴馬頭髮漸白，連毫不相干的Mary都有些不捨。是愛這位總統公關做得好，這些年來驚喜多、災難少，也許政績不怎麼樣，但形象卻越見正面，有意從政者好應該認真參考。別的不說，他對社交媒體的重視，在政圈絕對是前無古人。最近表態支持希拉莉，採用的平台也是facebook。不過別以為總統先生是忽然前衞趕潮流，事實是他八年前的競選運動，便一直被視為第一代社媒選戰。今天就話人人上facebook啫，八年前就識得以社媒作為競選工程重點之一，咪話這個總統無遠見！登上總統寶座後，他的社媒活動未停過，在facebook、Twitter、YouTube、Instagram上都非常活躍，目的正是從中凸顯奧巴馬政府夠透明、夠親民。他的digital團隊就梗係唔係一個「港產白宮發言人」咁簡單，佢個名叫Jason Goldman，2015年加盟白宮之前是Google、Twitter的高層，在白宮官至Chief Digital Officer，佢率領起碼20個digital communication高手，不停monitor住社媒討論，對當中熱話、網民看法瞭如指掌，然後謀定而動，把握適當時機讓總統參與發聲，一方面維持他的網絡形象，另方面亦進可攻退可守。社媒選戰可以好激，民主黨接班人希拉莉至今最廣為人知的tweet（單單一小時內就被retweet了13萬次）正是這「三」個字──Delete your account，她叫的不是別人，正是Donald Trump囉！彭瑪莉
mailto:
[email protected]
來源:
http://hk.apple.nextmedia.com/financeestate/art/20160712/19690567
七級偽術：freelance生存之道
1 :
GS(14)@2016-08-09 07:31:00上周提到做freelancer和做in house的不同，沒想到就收到做freelancer多年的老友回饋，他一說，又覺甚有道理，在此分享一下老友的實戰經驗。上次提醒做慣大公司的行家，一旦轉型單飛，要有心理準備，失去了千億品牌在背後，可能一切就不再那麼得心應手，傳媒行家若是愛莫能助，也不是不可理解。你公司夠規模，對香港經濟舉足輕重，邊個夠膽唔睬你，所謂不看僧面也要看佛面，但情況逆轉後，就不能不看開點，像老友說的，單飛後仍要繼續做傳媒眼中香餑餑，唔係冇可能，接番幾個大品牌做客囉，有隻王牌在手，始終好過點。嗯，講來講去，最好莫過於在原公司廣結人緣，未離職就打通天地線，能接番舊公司嘅job，咪可以順利過渡囉。哈，睇你仲夠唔夠膽日日喺辦公室黑面。至於單飛freelancer資源網絡同大公司冇得比，這一點，老友話又不用太擔心，freelancer自有自己的圈子，守望相助的日子不會少，有大job食唔晒，或者自己expertise不完全滿足客戶需要，可以同其他人孖住上，情況非常普遍，唯一唔好處就係要同人分金，不過，家家有求啫。哈哈哈，最後一點，Mary一聽就大笑起來。老友話做freelance責任在於賣橋，橋賣了給in house公關，功就要留番人哋領喇，如你識做，長做長有，指日可待，你唔醒水在人家老細面前認叻認唔切，老友話，隨時死無全屍呀。地球危險，現實殘酷，呢個世界，從來如此。彭瑪莉
mailto:
[email protected]
來源:
http://hk.apple.nextmedia.com/financeestate/art/20160809/19728161
七級偽術：越爛囗越聰明？
1 :
GS(14)@2016-08-16 06:24:24網絡上常有許多所謂心理分析、心理測驗，Mary絕少轉發，除了這段，看了標題已心中暗喜，佢話……聰明人傾向有點凌亂、睡得少，同埋爛口啲！嘩，中晒喎，怎按捺得住不讚下去。少睡點、聰明點這說法，許多科學研究都有類似結論，這就是坊間所謂的少睡精英吧，如奧巴馬、達爾文、邱吉爾……都是出名的夜鬼，應該可信性頗高。說枱面凌亂有機會等於IQ高一樣有科學數據支持，明尼蘇達大學有研究話，如果你較少把時間花在執枱收納上，好明顯滿腦子已被更重要的大事充斥，我想更明顯的係你在prioritizing上，懂得取捨囉。也有心理學家支持說，凌亂環境會刺激創意思維，出嚟啲橋都突破啲咁話喎。至於粗口一說，嘻，以前人說爛口等於vocab弱，但新說法是你成日避開說粗言穢語，本身已傾向自我鉗制vocab運用啦，聽落又有道理，咁唔open嘅人，醒極有限啦，而且能把粗口俚語、詩詞歌賦交替運用，例如毓民，誰說不是語言天才。
又講番關公界吖，有人列出清單，話符合以下條件者，甚有公關潛質：（1）你酷愛博弈遊戲，因為你喜歡贏的感覺（2）你不止愛飲咖啡，而且次次加shot（3）你是愛迪生個friend，因為晚晚挑燈夜讀（4）戲院坐你後面那人會好憎你，因你不能忍受超過15分鐘唔check mail同message（5）你越來越唔會嘆報紙和電視，因為每次你都發現自己邊看邊在諗緊可以如何和公司和客仔的宣傳扯上關係其實仲有一兩點，不過你都估到啦，遊戲文章啫，不必認真。彭瑪莉
mailto:
[email protected]
來源:
http://hk.apple.nextmedia.com/financeestate/art/20160816/19737630
七級偽術：有些債 始終要還
1 :
GS(14)@2016-09-06 22:44:16有品太緊要，不管你屬哪行哪業。關公或許人微言輕，未必一定有牙力改變管理層每個決定，但無計啦，惟有盡做，就幻想自己是古代的諫官，勸喻主上回歸正道是本份，起碼曾經勇敢說出意見，算是對得住自己，人家接受與否，真的控制不了。但願行家都有這種心性和品格，會得向老闆分析不行正道的壞處，起碼你得讓他知道，不認不認還須認，你騙得一時，未必能騙得一世，天網恢恢，有些債，始終要還。所謂公關，唔通專幫你包裝殺人放火那些惡行咩。又想起里約奧運之後，因一時貪口爽由英雄貶至狗熊的美國泳手洛捷迪。本來捧了個金牌回祖家，即使同菲比斯冇得比，也總不缺國家和贊助商的獎勵，點知呢位阿哥飲醉酒闖了禍，仲要作古仔屈巴西人打劫他，結果巴西警方大發神威，火速破案，證實洛捷迪一派胡言，金牌選手無癮回國。你問我，外交事件來的，巴西不予追究，算佢好彩了。不過，做人無品總要付出代價。回國之後，此君的贊助和代言合約一個一個被終止，最先劃清界線的是Speedo，聲明講得非常清楚，Speedo無法接受名下代言人做出與品牌價值觀南轅北轍的行為。品牌還因此把原本畀洛捷迪的5萬美元獎金捐咗去Save the Children Fund。放棄洛先生的品牌仲陸續有來，Ralph Lauren、Airweave等都引刀成一快。無品，點會得人心？贊助商如是，顧客亦然，必要時候，亦會忍痛割愛。要是你的品牌或公司講一套做一套，被人離棄亦自作自受也。彭瑪莉
mailto:
[email protected]
來源:
http://hk.apple.nextmedia.com/financeestate/art/20160906/19761118
七級偽術：跪玻璃好過搵公關
1 :
GS(14)@2016-09-13 08:00:47上周談到美國奧運泳手洛捷迪（Ryan Lochte），因一時貪口爽，老作里約遇劫記，回國後由萬民景仰的金牌英雄，變成落水狗。最新統計，他事後損失逾100萬美元的廣告合約。咁闖咗個咁大嘅關公災難，唔見咁多真金白銀，洛捷迪都識驚嘅，所以佢用咗更多真金白銀去請咗雷霆救星Matthew Hiltzik幫佢拆彈，呢位Matthew來頭唔細，曳曳歌星Justine Bieber、大明星Alec Baldwin、美國總統候選人希拉莉佢都serve過，不過我估咁嘅大名，肯定唔會幫你慳荷包。而他為洛捷迪安排的形象重建工程，當然包括現身重量級電視節目剖白，例如鼎鼎大名的GMA（Good Morning America）之類。不過如你問我，Matthew Hiltzik幫他度身訂做的Line to Take似乎太過傳統兼保守，係有認錯，但只係認到「對唔住，我誇大了！」就真的難以服眾。其實都已經擺到明係講完大話被篤爆，點解仍唔直接認衰仔呢？想到洛捷迪可能要支付的巨額公關顧問費，Mary不禁想起我們可愛的黎明。真的，在社交媒體令所有持份者一體化、令所有回應要即時化的今天，其實還何須花時間做企劃，或者也不再需要星級公關靠人脈關係幫你上電視。因為，關鍵不是上哪個節目，是你肯不肯跪玻璃，只要你肯真誠認錯，肯負上責任，學黎生拍段片放上facebook，甚至fb live一次認錯，一樣可以街坊價贏得掌聲。下次闖禍，諗得過㗎！彭瑪莉
mailto:
[email protected]
來源:
http://hk.apple.nextmedia.com/financeestate/art/20160913/19768733
七級偽術：有種成功叫慘勝
1 :
GS(14)@2016-09-27 08:01:08鍾意又好，唔鍾意又好，橫洲記者會，做老闆那位實在是罕有地險勝一場，成了小贏家。你看得出人家是擺明有點胸有成竹的，每次財爺發言，都見他隱現笑意，躊躇滿志。無計喎，誰叫財爺一時沉不住氣，公然和老闆「開拖」，給人影響管治班子團結形象（如果曾有的話）的口實，個人品牌再「正」，都難免要應付傳媒不懷好意的提問，今次捱打基本上可以預期。有人胸有成竹大概是認為今鋪準備充足，深信劇本寫得滴水不漏，而且早已為自己搵定至佳角色定位，對號入座，史無前例地把責任扛上身，斬釘截鐵承認決定是他做的，作為行政長官和特區最高負責人，做決定是應有的擔當。嘩，嗰種態度，man到呢！這還不止，記招尾聲起身離席前，居然還來一段真摯陳情，哽咽吐出一句「粒粒皆辛苦」。唔，那哽咽位，的確比他上手那位曾先生自然入戲得多，算係交到戲，從未見過感性CY的港九各界，難免有兩秒的錯愕與「滾動」。至於財爺，始終真性情一點，全程尷尬加黑面，完場時張炳良拍拍佢膊頭，安慰之意甚濃。事後有熟悉政情的朋友分析，話某君呢兩個得分位原來都是「爆肚」的，事前並無知會大家有關安排，算是殺了席上同袍一個措手不及。如果屬實，某君今回真是超有計，找來多位超級茄厘啡群星拱照。即係解畫事少，做show事大，為達目的，過手下一棟又何妨。但問題是，如果明知有擔當、肯認錯方是特首應有行為，何必剛愎自用到今天。民間積怨已經深到咁，慘勝一仗又如何，你知道，有種victory叫pyrrhic！彭瑪莉
mailto:
[email protected]
來源:
http://hk.apple.nextmedia.com/financeestate/art/20160927/19782582
七級偽術：社媒好玩唔好做
1 :
GS(14)@2016-10-11 08:10:49看了一篇有趣文章，作者為社媒和數碼推廣大員，彼說當今之世，尤其millennial朋友仔，秒秒手機不離手、所思所行同Instagram和facebook分享多過同朋友傾，不少更以為因為投入數碼生活，便視社媒推廣為事業發展的目標。大家也許身邊都有不少有這種想法的年輕人，但真的日日活在社交媒體的虛擬世界，就可保證你仕途暢通嗎？呢位師兄就梗係話唔好咁天真，因為自己keep住connect社媒，同確保客戶產品專業有效、無誤地engage住顧客是兩碼子事。首先，千祈唔好以為做digital marketing就等如只搞創作，也許後生仔個個自覺創作能力高似林日曦，只要機會來臨冇理由唔爆紅，不過如果還在靜候機會那些，不妨先扎實地學一點基本巿場分析學，真正的社媒高手，一定兼備數據分析和創意，analytics、metrics唔識番多少，好難做得出好campaign。其實一般人上facebook掃幾掃，不外乎係想睇下中學同學reunion大合照、細佬個女又有乜搞笑video、網上又有些甚麼火熱話題在洗版之類，冇乜目的，更無壓力。若你一旦入了行，社媒對你來說，意義完全不一樣，一邊掃，你會一邊諗：死喇，點解人哋條post、engagement rate會高過我噚天嗰條咁多嘅，是輸內容定輸timing呢？唔得，返去要同條team分析吓，話唔定係輸張圖，下次要點先幫到個客呢……看，一掃一驚心，問你仲要唔要入行！彭瑪莉
mailto:
[email protected]
來源:
http://hk.apple.nextmedia.com/financeestate/art/20161011/19797132
七級偽術：如果我係乜乜乜
1 :
GS(14)@2016-11-08 05:40:16執筆之時，「佔西」仍然持續，雙方在德輔道西對峙，形勢有點緊張，劍拔弩張，敵未動我未動，似乎人人都在等待「出事」一刻。此刻除了八卦市民如Mary雙眼緊盯電視外，相信好多行家都做緊同一個動作，不過就唔似Mary純八卦，可能已經開緊工，同管理層開緊會、通訊中，或已按危機處理指引，啟動有關程序。
Mary當然不單指警方或各大政府部門的新聞官，以至我們那位白宮發言人，對他們來說，無論主子人是否在港，都必然在努力收料匯報，幫老細度緊回應口徑。開工的，除了他們還有誰？唔，如果我是各政黨負責人，此刻當然密切留意事態發展，金晴火眼睇住差人示威者，邊個着邊個唔着，先決定明天條line如何落墨，幫哪一邊，幫又幫幾盡。如果我係各大公共交通機構的行家，此際當然同營運團隊溝通緊，做定晒群眾散或不散，幾點散的安排和相關宣佈，明早開工日，如果佔西持續，人哋點返工是大事。如果我是各大學校長和公關組，這時應如熱鍋螞蟻，到底示威者中尤其最前線最勇武那些，有冇自己學生和講師呢？如果真有學生教職員被人拉咗，記者查詢應如何回應呢？點講先唔得罪學生又不會被示作縱容學生呢？仲有，網上指某些學生會開放地方支援示威者，真定假呢？如果我係一眾傳媒之友，由中國問題專家到政治評論員、各科學者，以至玄學家，可能都要諗定記者問到講乜好兼出到位，係囉，其實從玄學角度，丙申流年係咪會流血告終先。彭瑪莉
mailto:
[email protected]
來源:
http://hk.apple.nextmedia.com/financeestate/art/20161108/19825819
七級偽術：New Balance又被特朗普累？
1 :
GS(14)@2016-11-29 07:51:52生意人對政治要敬而遠之是常識吧。更何況是言論出位的特朗普，都話佢惹火啦，黐埋去都冇乜着數，大小品牌，各路英雄，聽見佢大名都掉頭走。之前講過芝加哥外賣速遞公司Grubhub，因老細在給員工的信大踩特朗普惹來關公災難，剛剛又聽聞原來大家熟悉的New Balance（NB）也因為特朗普闖了一禍，係有少少無辜，但都係嗰句，唔出聲冇人話你啞嘅。話說該公司關公大員Matt LeBretton接受彭博訪問時，爆了句：「我哋覺得特朗普領導下，我們會行啱條路。」本來LeBretton係指特朗普的反TTP立場，對NB這類生產線留在美國的公司有利，不過，好多人唔係咁睇，係要解讀為NB全面支持特朗普路線，於是網絡上反NB之風，立即吹起，美國網民紛紛上載把NB鞋丟落垃圾桶、火燒NB鞋一類相。這還不止，最慘是有極右、甚至新納粹主義者大抽其水，立即把NB捧為「白人的波鞋」，鼓勵同路人轉着NB。唉，如此火上加油，想風暴稍息都難。這邊廂NB出聲明話自己如何values-driven，公司文化以人道、誠信、社群和互相尊重為本，那邊廂繼續成為撐「特」和反「特」，以至極右博客混戰的風眼。公關專家當然又來事後孔明，話企業不宜支持個別參選人的政策，尤其像特朗普這類爭議人物，否則就如玩火。NB事件應為企業搞響警號，是時候檢討一下發言人政策和培訓。係㗎，以今天網絡反應之快，星星之火，足以燎原呀。彭瑪莉
mailto:
[email protected]
來源:
http://hk.apple.nextmedia.com/financeestate/art/20161129/19848659
Next Page