諗返轉頭,當初爭成廿萬card數有個好處,就係畢左業即刻迫自己去搵工,要儲齊三個月糧單去辛苦私人貸款,先還左成30厘既卡數佢。私人貸款一般都係6-7厘,最長可以分5年還。不過得朋友介紹,我去左xx銀行既最大月薪倍數私人貸款,仲可以分7年還! Wao,因為我爭成廿萬,第一份工做返電腦根本冇可能借到咁多。所以我走去百老x做sales,有autopay出糧之餘只要肯博一個月可賺成近兩萬蚊。我搵兩萬蚊，加上本身未係出現借過錢，銀行借盡月薪十倍可以cap到近廿萬，搞左成半年，終於「撲到水」平左條卡數，唔使個個月白供五千冇還本。而家每個月都係四千幾，不過供七年可以還哂! 雖然要七年，不過我有錢可以比些少penalty提早全清。整理好卡數，真係放下心頭大石!
有副學士學位唔難搵工，不過比你搵到既都係「陰工」。一係就工時長、一係就極厭惡。有一日，小學同學無啦啦打比我話:「伯拾后! 係我呀! 呢排攪咩呀!」我當然知道小學同學無啦啦打黎，通常都係約你傾「生意大計」，唔係傳銷就係保險。Ok還掂有時間，我出左去做野成半年，知道識多個人開多條路，後生仔唔好咁怕醜，「醜」寧願係後生個陣做。出到去，AIA卡片一張，問我儲唔儲錢?
我同佢講，錢我真係好想儲，不過我爭銀行成廿萬，我諗我個case係由負數儲起。我一招就ko左佢，心諗:「sell我伯拾后!? 冇咁易」。未幾，佢有個肥佬老細坐埋黎，問我做咩唔讀書? 呢野我真係比佢打窒左，最難推卻既sales就係咩都唔sell你既sales。肥佬只係同我講下我唔讀書有咩問題，又問我有咩方法攪掂條數佢。佢真係hit中我，其實對我而言，講咩都無謂，清左條私人貸款「贖番身」最緊要。佢老細叫Vincent，個頭jel得勁「行」，總之就係賭神頭啦!
賭神話佢想請個靚仔賣雜險，咩係「雜險」呢? 原本保險有兩類，一係就有儲蓄成份即係阿媽幫我供落供教育基金咁，供幾年或十幾年既叫人壽。另一類有車保，旅遊保、家居保呢d「比一次清一次」既，大致歸為雜保(雜險)。我初時都係明到呢個地步，到我開始跟肥佬搵食，先真正明「咩保打咩保」!下集我開始startup我的事業了，務必留意!
我轉左行做保險公司份工，就好似肥佬老闆跟班咁，同佢出去見客之後將簽好文件送比核保辦理。有時肥佬會用家居保及旅遊保同新客打開話題，傾下車保更可了解客戶財政狀況，原來想快手了解面前客人，都有咁多學問。先講一D佢感興趣既話題，再搵出自己可以係邊方面幫到佢，從而令客戶知道同你做朋友係有好處既。肥佬心情好時都會教下我野，我明白老板教我野唔係必然，因學到既野只屬於係自己，第時辭左工都可帶走的。把握機會從工作中學習，係令我事業轉好，人工增加而買到樓既重要元素。
保險公司既經理除左sell單，請人拓寬「下線」係重要工作之一。請一個新人，仲好過佢自己出去跑數。Well，肥佬自己好懶，平均一日都見唔夠兩個客。但係佢叻在識搵人幫佢跑，招募下屬。佢鐘意搵銀行做開既人加入，一黎佢地識賣保險，二黎銀行呢幾年同員工「不斷加壓」，搵人由銀行出走到保險公司，唔係易事。
是的! 又係michelle。肥老闆不時係bank收卡片，及後跟進約銀行sales出黎飲野。今次搵埋我一齊見旨在showoff佢有幾掂。Michelle係一個二十有幾既斯文長髮少女，眼細細而勝在皮膚夠白淨。個日我地係佢分行附近既starbuck見佢，成下晝四點michelle趕到黎，放低袋就二話不說走去買三文治食，坐低吞左啖水後先一路啃野一路同我地講佢未食晏。肥佬一貫作風，問多過講，問下佢好咩搞成咁。Michelle話佢已經「N5」，即係nil for 5 days，連續五日冇數交!! 因為5日交唔到數好大鑊! 今日上晝七點幾已經要同分行經理去面聖(見大老闆)，最慘既係尋晚call客call到九點幾先返到屋企，訓得幾個鐘又要返工。真係就黎神經失常!
最慘係剛入行既新仔，為左一萬幾千既人工捱到咁盡，當然做幾個月之後就失蹤。所以你見而家成日請新人，成日銀行職員做錯野，成日換客戶經理。」Michelle話:「我做左銀行幾年，唔上唔落，轉行又要重頭黎過，咪仲要係度捱。」一路講一路食埋最後啖包。
佢話最傷既係今朝面完聖，同成班sales加埋分經(分行經理)開會。經理摔數問Michelle呢個禮拜有信心「做幾多」? 佢低頭唔答，之後細細聲答左十萬。經理就話:「十萬?你唔使旨意! 三十萬啦!」唉咁講不如唔好問，一味被人逼佢跑數。」
肥佬話呢份工冇人逼佢做。Michelle話當然可以辭職。不過佢經驗為求佢遞信後仍然專心跑數，一家會威脅佢如果唔到數會寫花佢走人時攞封reference letter，等佢係第間bank應徵時過唔到reference check，等於踢佢出銀行界。 Michelle眼濕濕咁話: 「我到數又使鬼遞信咩…而家 真係唔上唔落。唉，拖都唔使拍，而家分行唔到數，星期日要攪埋「理財日」。老細不斷問有冇人做volunteer，我都唔知咩q野人，仲可以笑笑口係whatsapp like呢件事之後舉手要星期日返工!」
肥佬就同佢講:「鬼咩，而家係香港銀行，客戶經理要一腳踢銷售基金、保險、外幣、股票掛勾產品加埋按揭。我都知而家有人行入分行，櫃面職員已經對人虎視眈眈! 因為佢一日無番兩個銷售推介比sales，「放飯」都未有資格。客戶經理sell唔到你野又要向分行高層交代! 既然你做到咁無癮，不如過黎幫我手啦!」
欲知後事如何，請看下回分解。
上回講到銀行sales Michelle約見肥佬同我飲野。一輪做銀行之苦水後肥佬先同意michelle講既苦況，再出一招「口是心非」，想招michelle入行做保險既佢竟然同michelle講「做銀行唔錯」!
肥佬:「我知道金管局都有留意銀行摔數既情況，及作出萬一市況下行需要面對事情的預備。市況大跌必會引致極多投訴，尤其當老人家知自己係銀行存既錢冇左，肯定搵埋仔女黎嘈。我係金管局入面有朋友，知道由2013年起，銀行會嚴密監管有冇上層迫下尋跑數既情況，同埋下屬有冇夾硬比一d客人唔想要既產品。」再講:「係咁既情況下，我認為銀行陽奉陰違既作為依然會有，始終賣產品有咁多錢賺，冇理由唔做。」
「不過佢地會包裝得靚d囉，估佢地5年後，即係2013年，又會話咩更新銷售程序，提供更貼身服務比客戶，又咩更專業理財咁咁…講到底，咪又係想加長銷售程序，錄哂音咁唔比個客係市況下行反口，但所用多左既時間，即成本，咪一方面食個客水深d搵返，另一方面搾壓個同事攞返。」肥佬叫michelle放心，再做銀行只會sell少左野更輕鬆，恭喜哂佢，不過paper work同客人錄音方面做多左。
肥佬呢招以退為進果然有效!!
Michelle話:「sell少左野!!! 咪冇錢分比員工!?」
肥佬即刻一副不以為然既樣話:「咁就一定架啦。」
Michelle講:「我sell野就係為左想賺錢，而家冇錢分仲做黎做咩?」唉，又一個無知少女中左肥佬奸計。
Michelle成為我同事後，由於我迷上佢細細既眼，成日借機問下佢野。就算關係未能「更進一步」，我都學到唔少人壽保險既知識。人壽同我撈開既雜險係不同的，最大不同在於雜險一般冇儲蓄成份，鍾意幾時cut就幾時。保障範圍好生活化，例如家居保我都係入行先知唔保滲水的，要爆水喉仲要意外先保。旅遊保亦因太多人去完旅行後走去報失手提電腦，而致條文有所修改，唔保手提電話、電腦。不過及後發生埃及撞車事件，我先知原來旅遊保係幾咁有用。都係一百幾十蚊。
咁唔好彩係外國遇到意外，你可能要負上外地高昂既醫療費用。醫得掂還好，最慘你要送返香港再醫，你訓係度坐飛機吊住鹽水入境係好貴的! 旅遊保可以比你claim返，你返到香港，仲可以有幾十日「被包」既醫療保障，我可以咁講，旅遊保係一陪一千既保險，賠得仲快過你係澳門等圍骰! 更是保險公司想「比個好印象」你既常用方法。
「係保險公司做左成年有多，我想係自己事業上有所突破，下章抓緊機遇，全力出擊!
昨日在臉書上貼上了2020年港鐵發展的構想圖，
先講有咩新站，可能開始站太多致大家未必為意。
中環南: 選址未確定，最新意向係現動植物公園，作為第時南北線的終站
黃埔站: 選址已定，大概在黃埔花園一期的馬會附近，2014-
堅尼地城: 選址已定，在現嘉輝花園旁邊，作為港島線的始站
古洞站: 是新建北環線其中一站，
何文田至啟德: 為沙中線其中四站，其中以土瓜灣站選址最具爭議。
其實除左留意新站外，路線之改動亦需留意，
未來將會以東西線同南北線做概念。
南北線可以由羅湖直通中環，以後去海洋公園十分方便。
一個不可不提係北環線，係政府咨詢中佢成事係最高既，
另外有讀者問荃灣屯門鐵路會否成事，諗樣認為不會。要等屯門往西走之人流就到飽和點先有可能成事。
最尾一個有點浮跨，
將現居轉按就要放棄hibor plan，真係令人唔捨得。如果你唔係要再用九成上會買三房，真係會因現居咁大cushion位而大膽試下租比人。不過你按出去而家都係比2.15%年息，以現時借貸額都係每月比多千餘蚊息。而最大原因莫過於你要再九成上會買三房，如果唔將現居申報投資用途，咁你係買三房時就要申報你有兩間自住樓。其實一對夫婦有兩間自住係可以的。做二間自住七成上會銀行一般都會接受(第三間自己就唔可以)。但係要做九成就難講，答案會因金管對按揭之鬆緊而變動，如有人知動態請說明。
現時如你持有一個或以上未完成償還按揭的物業，供款與入息比率上限由現時的五成，下調至四成。即我地成日會用開既負擔比率要用40%計先得。另外物業超過600萬不能用按揭證券公司做二按(即上九成)，及買入單位超過700萬只借貸一半。種種措施你要留意。
再講點計budget，如買入550萬物業做九成上會，即借5.0mil。用現息率每還一萬可借2.65mil計算，你約每月要還$18800供款。緊記此數係預你分30年還，45歲人仕或樓齡超過25年要每月預還多些少。你地將現自住單位按揭加埋新買三房一齊還，每月$18800+6000~$24800，剛好符合供款與入息比率四成上限之要求，換言之已盡用彈藥。
睇開諗樣網都知筆者唔贊成咁做，就當你有$12000蚊租收都唔想你去得太盡，第時有寶都執唔到。如果居屋你接受到，何不搵些舊些少而在市區邊陲之三房? 有幾個屋苑筆者到過，亦是可以的。
| 建築呎數 | 最近成交(萬) | |
| 九龍灣麗晶花園 | 623 (*居屋, 30年樓) | 408 |
| 青衣美景花園(只限少數座的D/E室) | 699 | 380 |
| 荃灣荃景花園 | 615呎(新鴻基樓) | 378 |
| 元朗蝶翠峰 | 799 | 450 |
| 荃灣樂悠居 | 753呎(傳說之窮人思物) | 420 |
| 黃大仙啟德花園 | 756呎 *居屋 | 430 |
如果可以住村屋，可留意下大圍附近，要駁程車先到港鐵站。至於上示如荃景花園，更是月內由筆者朋友買入的! 當然你見到以上例子有不同弊處，但慳返一百萬可令你輕鬆一點。
係決定賣出定係放租之前，最緊要睇下繼續keep層樓會唔會影響你跌市再買樓既能力(或稱子彈)。讀者月入三萬，假設佢男友一樣都係搵三萬蚊個月，即家庭收入六萬。佢地新買4.0mil上會借七成，假設分25年還每月要月供12000蚊。其實佢地月入六萬即放每月三萬蚊係供樓銀行都批到(暫不理金管最近係買二間樓收緊借貸比率至四成入息)，而三萬蚊月供借盡應可達2.65mil(借設2.15%年息，分30年還)，咁即金額為2.65mil*3=7.95mil。
係借盡7.95mil，而現時手頭兩件貨合共4.0mil+2.4mil=6.4mil，已達借盡八成，跌市一跌會令讀者坐貨，沒再買樓機會。除非男友收入不只三萬，如達6.0萬元或以上，咁現時所耗借貸能力會降至一半，係跌市時會多一個入貨機會。
當然讀者會諗而家舊樓租出去成萬蚊，供按揭只五千，收完租還埋按揭仲有成四千蚊補貼我而家要供成12000蚊既新樓。建議讀者可以咁諗: 現時舊樓收番黎既租還按揭可清本金約$3000，淨低$4000就可自用，即舊樓減去利息支出係有$7000一個月落袋。如果佢睇呢兩年樓市係升或打和，佢至少賺$7000*24=$168,000落袋，但係如果間樓跌一成，其實佢呢十幾萬即刻化為烏有。
故建議舊樓賺左先，除非男友用入可穩達五萬水平，為家庭提供較強現金流，否則放棄hold住舊樓賺多幾十萬既可能，而釋放借貸力去博下一轉樓市跌「玩鋪勁」既更為上算。最後一個問題係要唔要降低貸款額至五成，其實唔降租出去係偷雞，不少人都咁做，比銀行發現就可以會即時加息，或眼白白姑息你。但降低有一個好處，係可名正言順用張租張當入息證明係下次借錢當入息證明。如真的決定保留舊居，都係keep住多個現金唔補錢好。
答:
租客好唔好要靠你自己眼力同埋agent有冇心介紹。第一步係物色投資物業，而係出街睇樓前，梗係要知道自己可以借多少啦! 以喜喜呢個case，佢可以用自住物業套樓價七成出黎，即係2.80mil*70%-1.00mil = 0.96mil，當然假設係你間樓估價要足二百八十萬啦! 但先唔好套咁盡，先套0.5mil，加埋0.4mil手上總現金有0.90mil。而樓按就變左月供$5600。基於現行香港投資物業只可做五成按揭關係，就咁睇如得cash 0.9mil只可買1.8mil或以下既樓。
至於有人問唔報澳門有按揭還緊得唔得。第一緊係唔好比佢見到月結單扣錢條數，應該可以!! 同埋外來人黎香港買樓收入最多只計核實到既八成(80%)，再加上今次只建議喜喜借五成上會，應該可將外來人過大海黎香港買樓風險因素降低。
「由上而下」遠比「由下而上」適合
聽過星火燎原，同意租金同按揭利率所得出的淨差距係決定間樓抵唔抵買既重要因素。投資股票有「由上而下」及「由下而上」兩個決定投資項目(選股)既方法。至於投資樓市本樣認為「由上而下」遠比「由下而上」適合。因為屋只係一間屋，佢唔似一間公司咁會有產能提升同改善業績既能力，房屋租金向上亦只係大環境推使，所以解答喜喜問題，同大家考慮買樓前一樣，用「由上而下」approach解答，即調轉由問題三答到一。
等定係買? 再談樓市必勝投資法
由於近排新加入超筍樓盤fans增多，本篇再談樓市必勝投資法。首先要計既係手上有幾多子彈，而子彈用家庭借貸力(credibility)量度。用好市時銀行願意給予買家既最大借貸額為本，於樓市熾熱時只用最大借貸額既一半，跌市時用夠七至八成。如此便可在旺市保持借貸力，亦即購買力。係跌市時用剩餘借貸力入貨，但買到既樓比旺市時可大一倍。喜喜條數係咁計: 總購買力 = $(20,000 + 25,000) * 80% / 2 = $18000。建議係現時旺市只用總購買力一半去買樓，現時第一間樓套現後要還$5600，喜喜下一間樓最好供$18000/2 – 5600 = $3400，咁就維持總供款不超過總購買力一半。
平常你係知自己要借幾錢，再去計每月要還幾多。我地係倒轉計，要還$3400一個月，分到最長三十年(而家唔講四十年住!)，可以借到幾多呢? 係現行息率約2.15%下大約可借90萬。就咁喜喜可以攞住手上90萬cash做首期，問銀行借多90萬，買多間1.80mil既樓。
假設樓市升50%
買呢個銀碼既樓有個好處，你唔使點揀。因為冇得揀，可以直接入大埔睇翠屏花園。如此喜喜便淨低月供九千蚊既借貸力，假設港澳樓市同升五成，新買翠屏賺0.9mil，澳門樓又賺1.4mil，合共2.3mil。好易明!
假設樓市跌50%
如果開跌，喜喜翠屏有租收冇問題，澳門間樓應該介乎負與唔負資產之間。但係喜喜今次可以用淨餘九千借貸力借2.65mil*90%(因為每一萬元借貸力分三十年還可借2.65mil，當然假設利息不變，如有變要下調購入樓宇金額)。到時咩樓都平哂冇人同你爭，理先生可「施施然」用2.65mil*90%=2.30mil買多間樓，相信到時夠買間西九昇悅居兩房。到時有三間樓係手，如幾年過後原本跌左五成既樓市又升番一倍，即返回開始時水平，澳門樓同翠屏平手，沽出昇悅居賺一倍即2.3mil! 所以升同跌都會賺到2.3mil!
當然你又會同諗樣講如果跌完五成再五成，喜喜會輸斷氣。咁諗樣都知大亞灣核爆香港連條草都生唔到既機會都有，可行與否足下自判。投資永遠先問自己可承受幾多風險，同埋自己願意承受幾多風險。係講必勝法期間已答了問題一至三。而點解知道必勝法而仲未發達既人，係嚴守紀律方面有問題。
仲有就係，如果唔升唔跌開圍骰，喜喜都贏。
應該選擇那個價位的樓?
諗樣都係番之前用過既forumla，就係現時旺市只宜用總購買力既一半去買樓。就算樓市下滑都仲有資金係手加碼(或防守)。你同女友人工總數$47,000，按照金管比銀行指引，最多借月供$47000*50%~=$23,000既樓按比你，計番轉頭如果你用三十年按揭，2.15%年息借盡樓係6.09mil。而旺市load一半貨既建議，即係你應買3.00mil左右既樓。
聚唔到人而樓價升幅多跑輸
係三百萬budget之下，原本係兩年前可買大兩房，而家只可買細兩房或更細更舊既樓，但建議你都係上左車先，因為你估佢唔到幾時跌，再加上你家庭總收入未必低到政府會幫你既類別。相信你都睇緊樓，你提出既選項以你屋企附近為先，可惜西九樓價數埋都七千，如果要維持原區生活，希望方便探下父母，最為適合有美居中心，廿幾年樓可惜只提供三百幾呎單位為主，唔知你鐘唔鐘意，而索價竟要六千幾蚊呎先最離奇。講返深水涉區，由於樓宇集中舊樓，換樓客失去上流階梯而多搬出該區，所以聚唔到人而樓價升幅多跑輸。你亦都係其中一個改善了自己人工而未必留返係深水涉住既人，其他market player亦都一樣會咁諗。
三百萬樓下、不太殘舊而交通尚方便的，有幾個地區可以諗。首先係馬鞍山，有直接巴士去北角，搵日自己同女友去行下，已經唔係舊時你去烏溪沙YMCA宿營個樣。返大陸可以極快到大學站北上，出九龍好多巴士線可以選擇。新港城十八年樓仲有極多三百萬出頭既樓房考慮。第一間樓真係唔好買太貴，買四百萬樓都要交成七萬幾印花稅。如果你唔係根本係樓市賺過錢而樓換樓，用呢七萬蚊買個印真係好肉痛，直情係一條毛都買唔到。
如果決意死守九龍，咁就跟大隊去淘大，所以個度呢排越升越有。但當注意力集中在附近供應不斷增加，小心黎個反高潮。荃灣區供應多而交通方便，係另一個搵三百萬樓既選擇。你個budget如果買海濱花園仲勉強買到三房，第時唔駛煩換樓。爵悅庭附近「工廠三寶」仲有些少三百貨，細心搵下應該買到十年樓齡既上車盤。你提及愉景新城在間隔與呎價關係需要再思考，倒不如駁程車買附近舊些少荃景花園或麗城花園仲好過。相反荃灣地鐵站一帶已漸高水，廿幾三十年既兩房都要至少三百萬先有交易。
筲箕灣舊樓有三百萬選擇，但係以單幢主打，可以考慮。港島一頭一尾都會搵到合你budget既盤。你女方父母住係筲箕灣，如考慮生小朋友不如就落地該處，方面照應。該區新淨而又合你價錢既大型屋苑不多，如有網友知道可提供一下。
由於樓價較貴，如果借九成按揭分三十年還要先支付按揭保費十幾萬，可以問銀行加借但係都要比。建議買二百幾萬既樓分短D如十五年還可令按揭保費可大減。至於點解都要做九成上會，因為結婚裝修買電器少不免用錢，上述三項四十萬埋單「冇走雞」。你必定好燒一大筆錢，謹此祝賀你娶得美人歸!
偉哥:
是的! 大部份人買股票都係輸錢為主。要獨有慧眼加上高心理質素先可在股海淘金。根據諗樣之前「身無分文，必須賭博」既道理，如果你必須在短時間搵舊大錢，放在股票或期指市場博一博是必須的! 否則以偉哥既portfolio，就好似三國故事中荀攸進言曹操一樣，曹操勢大人多，只要堅守及囤糧，假以時日，只會比吳蜀日益強大，同佢地距離只會越遠。所以偉哥只要做好工作，將錢放係有意義既地方，要上岸不難，當然要做老闆或成大富，又要一番拚博。
股票或基金每月平均投資法差唔多大家都聽過，但係樓宇平均買入呢? 相信冇咩人提及。其一當然係香港多買賣完整業權既物業，二黎樓根本冇得拆開黎買。施老闆成立中原領先指數本可衍生更多樓房買賣工具(如散買)，但樓宇買賣透明度不高令指數認受性被質疑。偉哥要平均咁買樓房，實在要手頭有番咁上下實力先掂。
沙士升到而家既威力
細心睇偉哥問題就知廿倍回報點黎。一間係沙士值1.1mil既樓而家升到3.0mil。如果你當時用十萬本金做九成上會，你而家賬面賺二百萬，真係好和味。所以投資最緊要睇時機，但係時機確實冇人肯定捕捉到，不如keep住投資係樓市，升同跌都有租收。
大陸公幹人仕股票不宜
其實樓絕不是唯一投資選擇，金、股、匯(外幣)皆可。但諗樣觀乎一眾至少星期一至五都係大陸工作既人，由於接收資料始終冇香港咁頻密，生活習慣令佢地trade港股都係輸錢收場。試下諗樣既方法幫唔幫到手。
外國確實有公司成立投資項目(通常係爛地做起)，做到真係買一呎樓都得! 香港未有此工具。以下假設每年用二百萬買入屯門市廣場，買入呎數就係用當年年尾呎價去計(2012年除外)
| 年份 | 屯門市廣場呎價$ | 買入呎數 |
| 1997 | 5000 | 400 |
| 1998 | 4600 | 434 |
| 1999 | 3400 | 588 |
| 2000 | 3200 | 625 |
| 2001 | 2700 | 740 |
| 2002 | 2500 | 800 |
| 2003 | 2200 | 909 |
| 2004 | 2500 | 800 |
| 2005 | 3000 | 666 |
| 2006 | 3200 | 625 |
| 2007 | 3200 | 625 |
| 2008 | 3900 | 512 |
| 2009 | 3500 | 571 |
| 2010 | 3900 | 512 |
| 2011 | 5500 | 363 |
| 2012 | 6200 | 322 |
| 總買入呎數:9492 | ||
| 十六年平均價:$3656 | 買入平均呎價:$3371 |
如果用平均成本法買樓，十六年總投入36million，現值58million，增長83%。當然咁使係香港冇可能。但係證明左樓此一投資物，用平均成本法配合一樣奏效。當然你會諗三千六百萬我成世都冇，睇呢篇野做咩? 但用此一原則，套落偉哥個case又如何呢??
偉哥年收入RMB12*(8+5)=HKD1.87mil，減去家用，同假設偉哥出既糧可以完整咁帶到香港(好驚! 教人不法咁帶錢出境可能要打耙)，偉哥減去5萬每月支出一年可儲1.15mil。建議偉哥每兩年係屯門區買入樓宇，以2.30mil樓價以下為主，照做按揭上會，但係大陸出糧既佢要留意: 要提供大陸出既證明如糧單加稅單。做按揭未必間間銀行認受你的海外入息。提供聘書，大陸稅單都有幫助，不過入息要打八折。偉哥你既case係借得越多越好，因為你比少D首期，淨低人仔係大陸都有3-4%定期年息，而香港樓按只約2%。
點解係每兩年買間樓?
點解係每兩年買間樓? 因為要實行買樓既平均成平法，你要買得密先可以得出平均入貨價，及於比平均超高時出貨。至於買屯門係因為大家錢銀有限，屯門樓始終size細同埋有二百餘元既樓賣，買入收租印花稅貴極幾千蚊。試問買「天璽」點去平均成平法呢? 但屯門區內百餘至三百餘萬既樓大把，潛力極高，仲有偉哥你應該未結婚前住左唔少年屯門，應該合你口味。
買樓收租都有野煩，可以做既係搵個相熟agent大家長做長有，agent知你有米唔怕幫你應付埋租客既。如果真係唔想做咁長mortgage，你先用1.15mil比首期，做五成按揭買間2.3mil既屯門市廣場兩房開始學下做收租佬，名正言順租出去，淨低五成1.15mil分五年按揭(最短tenor)每月都係還約$20000蚊。你過兩年又買一間咁既銀碼又係咁做。再過多兩年你去睇第三間樓既時候，第一間已經還哂，如此循環不息，保有手上cash又唔使供得太辛苦，一定上到會。
每兩年買間樓夾五年按揭tenor，以偉哥月薪十幾萬計落就剛fit到。你冇偉哥咁強勁就唔好亂試….